မာံသုတ – ပ္ဍဲဂိတုဂျာန်နဝါရဳ(၅)ဂှ် ကမ္မတဳကေၚ်ကာဗဟဵုဗော်ဍုၚ်မန်တၟိ(၉)တၠတံ ကလေၚ်ရုဲစှ် တုဲဒှ်အာတုဲ ၜိုန်ရမၞိဟ်တာလျိုၚ်အပြံၚ်အလှာဲဟၟဲကီုလေဝ် ဒၞာဲညးတာလျိုၚ်ယုတ်ဒေက်အာလဝ်တံဂှ် ကလေၚ်ဗပေၚ်စုတ်မာန်ရ။
သ္ဘင်ကၠဳဗော်ဍုၚ်မန်တၟိ အလန် အဋ္ဌမ
အပ္ဍဲကလေၚ်ရုဲစှ်ကမ္မတဳကေၚ်ကာတၟိနကဵုမာဲပၞုက်ဂှ် ဥက္ကဌနာဲထဝ်မန်၊ ဒုဥက္ကဌနာဲရဿ၊ ညးအုပ်ကာနာနာနာဲဟံသာတံ အတိုၚ်တာလျိုၚ်တြေံ ညးတံဒးကလေၚ်ယိုက်ဂၠေၚ်အာပၠန် ဂွံတီရ။
“မၞိဟ်ဒးပြံၚ်လှာဲအာ ဟၟဲကွေံကွေံရ၊ ဒၞာဲမၞိဟ်တာလျိုၚ်ယအ်အာဂှ် ထပ်ထပေၚ်စုတ်မာန်ကၠုၚ်ရနွံ” သာ်ဝွံ ဂအုပ်ရုၚ်ဗဟဵုနာဲအေမန် ဟီုရ။
ကမ္မတဳကေၚ်ကာဗဟဵုနာဲယှိုဲတိၚ် ဟိုတ်နူအာယုက်ဇၞော်အာတုဲ နကဵုပရေၚ်ထတ်ယုက် ဂွံအခေါၚ်ဇူတဴတိတ်အာ နူဗော်ရ။
အပ္ဍဲကမ္မတဳကေၚ်ကာဗဟဵုတၟိလၟုဟ်ဏံဂှ် ဒုသ္ကိုပ်ပၞာန်လျးဂကူ၊ ဒုသ္ကိုပ်ပၞာန်သိုက်ထဝ်(နာဲပၠုံ) ကေုာံ နာဝေန်လှတံ ပါလုပ်ကၠုၚ်ရ။
“လၟိဟ်ကမ္မတဳဗဟဵုတံအတိုၚ်တြေံ(၂၇) တၠနွံရ၊ ဆဂး ကမ္မတဳဗဟဵုအရန်တံဂှ် ညးစွံ(၃)တၠဓဝ်ရ” သာ်ဝွံ နာဲအေမန် ဟီုရ။
အပ္ဍဲကမ္မတဳဗဟဵုတၟိတံဂှ် ထပ်ရုဲစှ်ဏာ နာဲဧက၊ ဒုသ္ကိုပ်ဗိုလ်ဇၞော်ဇာတာမာန်(ထပိုဲဉာဏ်ထောန်)၊ သ္ကိုပ်ဗိုလ်ဇၞော်ဗၠဲရတ်၊ နာဲထောန်၊ ဒုသ္ကိုပ်ဗိုလ်ဇၞော်ဆာန်ဝေန်အံၚ်တံ ဂွံတီရ။
သွက်ကမ္မတဳဗဟဵုအရန်(၃) တၠပၠန်ဂှ် ထပ်ရုဲစှ်ဏာ ဒုသ္ကိုပ်ဗိုလ်ဇၞော် M-သိုက်ဆာန်၊ သ္ကိုပ်ဗုိုလ်မကမ်၊ သ္ကိုပ်ဗဵုစၠန်ထဝ်တံရ။
သဘၚ်သဳကၠဳဗော်အလန်ဆဌမဏံဂှ် စနူဂိတုဒဳဇြေမ်ပါ ၂၁ တုဲကၠုၚ်တေံ ကၠောန်ဗဒှ်ဒၟံၚ်ပ္ဍဲဌာန်ဂအုပ်ဗဟဵုဗော်ဍုၚ်မန်တၟိ ဒၞာဲဗ္ဒိုပ်လုပ်ဍုၚ်ဂှ် တေံရ။
သဘၚ်သဳကၠဳဗော်အလန်ပထမဂှ် စနူ ၁၉၈၉ တေံ ကၠောန်ဗ္ဒျ်ကၠုၚ်လဝ် ပ္ဍဲဌာန်ဂအုပ်ဗဟဵု၊ ပွဳပွူဒေသကျာ်ပိ(ကရပ်ကွာန်တၞံပကုက်)ရ။
