ဌာန်ပရိုၚ်ဗၠးၜးမန် – ပရေၚ်ဆဵုဂဗ တက်ကျာသဳကၠဳ အကြာအလဵုအသဳကဵု ဂကောံရပ်လွဟ် ကောန်ဍုၚ်အရၚ်တံဂှ် ပတဝ်မံၚ်က္ဍိုပ်ကဵု ပရေၚ်ၜိုဟ်လလမ် ဟွံသေၚ်တုဲ သီုမိက်ဂွံပါ်ပရးပတိတ်မံၚ် ပရေၚ်ကောံကလောံ UNFC ဏောၚ်ဂှ် ကံၚ်ဇြဳဖိတ်ဒရေဝ် ညဳသၟဟ်ဂကူကောန်ဍုၚ်အရၚ် UNFC ဟီုရ။
သွက်ပရေၚ်ၜိုဟ်လလမ် အလဵုအသဳ သမတဥူတိၚ်သိၚ် ဆဵုဂဗမံၚ်ကဵု ဂကောံကောန်ဍုၚ်အရၚ် မွဲမွဲဂကောံဂှ် ဒှ်နဲကဲလောဲသွာပြဟ်ပြေဟ် ဟွံသေၚ်တုဲ ပါ်ပရးပတိတ်မံၚ် ပရေၚ်ကောံကလောံ UNFC ရောၚ်ဂှ် ဓမံက်ထ္ၜးလဝ် ပ္ဍဲလိက်လလောၚ်တြး UNFC မပတိတ်လဝ် ပ္ဍဲဂိတုဒဳဇြေမ်ပါ ၄ ရ။
အလဵုအသဳ ကၟိန်ဍုၚ်ပံၚ်ကောံ ကေုာံ UNFC တံ ယဝ်ဆဵုဂဗသဳကၠဳမ္ဂး လောဲသွာပြဟ်ပြေဟ်ဏောၚ်ဂှ် တီမံၚ်ကီုလေဝ် ချပ်ဇန်မံၚ် သွက်သ္ဂောံဆဵုဂဗသဳကၠဳ တၞဟ်ခြာ မွဲမွဲဂကောံဂှ် ဒှ်လက်သဏ် ယျဵုလ္ဂူ ဟွံသေၚ်တုဲ ဗျတ်ဖဍိုန်ဖျေံ ဇြဟတ်တုဲ ဂစာန်လွဳမံၚ် နကဵုတၚ်ရန်တၟံ ကရေပ်ဓရတ်ရောၚ် လိက်လလောၚ်တြးဂှ် ဟီုလဝ်ရ။
“ပရေၚ်ဆဵုဂဗသဳကၠဳ ညးတံ (အလဵုအသဳ) ဂှ် ကၠောန်မံၚ် နကဵုစေတနာ တပ်တပ်တးတး သွက်ဂွံဒှ်သဳကၠဳ ပရေၚ်ဍုၚ်ကွာန် ဟွံသေၚ်ပုဟ်။ ညးတံ ဆဵုမွဲမွဲဂကောံဏောၚ်၊ တုဲတှေ် ကဵုအခေါၚ်အရာ တၞဟ်ခြာဏောၚ်။ အဓိကဂှ် ပါ်ပရးပတိတ် မွဲမွဲဂကောံဏောၚ်၊ ဂကောံဂှ် ဇြဟတ်ဍိုန်ကၠုၚ်ဏောၚ်၊ ရံၚ်ကေတ်သာ်ဏံတုဲ မိက်ဂွံပါ်ပရးပတိတ်မံၚ် ဂကောံကောန်ဍုၚ်အရၚ်ပိုဲဏောၚ် ဟီုမာန်မံၚ်” သာ်ဝွံ ညးအုပ်ကာနာနာ UNFC နာဲဟံသာ ဟီုကဵု ဌာန်ပရိုၚ်ဗၠးၜးမန်ရ။
ပြသၞာ ပရေၚ်ဍုၚ်ကွာန်ဂှ် နနဲပရေၚ်ဍုၚ်ကွာန် ဟွံသောၚ်ကလးတုဲ ညးမဂွံအဝဵုအလဵုအသဳတံဂှ် သုၚ်စောဲဇြဟတ်ပၞာန်တုဲ သောၚ်မံၚ်ကီု၊ ဒေံါပန်ပှော်တုဲ သုၚ်စောဲမံၚ် နဲကဲ ဖောအ်ဗြေဝ်ဒေသတံကီုဂှ် နကဵုနဲလီစၞာဲ ပါ်ပရးပတိတ်မံၚ် ပေဲါဗတိုက် “သွက်သ္ဂောံကလိဂွံ ကဆံၚ်တုပ်သၟဟ် ပရေၚ်ဍုၚ်ကွာန်” ကောန်ဍုၚ်အရၚ်တံဂှ်ရ ပေဲါပၞာန်အပ္ဍဲဍုၚ် ဂၠိၚ်သ္ၚောဲကၠုၚ် ပွိုၚ် ၆၀ သၞာံပြၚ်တုဲ သ္ၚောဲခြာကၠုၚ်ကဵု ပရေၚ်ၜိုဟ်လလမ်ရ။
နကဵု UNFC သ္ပကၠုၚ်သတိ နဲကဲကော်ဘိက်ဒုၚ်တၠုၚ် ပရေၚ်ၜိုဟ်လလမ် အလဵုအသဳဂှ်ရ သွက်သ္ဂောံဒေံါပန်ပှော် အလုံဒေသ မကတဵုဒှ်မံၚ်ပၞာန်ကီု၊ သွက်သ္ဂောံဆဵုဂဗသဳကၠဳ နနဲပရေၚ်ဍုၚ်ကွာန်ကီု၊ ကာလသဳကၠဳဂှ်ပၠန် ညးစၞးအလဵုအသဳ ကၟိန်ဍုၚ်ပံၚ်ကောံ ကေုာံ ညးစၞး ဒပ်ပံၚ်ကောံ UNFC တံ ဒးသဳကၠဳရောၚ်ဂှ် ဖျေံကၠုၚ်မူသဇိုၚ်ရ။
ၜိုန်ဂှ်လေဝ် သွက်သ္ဂောံဂၠာဲ ဂၠံၚ်တရဴ ပရေၚ်ၜိုဟ်လလမ်တုဲ ဟိုတ်နူရှေ်သှေ် အခေါၚ်ဖန်ဖက် ဂကောံမပါလုပ် ပ္ဍဲ UNFC မွဲမွဲဂကောံဂှ်ရ နကဵုမွဲမွဲဂကောံ ကဵုလဝ်အခေါၚ် ဆဵုဂဗတုဲ သ္ဂုတ်သွာတ်ဂှ် ဒးသဳကၠဳကဵု UNFC ရောၚ် ဖျေံလဝ်မူ နွံရောၚ်ဂှ် ဓမံက်လဝ် ပ္ဍဲလိက်လလောၚ်တြးရ။
“ပရေၚ်ကော်ဘိက်ဒုၚ်တၠုၚ် ပရေၚ်ၜိုဟ်လလမ် အလဵုအသဳဂှ် သွက်ဂွံဒေံါပန်ပှော် တက်မံၚ်ကျာကဵု မွဲဂကောံတုဲ ထပက်မံၚ်ပၞာန်ကဵု ဂကောံတၞဟ်မွဲဂကောံဏောၚ်” သာ်ဝွံ နာဲဟံသာ ဟီုရ။
ပ္ဍဲကောံဓရီု ကမ္မတဳဗဟဵု UNFC မကၠောန်သ္ပ ခြာဟွံလအ်ဏီဂှ် ဗော်ရပ်လွဟ်ကောန်ဍုၚ်အရၚ် ၆ ဂကောံ ကေုာံ ဂကောံဆက်စပ် ၆ ဂကောံတံ ပံၚ်ကောံတုဲ ကလေၚ်ဒက်ပ္တန် နကဵုဂကောံသဇိုၚ် ၁၂ ဂကောံရ။
သအာၚ်နူဂှ်ပၠန် ဒပ်ပၞာန်ရပ်လွဟ် ကောန်ဍုၚ်အရၚ်တံ ပံၚ်ကောံတုဲ သွက်သ္ဂောံဒက်ပ္တန် ဒပ်ပၞာန်ကၟိန်ဍုၚ်ပံၚ်ကောံဂှ်လေဝ် ဖျေံကၠုၚ်သ္ဂုတ်သွာတ်ရ။
ကံၚ်ဇြဳ ဖိတ်ဒရေဝ် ညဳသၟဟ်ကောန်ဍုၚ်အရၚ် UNFC ဂှ် စဒက်ပ္တန်လဝ် ပ္ဍဲဂိတုဖေဖဝ်ဝါရဳ သၞာံ၂၀၁၁ တုဲ နဒဒှ် ဂကောံသဇိုၚ် ၆ ဂကောံဂှ် ဗော်သွးကောန်ဂကူကရေၚ် KNU၊ ဗော်ဍုၚ်မန်တၟိ NMSP၊ မုခ်ဒပ်ကောန်ဂကူချေၚ် CNF၊ ဂကောံသၠးပွးကောန်ဂကူကချေၚ် KIO၊ ဗော်တဴတက်ကောန်ဂကူကရေၚ်ဍာဲ KNPP ကေုာံ ဗော်တဴတက်ဍုၚ်သေံဇၞော် SSPP တံ ပါလုပ်ကၠုၚ်တုဲ လၟုဟ် ဂကောံကောန်ဂကူပအိုဝ်ဗၠးၜး PNLO ၊ မုခ်ဒပ်ဗၠးၜးတွဵုရးပလံၚ် PSLF၊ ကံၚ်ဇြဳကောန်ဂကူဍုၚ်ရခေၚ် ANC၊ သမဂ္ဂဒဳမဝ်ကရိတ်တေတ်ဠာဟူ LDU၊ ဂကောံကောန်ဂကူ “ဝ” WNO ကေုာံ ဂကောံကောန်ဂကူကချေၚ် KNO တံ ထပ်ပံၚ်ကောံတုဲ ဒှ်ကၠုၚ်ဂကောံသဇိုၚ် ၁၂ ဂကောံရ။
