ဌာန်ပရိုၚ်ဗၠးၜးမန် – ပ္ဍဲဂိတုမာတ်ချ် ၁၂၊ အခိၚ်သ္ဂာဗတံဂှ် ဖျာဇၞော် လဒေါဝ်ကွာန်အနေၚ် ပွိုၚ်ဍုၚ်ဇြပ်ဗု ပၟတ်တူအာဖအိုတ်တုဲ ဆောံလေၚ်ဗွဲမဂၠိုၚ်ရ။

အဃောဖျာကျာ်ကွာန်ဝၚ်က ပၟတ်တူလဝ်တေံ(Photo-IMNA)

ဆေၚ်ဖျာ ၂၈ ခန် ကေုာံ သ္ၚိ ၃ မ ပါအာ ပ္ဍဲပၟတ်တုဲ ဆိၚ်ဆကေတ် ၚုဟ်မး ချိုတ်ချိုတ်ပၠိုတ်ပၠိုတ် ဟွံမာန်ဏီကီုလေဝ် ၚုဟ်မး မၞုံလ္ၚီကိုဋ်ပြၚ်ပြၚ်ဏောၚ်ဂှ် တၠဂုဏ်စန္ဒ နူကွာန်အနေၚ်ဂှ် ဟီုရ။

“သ္ၚိနာဲမိုၚ်ယှိုဲ၊ နာဲထောန်မိုၚ်၊ ဣစဳမျ တံ ပါအာ ပ္ဍဲပၟတ်ဖအိုတ်၊ ကောန်ကွာန်တံ ပြာ်မာန်တုဲ ပၟတ်ဟွံကၠောံအာ သ္ၚိသကဲတံဂှ်ပုဟ်၊ ကွဳစက်ပလိုတ်ပၟတ် နူကွာန်တၞဟ်ဟ်တံလေဝ် စိုပ်ကၠုၚ်ကီု၊ မုပမာန်ရော၊ ပ္ဍဲကွာန်အနေၚ် ကွဳစက်ပလိုတ်ပၟတ် မွဲမလေဝ် ဟွံမွဲပုဟ်” သာ်ဝွံ တၠဂုဏ်စန္ဒ ဆက်ဟီုရ။

ပ္ဍဲကွာန်အနေၚ်ဂှ် သ္ၚိမၞုံၜိုတ် မွဲလ္ၚီပြၚ်တုဲ အပ္ဍဲပွိုၚ် ၅၀ သၞာံ ပၟတ်တူသာ်ဏံဂှ် ဒှ်အလန်ကၠာအိုတ်ရောၚ် ဂွံတီကေတ်ရ။

မုဟိုတ်ပၟတ်တူအာဂှ် ဟွံတီကေတ် ချိုတ်ချိုတ်ပၠိုတ်ပၠိုတ်ကီုလေဝ် ဂကောံအုပ်ဓုပ်ကွာန်တံ ဗက်ကံက်ကေတ်မံၚ်သြန် နူတၠဆေၚ်ဖျာ ဒးဒုၚ်တူအာတံ မွဲတၠ ပိလက်ဒကေဝ်ရောၚ်ဂှ် တၠဖျာ ဟွံမိက်ဓမံက်ယၟုမွဲတၠ ဟီုရ။

“မုလေဝ် ဟွံကဵုအရီုအဗၚ်မွဲသာ် ကံက်မံၚ်လှုဲ နူဆေၚ်တူအာပၟတ်တံဏီ။ ဍေံတံ တပ်ဒဏ်၊ ဂွိၚ်ဖေက် ဒးဒုၚ်စောဲ တူအာနူဆေၚ်ဇကုကၠာတုဲ ဒးကဵုထောံ” သာ်ဝွံ တၠဆေၚ်ဖျာဂှ် ဆက်ဟီုရ။

ဆေၚ်ဖျာတူအာတံဂှ် ညးသွံဖျာတံ သ္ပဒတဴ မံၚ်စံၚ်ဒၟံၚ် ညံၚ်ရဴသ္ၚိ သီုအိန်ထံၚ်ကောန်ဇာတ်ရ။

အကြာဂိတုဏံ ဆေၚ်ဖျာ အပ္ဍဲဍုၚ်ဗၟာ ဒေသနာနာတံဂှ် အခိၚ်ဗတမ် ပၟတ်တူမံၚ် မွဲနှေံမွဲနှေံတုဲ မုဟိုတ်ဂွံတူအာဂှ် ဓမံက်ပတိတ် ဟွံမာန်အိုတ်ရ။

တုပ်တဴသာ်ဂှ်ကီု ဂိတုကၠာ စၟတ်တ္ၚဲ ၂၈ တေံလေဝ် ဖျာကျာ် ကွာန်ဝၚ်က မၞုံဇရေၚ်ပယျဵု သေံ-ဗၟာဂှ် ပၟတ်တူအာတုဲ ဆောံလေၚ်အာ ၚုဟ်မး ဗွဲမဂၠိုၚ်ဂၠၚ်ရ။