ပရေၚ်သၠးပွးလၟုဟ်ဂှ် ဒုၚ်လျိုၚ် သွက်ကောန်ဍုၚ်အရေၚ်ဟာ

by | Feb 24, 2012 | ဂလာန်ညးဒါန်လိက် | 0 comments

ပ္ဍဲကာလလၟုဟ်ဝွံ ပ္ဍဲကဵုကၟိန်ဍုၚ်ဗၟာတေံ ကတဵုဒှ်ကၠုၚ်ပရေၚ်ပြံၚ်သၠာဲ တၟာဂလိုၚ်ရ။ ပရေၚ်သၠးပွးတအ် မံက်ဂတဝ်ကၠုၚ်တၟာဂလိုၚ်ရောၚ် ရံၚ်ကေတ်လ္တူကျာမ္ဂး ညာတ်ကေတ်သာ်ဝွံရ။ ဆဂး ပရေၚ်ပြံၚ်သၠာဲပၞော် သၠးပွး မံက်ဂတဝ်ကၠုၚ်သာ်ဏအ်ဟီုဂှ် ဒုၚ်လျိုၚ်ကဵု သွက်အခေါၚ်အရာဒဳမဝ်ကရေဇြဳသၟးဟာ လ္တူအခေါၚ် အရာကောန်ဍုၚ်အရေၚ်တအ်ဂှ် ဒုၚ်လျိုၚ်ကဵုမာန်ဟာ သွက်ဂွံဒးကလေၚ်သၟာန် နွံရ။

နူကဵုဒဝ်အံၚ်သာန်သုကျဳ (ဒေါ်အောၚ်ဆန်းစုကြည်) ဗၠးတိတ်ကၠုၚ်နူသ္ၚိထံၚ်တုဲဂှ် ကောန်ထံၚ်ပရေၚ်ဍုၚ် ကွာန် ဗွဲမဂၠိုၚ်တအ် ကလေၚ်ဗၠးကၠုၚ်ရ။ လက္ကရဴလက်ထက်ကွးဘာ (၁၉၈၈) တေံလေဝ် ဗၠးတိတ် ကၠုၚ်ကီုရ။ စနူကဵုအခိၚ်ဝွံတုဲ ဂကောံ/ပူဂဵု မချဳဒရာၚ်ဒၟံၚ် ပရေၚ်ဒဳမဝ်ကရေဇြဳ ဗၞတ် (၂၃) သၞာံတအ် ဂွံ အခေါၚ်ချဳဒရာၚ် ပရေၚ်ဍုၚ်ကွာန် ဂွံအခေါၚ်ဆဵုဂဗ ကုညးဍုၚ်ကွာန်တအ် ဗွဲမသၠးပွးရ။

အခေါၚ်က္ဍိုပ်သ္ကိုပ်ပရေၚ်ဍုၚ်ကွာန်ကဵု က္ဍိုပ်သ္ကိုပ်ကွးဘာတအ် ချဳဒရာၚ်မာန်ကၠုၚ်သၠးပွးတုဲ လိက်ပရိုၚ်ဂျာ နေဝ်ဂမၠိုၚ်တအ်လေဝ် ဂွံကၠုၚ်အခေါၚ်ချူဇန် ဟီုဂးဗွဲမသၠးပွး နွံကၠုၚ်ရ။ ဆဂး နူအလဵုအသဳ ကေုာံ ဒပ်ပၞာန် ဗၟာတအ် ကၠောန်ၜိုတ်ဗၠေတ်ၚ်ဒၟံၚ်တအ်ဂှ် နူကဵုအ္စာပရိုၚ်တအ် ချူဇန်ဟီုဂး ဗွဲမသၠးပွးဟွံဂွံဏီရ။

ပ္ဍဲအခိၚ်အခေါၚ်သၠးပွး မံက်ဂတဝ်ကၠုၚ် ပ္ဍဲကဵုလ္တူဍုၚ် သာ်ဏအ်ဂှ် ပ္ဍဲကဵုဒေသကောန်ဍုၚ်အရၚ်တအ် အကာဲအရာကတဵုဒှ်ဒၟံၚ် သာ်လဵုရော။ ကောန်ဍုၚ်အရၚ်တအ် ဂွံအခေါၚ်ဒုၚ်စသိုၚ် အခေါၚ်သၠးပွးဏအ်ကီု ဟာ။

ပ္ဍဲကဵုလ္တူဍုၚ်တေံ ပရေၚ်သၠးပွးနွံကၠုၚ်ညိညသာ်ဏအ်ဂှ် ညးဍုၚ်ကွာန် ပ္ဍဲကဵုဒေသကောန်ဍုၚ်အရၚ်ဂမၠိုၚ် ဟွံဂွံဒုၚ်စသိုၚ်ဏီရ။ ပ္ဍဲကဵုတွဵုရးဍုၚ်ကချေၚ်တေံမ္ဂး ဟိုတ်နူဒပ်ပၞာန်ဗၟာတအ် လုပ်ဗတိုက်ဒၟံၚ် ပ္ဍဲကဵုတိဍာ်ဍုၚ် ကချေၚ်တုဲ ညးဍုၚ်ကွာန်ဂကူကချေၚ်တအ် ဒးဂြိပ်ဒဴဒၟံၚ် နွံဒၟံၚ်ဏီတုဲ ပရေၚ်သၠးပွးဟီုဂှ် မုရောညးတအ် ဟွံတီရ။

ပ္ဍဲကဵုဒေသ ကောန်ဍုၚ်အရၚ်တၞဟ်ဟ်တအ်ပၠန်လေဝ် ပေဲါပၞာန်ဂှ် ဟွံတုဲဒှ်ခိုဟ်ဟ်ဏီရ။ လၟုဟ်ဒပ်ပၞာန် ပၠန်ဂတးဂမၠိုၚ်တအ် တက်ကျာပရေၚ်ဒေံါပန်ပှော်ကဵု အလဵုအသဳတအ်တုဲ ပရေၚ်ဒေံါပန်ပှော်ဂှ် ကတဵုဒှ် ကၠုၚ်မာန်ရောၚ်။

စပ်ကဵုကိစ္စချူဇန်ဟီုဂး ဗွဲမသၠးပွးတအ်ဂှ် ဍေံဟွံမံက်ဂတဝ် ပ္ဍဲကဵုဒေသကောန်ဍုၚ်အရၚ်တအ်ဏီရ။ အမာတ်စၠတ်ထဝ်ကောန်ဍုၚ်အရၚ်တအ် အာတ်မိက်လဝ် သွက်ဂွံကဵုအခေါၚ်ဗတောန်လိက်ပတ် ကောန်ဍုၚ်အရၚ် ပ္ဍဲကဵုဘာဗတောန်လိက်အလဵုအသဳဂှ် နူကဵုအလဵုအသဳတအ် ဟွံကဵုအခေါၚ်ဏီရ။ ဟိုတ်ဂှ်ရ ပ္ဍဲကဵုဒေသကောန်ဍုၚ်အရၚ်တအ်ဂှ် သွက်ဂွံထိၚ်ဒဝ်အာ အရေဝ်၊ ဘာသာ၊ လိက်ပတ်တအ်ဂှ် ဒှ်ဒၟံၚ်အခက်အခုဲဏီရောၚ်။

လၟုဟ်မ္ဂး ပ္ဍဲဍုၚ်လ္ဂုၚ်ကီု၊ ဍုၚ်မန္တလေဝ်ကီု၊ ဍုၚ်နေပျဳတဝ်ကီု လိက်ပရိုၚ်ဂျာနေဝ်ဘာသာဗၟာတအ် မံက်တိုန် ကၠုၚ် ညံၚ်ရဴပတိုဟ်ရ။ ဆဂး ပ္ဍဲကဵုဒေသကောန်ဍုၚ်အရၚ်တအ်ဂှ် လိက်ပရိုၚ်ကောန်ဍုၚ်အရၚ် ဂွံမံက်တိုန် ကၠုၚ်ဂှ် ဒှ်ဝါတ်တဴဗွဲမလောန်ရောၚ်။ သၟာပရိုၚ်ကောန်ဍုၚ်အရေၚ်တအ်ဂစာန်တုဲ ပတိုန်ထ္ၜးကီုလေဝ် နူကဵု ဌာနဝန်ဇၞော်ပရိုၚ် ဟွံကဵုအခေါၚ် လိက်ပရိုၚ်ဂျာနေဝ်ဘာသာ ကောန်ဍုၚ်အရၚ်တုဲ ကဵုအခေါၚ်ဆၜိုတ် လိက်ဗၟာဟေၚ်ရ။

ဒေသတိဍာ်ကောန်ဍုၚ်အရၚ်ဗွဲမဂၠိုၚ်တအ်ဂှ် ဒှ်ဒၟံၚ်တိဍာ်ပဋိပက္ခပၞာန်တုဲ ကောန်ဍုၚ်အရၚ်တအ်ဗွဲမဂၠိုၚ် ဟွံဂွံအခေါၚ်ချဳဒရာၚ် ပရေၚ်ဍုၚ်ကွာန်ဗွဲမသၠးပွးဏီရ။ ပ္ဍဲကဵုတိဍာ်ဒေသဗွဲမဂၠိုၚ်ကီု၊ ပ္ဍဲကဵုအလဵုအသဳတွဵုရး ကီု၊ ပ္ဍဲကဵုကၠတ်ထဝ်တွဵုရးကီု နကဵုဗော်ကျခိုၚ်ယျေတအ်သၟး အုပ်ဓလီုလဝ်တုဲ သွက်အခေါၚ်အရာကောန် ဍုၚ်အရၚ်ဂှ် နူကဵုဗော်အလဵုအသဳဏအ် ကၠောန်ၜိုတ်ကဵုဟွံသေၚ်ရောၚ် ပ္တိုန်ထ္ၜးဏာရ။

Written by

Related Posts

ဂၠံၚ်တရဴ ဇကုကဵုဇကု

ဂၠံၚ်တရဴ ဇကုကဵုဇကု

ပ္ဍဲကဵုပရေၚ်ဍုၚ်ကွာန် ပြိုၚ်ပ္ကာန်စန်ဒက်ဒၟံၚ် ကောန်ဂကူကောန်ဍုၚ်အရၚ်တအ်တ္ၚဲဏံဂှ် ကောန်ဍုၚ်အရၚ်လ္ၚဵု ပါဗက်သၟဝ်ဂၠံၚ်တရဴလ္ပာ်တေံနွံ၊ ကောန်ဍုၚ်အရၚ်လ္ၚဵု ပါဗက်သၟဝ်ဂၠံၚ်တရဴလ္ပာ်ဏံနွံရ။သွက်ဂွံဒက်ပ္တန်အာ ကၟိန်ဍုၚ်အနာဂတ်ဏံဂှ် မွဲလ္ပာ်ဂှ် ဖန်ဇန်ပလေဝ်ပလေတ်ဒၟံၚ်...

ဂၠံၚ်တရဴ ဇကုကဵုဇကု

လိုက်ဝှ်တိကှ်ဏံ စွံသတိတုဲ ကၠောန်ပေဲါသဘၚ်အိုတ်ညိ

လိုက်ကၠုၚ်ဝှ်မ္ဂး သဘၚ်အခိုက်ကၞာ၊ သဘၚ်ကျာ်၊ သဘၚ်ဒေသညးကဵုညး၊ အခိုက်ဒေသညးကဵုညး ကၠောန်တဴသ သဘၚ်အိုတ်ရ။ သၞာံတုဲကၠုၚ်တေံဂှ် ဟိုတ်နူအသိၚ်ဘဲယဲကပ်တုဲ ပရေၚ်သဘၚ်ပေဲါတအ်ဂှ် ဒးဒေံါဇူလဝ်တုဲ အခိၚ် လိုက်ဝှ်ဏံ ညးတာလျိုၚ်တအ် ပံက်ကဵုအခေါၚ်ဗဒှ်ပေဲါရ။သ္ပဟိုတ်ကဵု ပရေၚ်ဗွဝ်ဖျာဂၠးတိကီု၊...

ဂၠံၚ်တရဴ ဇကုကဵုဇကု

ဗွဝ်ဖျာဆက်ထပက်တိုန် ဒဵုစိုပ်မတ်ဗြဲဏီဟာ?

ထဝ်လျိုၚ်မွဲဒကေဝ် ကြပ် (၃၀) ကိုဋ်၊ ၚုဟ်ကၠေၚ်ဓာတ်မွဲလဳတာ ကြပ် (၃၀၀၀)၊ ကၠေၚ်ဒဳဇြေဝ် ကြပ် (၄၀၀၀)၊ ၚုဟ်လှာဲသြန် သြန်ဗၟာ (၁) ဒကေဝ် သြန်သေံ (၁၀၀) ၝာတ်ဂှ် ဟွံကေၚ်မိၚ်မွဲလှေ် တ္ၚဲဏံ ဂွံမိၚ် ဂွံဆဵုကၠုၚ်ဣရ။နကဵုအသိၚ်အလိုန် ပရေၚ်ဗွဝ်ဖျာတိုန်ဂှ်တုဲ မပ္တံကဵု ကပေါတ်အရပ်စပ်မၞိဟ်တအ်၊...

0 Comments

Submit a Comment

Your email address will not be published. Required fields are marked *

This site uses Akismet to reduce spam. Learn how your comment data is processed.