စၠန်ထဝ် – ဖျာကျာ်ဝၚ်က မၞုံအပ္ဍဲကွာန်ဝၚ်က ပွိုၚ်ဍုၚ်သၚ်္ခလပူရီ ကရပ်ပယျဵုဍုၚ်ကျာ်ပိ ပၟတ်တူလီုလာ်လဝ်တံဂှ် လၟုဟ်သိုၚ်လဝ် ဆေၚ်ဖျာယာယီတုဲ ကလေၚ်စေဝ်ကၠုၚ်ကဵု ကၟုဲကၠုၚ်ဝေၚ် နူကဵုဍုၚ်သေံ ဒေသနာနာတံ ကီုရ။
ကၠာအတးဟွံဂွံစှေ်ဏီ ဂိတုအေပရေဝ် (၁၁) ဂှ် စပံက်ကၠုၚ် ဆေၚ်ဖျာကျာ်ဝၚ်ကယာယီ ဂတမုက်ဒၞာဲတူအာပၟတ် မဒှ်ဒၞာဲဇိုၚ်ကျာ်ဗုဒ္ဓဂါယာဂှ်တုဲ ကျာ်ဇၞော်ဝၚ်္က က္ဍိုက်က္ဍိုပ်သိုၚ်ဆေၚ်ဖျာ ကဵုအခေါၚ် သွံကပါတ်ဖျာနာနာတံရ။
“ကျာ်ဇၞော်ဏောဝ် ကဵုအခေါၚ်သိုၚ်လဝ်ကဵု၊ ယာယီရလေဝ်၊ အခိၚ်လဵုမှ ဂွံသိုၚ်ဖျာတၟိဂှ် ဟွံတီဏီပုဟ်၊ လၟုဟ် အဃောအတးသၚ်္ကြန်ဏံ မၞိဟ်ကၠုၚ်ရာန် ဂၠိုၚ်မံၚ်တှေ် ဍေံပြေပြံၚ်မံၚ်ညိညကီုရ” သာ်ဝွံ တၠဆေၚ်ဖျာ နာဲပါဝါ ဟီုလဴကဵုရ။
သွက်ဂွံကလေၚ်သိုၚ်ခၞံ ဆေၚ်ဖျာတၟိဂှ် နူကဵုအလဵုအသဳသေံ ဌာနပဂဵုလဟဵုဍုၚ်ကွာန်တံ အာတ်အခေါၚ်သိုၚ် ကုကျာ်ဇၞော်ဝၚ်ကကီုလေဝ် ဟွံဂွံအခေါၚ်ရောၚ် ဂွံတီကေတ်ရ။
“တိကွာန်ဏံဂှ် ဒှ်တိဘာလကျာ်ဖအိုတ်ဏောဝ် ဟိုတ်ဂှ်ရ ညးအလဵုမွဲလေဝ် ကၠုၚ်သိုၚ်ကဵု ဒၞာဲမံၚ်တံ ဟွံဂွံပုဟ်၊ လၟုဟ်ပိုဲ ဂွံသွံဖျာယာယီ ဗီုဏံဂှ် ကျာ်ဇၞော်ဝၚ်ကလၟုဟ် စဳဇန်လဝ်ကဵုဏောဝ်” သာ်ဝွံ တၠဆေၚ်ဖျာမွဲတၠ ဟီုရ။
တၠဆေၚ်ဖျာတံ ဂွံကလေၚ်သွံဖျာ ကပေါတ်နာနာမာန်ဂှ် ဒးဒလေံလဝ်သြန် နကဵုအိက်သြန်ကီု၊ ယဝ်ရ ကၟုဲအာကၠုၚ် ရာန်ကပါတ်ဖျာတံ ဟွံမွဲမ္ဂး သွက်သ္ဂောံကလေၚ်လေဲအိက်သြန်တံဂှ် ဒှ်အခက်အခုဲမာန်ရောၚ် ညးဗ္ဒဗ္ဒာဲမံၚ်ကဵု ဆေၚ်ဖျာမွဲတၠ ဟီုရ။
“ပိုဲဂွံကလေၚ်ပံက်ဖျာဏံမာန်ဂှ် ဒးဒလေံလဝ်သြန် ၅ ကိုဋ်ၜါတ်ဏီ၊ ပၟတ်တူအာတုဲဂှ် နူကဵုအလဵုအသဳသေံတံ ထံက်ပၚ်ကဵုလဝ် သြန် မွဲလ္ၚဳၜါတ်ကဵု ခံက်ဆဲ (မမ) မွဲပါကေန်ဓဝ်ရ၊ ပဲါနူဂှ် မုလေဝ်ဟွံဂွံလဝ်ပုဟ်၊ အတးတုဲ ကၟုဲတံ ဟွံကၠုၚ်ရပုဟ်တှေ် ဂွံကလေၚ်လေဲအိက်သြန်ဂှ် ဇြိုၚ်မံၚ်စိုတ်ဏောဝ်” သာ်ဝွံ ညးဆက်ဟီုရ။
ဂိတုဖေဖဝ်ဝါရီ ၂၈ တုဲကၠုၚ်တေံ ဇၟာပ်သၞာံ အဃောကၠောန်ဗဒှ်မံၚ် ပေဲါသဘၚ်ကျာ်ဝၚ်္ကဂှ် ပၟာတ်တူအာတုဲ ဗဒမ်ဆေၚ်ဖျာဖအိုတ် ၃၆ ခန် ပါအာ ပ္ဍဲပၟတ်ဖအိုတ်ရ။ ဟိုတ်နူပၟတ်တဴအာဂှ် သြန်သေံ ၜိုတ် (၇၀၀) ကိုဋ်ၜါတ် ဒးဆောံလေၚ်အာရောၚ် ညးမၞံုလျိုၚ်ဒေသတံ ဆေၚ်စလဝ်ရ။
ကျာ်စေတဳဗုဒ္ဓဂါယာ မဒှ်ဖျာကျာ်ပၟတ်တူအာလၟုဟ်ဝွံ သွံဒၟံၚ် ကပေါတ်ယေန်သၞာၚ်ကွတ်တဲ၊ မပ္တံကဵု ဗွိုက်လတက် ကောန်ဍုၚ်အရေၚ်၊ ကပေါတ်မဆေၚ်စပ်ကဵုကျာ် မကၠောန်လဝ် နကဵု ဒရိုတ်၊် သြန်၊ ကပေါတ်ကွိၚ်ကွိုက်၊ ကပေါတ်ပရိဘောဂ ကေုာံ ဂၠိုက်ယာတ် မၞံုကဵုၚုဟ်မးတံ ဗွဲမဂၠိုၚ်ဂၠေၚ် သွံဒၟံၚ်ရ။
အခိၚ်တေံ ယဝ်ရ နွံပၟိတ်ကပေါတ်ယေန်သၞာၚ် မွဲမွဲသာ်မ္ဂး အာကျာ်ဗုဒ္ဓဂါယာ ဒၞာဲအခန်ဖျာကျာ်ဂှ် အခိၚ်ဟွံရုဲ ရာန်ကေတ်မာန်မံၚ်တုဲ ဗီုကၠာကၠာတေံ စေဝ်ကၠုၚ်မံၚ်ဂှ် လၟုဟ် တၠဖျာတံ သွံဟွံမာန်အိုတ်ဏီရ။