ဂိတုဂျူလာၚ် စၟတ်တ္ၚဲ (၂) တုဲကၠုၚ်ဏံ ဒုဥက္ကဌဗော်ဍုၚ်မန်တၟိ NMSP နာဲအံၚ်မေန်၊ ကမ္မတဳရေၚ်တၠုၚ်ကေၚ်ကာဗဟဵု နာဲအံၚ်မ္ၚဵု၊ နာဲဗညာဆာန်နန်၊ ကမ္မတဳဗဟဵု နာဲ M သိုက်ဆာန်၊ နာဲကောန်သိုက် ကေုာံ သ္ကိုပ်ဂကောံရုၚ် နာဲဇြဝ်မေန်ဥူတံကဵု ဥက္ကဌကမ္မတဳပ္ညဳပ္ညပ်ဓမံက်ရုပ်ရဴ ပရေၚ်ၜိုဟ်လလမ် ကေုာံ ပရေၚ်ညဳသၟဟ်ကောန်ဂကူ
အလဵုအသဳပၞာန် NSPNC ဒုသ္ကိုပ်ပၞာန်ဇၞော်ယာပျေအ်၊ ညးအုပ်ကာ ဒုသ္ကိုပ်ပၞာန်ဇၞော် မေန်နာၚ် ကေုာံ ဂကောံကမ္မတဳပ္ညဳပ္ညပ်တံဝွံ နကဵုက္ဍိုပ်လိက် “ပရေၚ်ၜိုဟ်လလမ်” ဂှ် ဆဵုဂဗသဳကၠဳလဝ်ညးသ္ကံ ပ္ဍဲခဒံဇၞူ M Gallery မၞုံပ္ဍဲနေပျဳဒဝ်ရ။
ပေဲါဆဵုဂဗသဳကၠဳ ဗော်ဍုၚ်မန်တၟိ NMSP ကဵု ကမ္မတဳပ္ညဳပ္ညပ်ဓမံက်ရုပ်ရဴ ပရေၚ်ၜိုဟ်လလမ် ကေုာံ ပရေၚ်ညဳသၟဟ်ကောန်ဂကူအလဵုအသဳပၞာန် NSPNC အလန်ဏံဝွံ အပ္ဍဲပရေၚ်ဍုၚ်ကွာန်ကောန်ဍုၚ်အရၚ်သၟးဟွံသေၚ် အကြာဂကောံဇြဟတ်ဒဳမဝ်ကရေဇြဳတံလေဝ် သကဵုဒှ်အရာ ဒးပ္တိတ်တၚ်သၟာန်ရ။ ဗွဲတၟေၚ်မ္ဂး အခိၚ်ကၠာဟွံဂွံဆဵုဂဗဏီဏံ အပ္ဍဲဒေသကၞောတ်ၜဳရေဝ် တိဍာ်ဗော်ဍုၚ်မန်တၟိထိၚ်ဒဝ်ဂှ် အကာဲအရာ ဗ္တိုက်ကဵုက္ၜၚ်ကျာနွံမံၚ်ဏံဂှ်မ္ဂး လ္တူသွဟ် ကေုာံ တၚ်ရန်တၟံ ပေဲါဆဵုဂဗဂှ် သာတုဲဒးပ္တိတ်တၚ်သၟာန်ရ။
အကာဲအရာဇြဟတ်ဓရိုဟ်ပၞာန် ဆက်တန်တဴမံၚ်ဏံဂှ်ဝွံ သဇိုၚ်ဓဝ်ပတှေ် သွက်ပရေၚ်သဳကၠဳဂှ်မ္ဂး သကဵုဇြဟတ်ဍိုန်လျအာရ။ နကဵုဗော်ဍုၚ်မန်တၟိဝွံ ပွမဆဵုဂဗမံၚ်ကဵု အလဵုအသဳပၞာန်တံ အကြာဇြဟတ်ဓရိုဟ်ပရေၚ်ပၞာန်ဏံဂှ် သွက်ဂွံစဵုဒၞာ ညးဒေသ/ညးဍုၚ်ကွာန်၊ သ္ဂောံဖအောန်ဖျေံပရေၚ်ကြံၚ်မ္ၚိုဟ်ပၞာန် ကေုာံ နကဵုဆန္ဒမိက်ဂွံပံက်လဝ် ဂၠံၚ်ဍာန်ပရေၚ်ဍုၚ်ကွာန်တုဲ ဆဵုဂဗလေဝ် ဒှ်မာန်ရ။ ၜိုန်ဂှ်ကီုလေဝ် သွက်ဂွံပတှေ်ဖျေံစိုတ် ပေဲါဆဵုဂဗသဳကၠဳမွဲမာန်ဂှ်မ္ဂး အောန်အိုတ်တၚ်ဆဵုညာတ်တံဂှ် ပွမဖအောန်ဖျေံ ပရေၚ်ကြံၚ်မ္ၚိုဟ်ပၞာန်၊ ပွမဒေံါ ပရေၚ်ကဵုဇြဟတ်ဓရိုဟ် လ္တူညးမဆေၚ်စပ်ဂမၠိုၚ် ကေုာံ ကောန်ညးဍုၚ်ကွာန်ဂမၠိုၚ်၊ ကိစ္စကၠောန်သ္ပရေၚ်တၠုၚ်နတဲ သ္ဂောံဒက်ပ္တန်ဓဝ်ပတှေ် ဂတးဂတန်ရေၚ်သ္ကံ ဂွံမက်ကၠုၚ် မဒှ်ရ။ စၞးဂှ်ဝွံ ပရေၚ်ရေၚ်တၠုၚ်ချဳဓရာၚ်ပၞာန်မၠိုၚ် ဆက်ကတဵုဒှ်မံၚ်မ္ဂး ပေဲါသဳကၠဳဂမၠိုၚ်ဂှ်ဝွံ လ္တူပရေၚ်ၜိုဟ်လလမ်ဂှ် ဒးဒုၚ်စကာဒၟံၚ် သွက်ဖန်ဗဒှ်သၞိၚ်ရုပ်ကဵု ပရေၚ်ဗဗွဲဓဝ် အတိုၚ်ပရေၚ်ဍုၚ်ကွာန်ဟေၚ် ဒှ်မာန်ရ။
နကဵုဗော်ဍုၚ်မန်တၟိဝွံ ပရေၚ်ဆဵုဂဗသဳကၠဳ ကုအလဵုအသဳပၞာန်ဂှ် အခေါၚ်ကၠောန်သ္ပနွံကီုလေဝ် ပရေၚ်ဇြဟတ်ဓရိုဟ်ပၞာန် ဟွံဒေံါဇူဏီမွဲသာ် ပ္ဍဲကဵုအကာဲအရာ လဂံါဇိုၚ် ဒက်ပ္တန်ဓဝ်ပတှေ် နတဲဟွံမာန်ဏီဏံ ပွမဆဵုဂဗသဳကၠဳဂှ်ဝွံ လ္တူပရေၚ်ၜိုဟ်လလမ်ဂှ် ဘဲအန္တရာဲဒးဒုၚ်စကာ နဒဒှ်သၞိၚ်ရုပ် သ္ဂောံဖန်ဗဒှ်ကဵု ပရေၚ်ဗဗွဲဓဝ် အတိုၚ်ပရေၚ်ဍုၚ်ကွာန်ဂှ် သ္ပထောံမဇ္ဇျဟ်ဟွံထေက်ရ။ ပေဲါဆဵုဂဗသဳကၠဳ ပရေၚ်ၜိုဟ်လလမ်ဍာံပြဂှ်ဝွံ ၜိုတ်ဂဇံသဳကၠဳပ္ဍဲဝိုၚ်သၟးဂှ် ဟွံရုံဂပ်ရ။ ပွမဗ္တိုက်ကဵုက္ၜၚ်ကျာ သကဵုပရေၚ်ဓဝ်ပတှေ်လီုဂှ်ကီု၊ ဇြဟတ်ဂရိုဟ်ပၞာန်ဂမၠိုၚ်ကီု ကေုာံ ပရေၚ်ရပ်စပ်ဂမၠိုၚ်ဂှ်ကီု ဒေံါထောံဟေၚ် ပေဲါသဳကၠဳဂမၠိုၚ်ဂှ် အဓိပ္ပါယ်နွံရ။
ယဝ်သာ်ဂှ်ဟွံသေၚ်မ္ဂး ပရေၚ်ဆဵုဂဗသဳကၠဳဂမၠိုၚ်ဂှ်ဝွံ လ္တူတၚ်စၟဳပရေၚ်ၜိုဟ်လလမ်ဂှ် နဒဒှ်အစဳဇန် ဒးဒုၚ်စကာ အတိုၚ်ပရေၚ်ဍုၚ်ကွာန်မွဲဟေၚ် ဒးဒုၚ်ညာတ်ကေတ်မာန်ရ။ အပ္ဍဲစဳဇန် (၁၀၀) တ္ၚဲ အလဵုအသဳပၞာန်လၟုဟ်ဏံ သွက်ဂွံကၠောန်သ္ပရေၚ်တၠုၚ် ပရေၚ်ၜိုဟ်လလမ်ဂှ် သၟာၚ်နူဟွံစှေ်နတဲတုဲ စေတနာလေဝ် ဟွံဍာံပြရ။
ပြဒ္ဒညာပၞာန်အပ္ဍဲဍုၚ် ကတဵုဒှ်မံၚ် တ္ၚဲဏံဂှ်ဝွံ ဟိုတ်နူပရေၚ်ဍုၚ်ကွာန်ဟေၚ်ရ။ ပြဒ္ဒညာပရေၚ်ဍုၚ်ကွာန် ကိစ္စဒးပသောၚ်အဓိကဂှ် အလဵုအသဳပၞာန်တၟာတ်လဝ်ဂှ်ရ ပရေၚ်ၜိုဟ်လလမ် ညးဍုၚ်ကွာန်တံစၟဳလဝ်ဂှ် ကလိဂွံဟွံမာန်ရ။