ဟိုတ်နူလိၚ်မၞိဟ်ဗတမ်မဝါတ်စှေ်ကၠုၚ်ဂှ်တုဲ တၠဝါဗ္ၚတအ် ကၠောန်သြောံဗတမ် အောန်စှေ်ကၠုၚ်ရောၚ် တၠဝါဗ္ၚတအ် ဟီုရ။
စိုပ်အခိၚ်ဗတမ်မဏံမ္ဂး ဇၟာပ်သၞာံဂှ် တၠဝါဗ္ၚဂမၠိုၚ်တအ် ဒှ်တၚ်ကော်ဆဴကဵု ဂၠာဲလိၚ်မၞိဟ်ဗတမ်မဝါတ်ဒၟံၚ်ဂှ်တုဲ လၟုဟ်မ္ဂး တိခံက်သြောံဗတမ်ကေတ်ဂှ် အောန်စှေ်ဒၟံၚ်သိုက်သိုက်ယျရောၚ် တၠဝါဗ္ၚ နာဲသာန်ခေန် နူပွိုၚ်ဍုၚ်ဇြပ်ဗု ဟီုသာ်ဝွံရ။
“ဠတေံတှေ် စိုပ်အခိၚ်ဗတမ်ဏံ ဗီုလၟုဟ်ဏံတှေ် ပ္ဍဲခံက်ဝါတေံ မၞိဟ်ဂၠိုၚ်မံၚ်ဒှ်ဗီုသဘၚ်၊ လၟုဟ်တှေ် ဂၠာဲမၞိဟ်လိၚ်ဗတမ်မ ဟွံလောဲရ၊ တုဲကၠုၚ်ပန်မသုန်သၞာံတေံတှေ် လိၚ်သၟာကမၠောန်ဆုဲပြံၚ်တအ်ဂွံမံၚ်ဏီ၊ လက္ကရဴဏံတှေ် လိၚ်ကော်ဍေံတအ်လေဝ် ဟွံလောဲရ၊ အတိုၚ်လိၚ်မၞိဟ်ဝါတ်မံၚ်ဏံတှေ် တိခံက်ဂြာတ်ကေတ်ဂွံဂှ်တှေ် ဂြာတ်ကေတ်အတိုၚ်ဂှ်ရ၊ တိခံက်ဒးဗတမ်ကေတ်တွဵုဂှ်မှ ဒိုအ်ဟွံဂွံဂှ်ရ ဗတမ်ကေတ်၊ လၟုဟ်တှေ် ဇၟာပ်ဝါရ တိခံက်ဗတမ်ဂှ် အောန်စှေ်အာအိုတ်ရ” သာ်ဝွံ တၠဝါဂှ် ဟီုရ။
လၟုဟ်မ္ဂး သ္ပဟိုတ်နူကဵု ဂၠာဲကောန်ကမၠောန်လိၚ်ဗတမ်မ ဝါတ်ကၠုၚ်ဂှ်တုဲ တိခံက်ဍာ်ဒမျိုဟ် ဒးဗတမ်တွဵုဂှ်ဟေၚ် ဗက်ကော်ကော်မၞိဟ်အကြာဇကုဇကု ဗတမ်ကေတ်ဒၟံၚ်တုဲ တိခံက်ဂြာတ်ကေတ်ဂွံဗွဲမဂၠိုၚ်တအ်ဂှ် ဂြာတ်စုတ်ဏာအတိုၚ်ဂှ်နွံဂၠိုၚ်ရ။
“ကၠောန်သြောံလၟုဟ်ဂှ် ကၠောန်အရၚ်သြောံဂွံပဵုတိုန်ဟွံသေၚ်ရ၊ ခရိတ်ကောန်ကမၠောန်ဂှ်က္ဍၚ်တိုန်ကီု၊ ခရိတ်ဝါဲဂှ်လေဝ် သ္ပဟွံမာန်ဂှ်ကီု၊ ဂၠာဲရဲဗတမ်မဝါတ်တိုန်တုဲ ခံက်ဂြာတ်ကေတ်ဂွံဂှ် ဂြာတ်စုတ်ဏာအတိုၚ်ဂှ်၊ ဇှ်ရ သြောံဂွံပဵုတိုန်ဂှ် လ္ပဟီု တိဝါဇကု ညံၚ်ဟွံဂွံလီု ညံၚ်ဟွံဂွံဒးထောံစွံလဝ်ဂှ်ရ ထိၚ်တုဲတှေ် ဆက်ကၠောန်မံၚ်၊ ဂွံသ္ပပရေၚ်ပိုန်ဒြပ်တုဲတှေ် ဂစာန်ကၠောန်ဗ္ၚဂှ် ဟွံသေၚ်ရ” သာ်ဝွံ တၠဝါဗ္ၚ နာဲဒေံ နူဍုၚ်ကၟာဝက်ဂှ် ဟီုပၠန်ရ။
သြောံသ္ၚုဂှ် ၜိုန်ရပၟိက်ကိစ္စ သွက်ဍုၚ် သွက်မၞိဟ်တအ် အဓိကမွဲကီုလေဝ် သွက်တိဝါဗ္ၚ ဂွံဇၞော်မောဝ် ဂွံတောတက်ဂှ် အလဵုအသဳအုပ်ဓုပ်ဍုၚ် ခေတ်အဆက်ဆက်တအ် ပရေၚ်မၚ်မွဲထ္ၜလဘာ်မၚ်မွဲရီုဗၚ် အောန်ဂှ်တုဲ တိဝါဗ္ၚ အကြာဍုၚ်၊ အကြာကွာန်တအ် ပြံၚ်သၠာဲဗီုတုဲ ဒှ်အာဂအာၚ်ကၠအ်သ္ၚိကီု၊ ထောံလသာလဝ်လအ်လတုဲ တိဝါလီုလာ်အာ နွံဂၠိုၚ်ကွေံကွေံရ။
နကဵုစရၚ်ဗွဲအပြောံမ္ဂး အလုံတွဵုရးဍုၚ်မန်မွဲဂှ် တိဝါဗ ္ၚဗၞတ် (၇) ကိုဋ်ဨက ကၠောန်ပတိတ်ဒၟံၚ် သြောံ သ္ဂးလဝ်ကီုလေဝ် ပ္ဍဲဗလးတိဏံဍာံဍာံဂှ် တိဝါဗ္ၚ ထောံလသာလဝ် လီုလာ်ထောံလဝ် နွံဂၠိုၚ်ကွေံကွေံရောၚ်ဂှ်လေဝ် ဂွံတီကေတ်ရ။