ဌာန်ပရိုၚ်ဗၠးၜးမန် – သြန်ဘဏ္ဍာ မကလိဂွံနၚ် နူပွမသွံပတိတ်ဏာ သၟုဟ်ဓါတ်သဘာဝကဵု ဓါတ်လလဳပၟတ်ဇြဟတ်ဍာ် ကုဍုၚ်သအာၚ်ဂှ် ယွံရအလဵုအသဳတံ ကၠးကၠးမးမး တာလျိုၚ်နွံနွံ သုၚ်စောဲအာ သၟဝ်သၞောတ်ကောပ်ကာဲ ဒးဒးရးရးမ္ဂး ဟွံဒးကံက်ဂလိုၚ်ပတိုန် ခရိတ်ပၟတ်ရောၚ်ဂှ် AOW ကေုာံ BRN တံ ဟီုရ။

နကဵုအလဵုအသဳ ဟိုတ်နူ ဒးကျဟောံမံၚ် ပ္ဍဲၚုဟ်ခရိတ်ပၟတ် ကံက်မံၚ်လၟုဟ်ဏံကီု၊ ဟိုတ်နူဂွံပရးပၟတ် အလုံဍုၚ်မွဲ သြန်ဟွံရုမ်ဂပ်ကီုတုဲ ဒးကံက်ဂလိုၚ်ပတိုန် ခရိတ်ပၟတ်ရောၚ်ဂှ် ဌာနဝန်ဇၞော် ဇြဟတ်ဓါတ်လလဳ စၟတ် (၂) ဟီုရ။

အလဵုအသဳဗၟာတံဂှ် ၜိုန်ရဂွံမံၚ်သြန် ဂၠိုၚ်ကဵုဗဳလဳယျာန် နူမသွံပတိတ်ကၠေၚ်သၟုဟ်ဓါတ် ဇြဟတ်ပၟတ်ကီုလေဝ် ညးဍုၚ်ကွာန်တံဂှ် ဒးဆဵုဂဗမံၚ်ကဵု ဒဒိုက်ၚုဟ်ပၟတ်က္ဍၚ်လောန်ရောၚ်ဂှ် ဂကောံမၚ်လ္ၚတ်ရံၚ်စံၚ်ကၠေၚ်ပ္ဍေန် ယခေၚ် (AOW) ကေုာံ ဌာန်ဆက်စၠောံ မဆေၚ်စပ်ကဵု ၜဳကြုၚ် ဍုၚ်ဗၟာ ( BRN) တံ ပတိတ်လဝ်ပရိုၚ် ပ္ဍဲဂိတုဂျာန္နဝါရဳ ၁၀ ဏံရ။

“ပ္ဍဲဍုၚ်ဗၟာ သြန်ဂွံနူကိုန်စဳဇန် စၞပၟတ် ကၠေၚ် သၟုဟ်ဓါတ်တံကဵု အဆက်ဖဵု ညးဍုၚ်ကွာန်တံ ဒးဒုၚ်ဇီုကပိုက် ဟိုတ်နူကိုန်စဳဇန်ဏံဂှ် သွက်ဂွံပတိတ်ကဵု ပရိုၚ်ဍာံဍာံ အာတ်မိက်ဗတိုက်ဖအောဝ်ဏာ အလဵုအသဳရ” သာ်ဝွံ နာဲသာၚ်သာၚ် နူဌာန်ဆက်စၠောံ မဆေၚ်စပ်ကဵု ၜဳကြုၚ် ဍုၚ်ဗၟာ ဟီုရ။

စနူသၞာံ ၂၀၁၂ မံက်ဏံတုဲ အပ္ဍဲဍုၚ်ဗၟာ ၚုဟ်ပၟတ်က္ဍၚ်တိုန်အာ ၜါဆတုဲ ၚုဟ်ကၠေၚ်လေဝ် က္ဍၚ်တိုန်အာ ပိဘိုအ်မွဲဘိုအ်ရောၚ်ဂှ်လေဝ် ဓမံက်ထ္ၜးလဝ်ကီုရ။

အလဵုအသဳဗၟာဂှ် နူပွမသွံပတိတ် ကၠေၚ်သၟုဟ်ဓါတ် ကေုာံ ဇြဟတ်ပၟတ်ဍာ် ကုဍုၚ်မ္ၚးတုဲ လၟေၚ်လၟေၚ်သၞာံ ကလိဂွံမံၚ်သြန် ဒဝ်လာအမေရိကာန် ၂ ဗဳလဳယျာန်ပြၚ်ရောၚ်ဂှ်လေဝ် ပတိတ်လဝ် ပ္ဍဲလိက်လလောၚ်တြးညးတံရ။

အပ္ဍဲဍုၚ်ဂှ် ဟိုတ်နူထိၚ်ဒဝ်လဝ် သၞောတ်သၠာဲလှုဲကီု ဟိုတ်နူဟွံမွဲကဵု သၞောတ်ကၠးကၠးမးမးကီုတုဲ ပ္ဍဲစရၚ် သြန်လုပ် အလဵုအသဳ မကလိဂွံ နူပွမသွံပတိတ် ကၠေၚ် သၟုဟ်ဓါတ် ဇြဟတ်ပၟတ်တံကီု၊ ပ္ဍဲစရၚ်သြန်ဒပ်ပၞာန်တံကီု ဟွံဓမံက်ထ္ၜးလဝ် ကၠးကၠးမးမးတုဲ သြန်ဏံဂှ် ပအပ်စွံလဝ် ပ္ဍဲစရၚ်ဗာန်လဵုဂှ်လေဝ် ဟွံဂွံတီကေတ် ကၠးကၠးမးမးရ။