အလဵုအသဳမလေဝ်ယှာတံ ကြေပ်ဂြတ်ပ္တိုန် မူဝါဒဆေၚ်စပ်ကဵု ရုၚ်ဇၞော်ညးဒှ်ဒဒိုက်ကုလသမဂ္ဂ UNHCR တုဲ အကြာညးဒှ်ဒဒိုက်ဗၟာ မစိုပ်မလေဝ်ယှာတံ ဒှ်ဂဝိၚ်ဂၠိုၚ်တိုန်မံၚ်ရောၚ် ဂွံတီကေတ် နူညးရေၚ်တၠုၚ်ရီုဗၚ် ပရေၚ်ညးဒှ်ဒဒိုက်တံရ။
အပ္ဍဲတ္ၚဲတုဲကၠုၚ်အကြာတဏံဝွံ ဝန်ဇၞော်ပရေၚ်ဍုၚ်သၟာၚ်မလေဝ်ယှာ Datuk Seri Mohamad Hasan ဂှ်လေဝ် ကာလပ္တိတ်လိက်စၟတ်သမ္တီသက်သဳ ညးဒှ်ဒဒိုက်တံ ယဝ်ဟွံကၠောန်သ္ပ ကြေပ်ဂြတ်ပ္တိုန် ပရေၚ်ထိၚ်ဒဝ်မ္ဂး ကိစ္စရေၚ်တၠုၚ်ပံၚ်ကောံ ကု UNHCR ဂှ် ဒးက္လေၚ်သ္ၚဳဂၠိပ်ထေက်ရောၚ် ဟီုဂးလဝ်ရ။
ဟိုတ်နူအကာဲအရာဂမၠိုၚ်ဂှ်ရ နကဵုညးဒှ်ဒဒိုက်ဗၟာ မစိုပ်မလေဝ်ယှာတံ လ္တူအကာဲအရာ အခေါၚ်မံၚ်စံၚ်၊ ကမၠောန်ကၟိတ်၊ ပရေၚ်ဂီုကၠီု ကေုာံ အကာဲအရာအနာဂတ်ဂမၠိုၚ်ဂှ် ဒှ်ဂဝိၚ်ဂၠိုၚ်တိုန်ကၠုၚ်မံၚ်ရောၚ် ညးရေၚ်တၠုၚ်ရီုဗၚ် ပရေၚ်ညးဒှ်ဒဒိုက်မွဲတၠ ဟီုရ။
“ဗီုအကာဲအရာ ဒှ်မံၚ်အခိၚ်လၟုဟ်ဏံဂှ်တှေ် ညးဒှ်ဒဒိုက်တံ သွက်ဂွံဂၠာဲကမၠောန်ဂှ် ဝါတ်ဂါတ်ကၠုၚ်ရ။ ပရေၚ်ရပ်စပ်တံလေဝ် ဂၠိုၚ်ကၠုၚ်ကွေံရ။ ဒးဟီုဥပမာတှေ် ဒၞာဲရိုဝ်ဟေန်ဂျာ (၁၄၀) တၠ မံၚ်ဒၟံၚ်ဂှ် ဒးဒုၚ်ထ္ဍေၚ်ပ္တိတ်တုဲ ကၠုၚ်ကောံမံၚ် ဂတမုက်ရုၚ် UNHCR ရ။ အေဗ္တံဂှ်ရ ကာပလုက် (၃) မကၠုၚ်တုဲ ရပ်ဏာရ။ အခိၚ်လၟုဟ်ဏံ တၠကမၠောန်တံလေဝ် သွက်ညးဒှ်ဒိုက်တံဂှ် ဟွံမိက်ကဵုကမၠောန်ပုဟ်။ ဂကူမလေဝ်တံလေဝ် သ္ပပခက်တုဲ ထ္ဍေၚ်ပ္တိတ်နူဒၞာဲမံၚ်ဂှ်လေဝ် ဂွံဆဵုကေတ် ဗွဲမဂၠိုၚ်ရ” သာ်ဝွံ ညးဟီုရ။
ဆေၚ်စပ်ကဵု အလဵုအသဳမလေဝ်ယှာ ပြံၚ်လှာဲမူဝါဒတုဲ နကဵု UNHCR လေဝ် ဟွံဂွံတီကေတ် တၚ်နၚ်သောဲသောဲဗြောဲဗြောဲဂမၠိုၚ်ဏီဂှ်ရ အပ္ဍဲပွဳဗွိုၚ်ညးဒှ်ဒဒိုက်တံဂှ် ပရေၚ်ဟွံချိုတ်ပၠိုတ်ဂမၠိုၚ်နွံမံၚ်ရောၚ် ဂွံတီကေတ်ရ။
တုဲပၠန် ပ္ဍဲလ္တူမုက်လိက်ပရေၚ်မၞိဟ်ဂမၠိုၚ် တြးပ္တိတ်တၚ်နၚ် ဆေၚ်စပ်ကဵု ကောန်ဍုၚ်သၟာၚ်ဂမၠိုၚ် နွံကၠုၚ်တုဲဂှ် ပရေၚ်စၟဳစၟတ်ဂၠိုက်ဂၠာဲ နူဂကောံကောပ်ကာဲမၞိဟ်လုပ်တိတ်တံလေဝ် ဂွံဆဵုဂၠိုၚ်ကၠုၚ်ရောၚ် ဂးရ။
စဵုကဵုအခိၚ်လၟုဟ်ဏံ သွက်ဂွံဒေံါဇူ ပရေၚ်ပ္တိုန်စရၚ် UNHCR ကဵု လၟေၚ်ကမၠောန်တၞဟ်ဂမၠိုၚ် ဗွဲယာယဳဂှ် အလဵုအသဳမလေဝ်ယှာ အာတ်မိက်လဝ်ကီုလေဝ် အခိၚ်လၟုဟ်ဏံ ဆက်ဂေတ်မံၚ်အတိုၚ်တြေံဖိုဟ်ရောၚ် ဂွံတီကေတ်ရ။
“နကဵုညးဒှ်ဒဒိုက်ကောန်ဍုၚ်အရၚ်တံ ကိစ္စဏံဂှ် ဆေၚ်စပ်မံၚ်ကဵု ပရေၚ်ဍုၚ်ကွာန်ဏောၚ် ပတှေ်ကေတ်လဝ်ရ။ လၟုဟ် ဆေၚ်စပ်ကဵု ပ္တိုန်စရၚ် UNHCR တုဲ သွက်ဂွံဒေံါဇူယာယဳဂှ် ဟီုလဝ်ကီုလေဝ် အကာဲအရာသောဲသောဲဗြောဲဗြောဲဂှ်တှေ် ဟွံသောၚ်ကၠးဏီပုဟ်။ ဟိုတ်ဂှ်ရ လၟေၚ်ကမၠောန်လၟုဟ်ဏံဂှ် ဆက်ဂေတ်မံၚ် အတိုၚ်တြေံဟေၚ်ရ” သာ်ဝွံ ညးဟီုရ။
ကိစ္စပ္တိုန်စရၚ် UNHCR အရၚ်ဒးဒှ်ဒဒိုက်ဗၟာ မစိုပ်မလေဝ်ယှာတံဂှ်ဝွံ သွက်အခေါၚ်အရာ ပရေၚ်စဵုဒၞာ နူဘဲအန္တရာဲဒးဒုၚ်ရပ်၊ သ္ဂောံဂွံပရေၚ်ရီုဗၚ်သဇိုၚ် ကေုာံ သ္ဂောံက္လေၚ်ဖျေံဒၞာဲဝဲါ ဇရေၚ်ဍုၚ်တတိယတေံဂှ် ဒှ်လၟေၚ်ကမၠောန်ကိစ္စဇၞော်မွဲရောၚ် ဂွံတီကေတ်ရ။
အခိၚ်လၟုဟ်ဏံ ညးဒှ်ဒဒိုက်ဗၟာ မစိုပ်မလေဝ်ယှာဂမၠိုၚ်ဂှ်ဝွံ ဒးမၚ်ရံၚ်ဒၟံၚ် တၚ်သ္ဂုတ်သွာတ်အလဵုအသဳ ဆေၚ်စပ်ကဵု UNHCR တုဲ လ္တူအကာဲအရာ အခေါၚ်မံၚ်စံၚ် ကေုာံ ပရေၚ်ဂီုကၠီုအနာဂတ်ဇကုဂှ် ဒးဒှ်ဂဝိၚ်နွံရောၚ် ဂွံတီကေတ်ရ။
ပ္ဍဲကၟိန်ဍုၚ်မလေဝ်ယှာဝွံ အတိုၚ်စရၚ် UNHCR မ္ဂး ညးဒှ်ဒဒိုက် ကေုာံ ညးအာတ်အခေါၚ်ဇူဒီု သီုဖအိုတ် နွံကြပ် (၂) ကိုဋ်တုဲ ဗွဲမဂၠိုၚ်ဂှ် ဒှ်ကောန်ဍုၚ်အရၚ်ကၟိန်ဍုၚ်ဗၟာရောၚ် ဂွံတီကေတ်ရ။