မာံသုတ – အတိုၚ်ချိၚ်လဝ်ပ္ဍဲဂိတုဏံ သွက်ဂွံတက်ကျာပရေၚ်ၜိုဟ်လလောမ်ကဵု ဂကောံပအိုဝ် PNLO ဂှ် ဂကောံတက်ကျာပရေၚ်ဒေါအ်ပန်ပှော်အလဵုအသဳဗၟာတံ ဟွံဂွံချိၚ်ကဵုတ္ၚဲဏီရ။
ညးအုပ်ကာနာနာ PNLO ခေါန်မျေအ်ထောန်ဂှ် “နူဝါဒိတေံ ချိၚ်လဝ် ၜိုတ်အဒေါဝ်ဂိတုမေဏံ ညံၚ်ဂွံဆဵုဂဗတက်ကျာ ဟီုလဝ်ကၠာလေဝ် ရဲအလဵုအသဳဗၟာတံ ဟွံချိၚ်ကဵုတ္ၚဲဏီ” သာ်ဝွံ ညးတေံဟီုရ။
ကာလဝန်ဇၞော်ကွဳပၟတ် ဥူအံၚ်မေန် စဴကၠုၚ်နူဍုၚ်နဝ်ဝေ လုပ်ဇူပ္ဍဲဍုၚ်သေံ အပ္ဍဲဂိတုအေဗရဴ ၁၉ တေံဂှ် ဆဵုဂဗကုက္ဍိုပ်သ္ကိုပ် PNLO တံတုဲ သွက်ဂွံတက်ကျာပ္ဍဲဂိတုမေဏံဂှ် ဟီုဂးလဝ်ညးသ္ကံနွံရ။
“ပြဟ်ဟ်ဏံ ဂကောံဓမံက်ရုပ်ရဴပရေၚ်ၜိုဟ်လလောမ်အလဵုအသဳၜါဂကောံဂှ် ပံၚ်ထောံမွဲဂကောံရောၚ်၊ ညးလဵုပါလုပ်အပ္ဍဲဂကောံတၟိဏံဂှ် ဟွံဂွံတီချိုတ်ပၠိုတ်ဏီ၊ မွဲတၚ်ပၠန်ဂှ် တရဴဥူအံၚ်မေန်ဂှ် ချိၚ်လဝ်ဒၞာဲပေၚ်မံၚ်တုဲ ညးတေံဟွံသၠးဏီ” သာ်ဝွံ ညးရေၚ်တၠုၚ်ဖဵုပရေၚ်ၜိုဟ်လလောမ် ဥူညိုဝ်အုၚ်မျေအ် ဟီုရ။
တုပ်ကဵုသာ်ဂှ်ကီု သွက်ဂွံတက်ကျာကဵု ဂကောံ UNFC နွံမံၚ်ရောၚ် ၜိုန်ရဝန်ဇၞော်ဥူအံၚ်မေန် ဟီုဂးလဝ်နွံကၠာလေဝ် တ္ၚဲလဵုဂွံဆဵုဂဗညးသ္ကံမာန်ဂှ် ဟွံဂွံချိၚ်တ္ၚဲဏံ သာ်ဝွံ ဂွံတီနူ ဥူညိုဝ်အုၚ်မျေအ် ပၠန်ရ။
လောန်ကၠုၚ်စၟတ်တ္ၚဲ ရ (ဂိတုမေ) ဏံဂှ် ညးစၞးဂကောံအလဵုအသဳဗၟာ ဥူအံၚ်မေန်က္ဍိုက်ပ်တံ ကေတ်ဂွံတၚ်တုပ်စိုတ် ကဆံၚ်ကၟိုန်ဍုၚ်ကု ဗော်ပၠတရဴချေန် CNF တုဲ ကၠောန်သ္ပလဝ်အခန်ကၞာ ထပက်စၟတ်တဲ ပ္ဍဲဍုၚ်ဟာခါ၊ တ္ၚဲရးချေန်ရ။
ဝန်ဇၞော်ဥူအံၚ်မေန် ကေတ်လဝ်တာလျိုၚ် သွက်ဂွံတက်ကျာကဵု ဂကောံရပ်လွဟ်ကောန်ဍုၚ်အရၚ် (၆) ဂကောံဂှ် မပ္တံကဵု ကံၚ်ဇြဳကလေၚ်ဒက်ပ္တန်ဍုၚ်သေံဇၞော် RCSS/SSA၊ ဗော်တဴတက်ကရေၚ်ဍာဲ KNPP၊ ဗော်သွးကောန်ဂကူကရေၚ် KNU၊ ဗော်ဍုၚ်မန်တၟိ NMSP၊ ဗော်ပၠတရဴကောန်ဂကူချေန် CNF ၊ ဂဥုပ်ဗၠးၜးကောန်ဂကူပအိုဝ် PNLO တံရ။
အပ္ဍဲဂကောံရပ်လွဟ်ကောန်ဍုၚ်အရၚ် (၆) ဂကောံဂှ် နကဵုအလဵုအသဳကေတ်ဂွံတၚ်တုပ်စိုတ် ထပက်လဝ်စၟတ်တဲကဆံၚ်ကၟိန်ဍုၚ်(၅) ဂကောံနွံကၠုၚ်ကီုတုဲ သွက်ဂွံတက်ကျာပရေၚ်ဒေါအ်ပန်ပှော်ပဏာမ မွဲဂကောံပၠန်ဂှ် သှေ်ဆဂကောံ PNLO ဟေၚ်ရ။
အပ္ဍဲဂိတုဖေဖဝ်ဝါရဳ(၅) တုဲကၠုၚ်တေံ ဥက္ကဌ PNLO ခေါန်ဥက္ကာကဵု ဥူအံၚ်မေန်တံ ကာလဆဵုဂဗတက်လဝ်ကျာမွဲဝါဂှ် PNLO တံ ပ္တိုန်ထ္ၜးအာတ်မိက်လဝ်တၚ် (၁၁) တၚ်နွံရ။
“ပ္ဍဲ(၁၁)တၚ်ဂှ် တၚ်လ္ၚဵုလ္ၚဵုကဵုသ္ဂုတ်သွာတ်ဟွံမာန်ဏီတုဲ ဥူအံၚ်မေန်ထပ်ပ္တိုန်ကဵုသမ္မတဏောၚ်ဟီုလဝ်နွံ” သာ်ဝွံခေါန်မျေအ်ထောန် ဆက်ဟီုရ။
အပ္ဍဲတၚ်အာတ်မိက်လဝ်တံမ္ဂး သွက်ဂွံထပက်စၟတ်တဲပရေၚ်ဒေါအ်ပန်ပှော်ပဏာမ၊ နကဵုအလဵုအသဳညံၚ်ဂွံပတိတ်အမိၚ်လလောၚ်တြးဒေါအ်ပန်ပှော်အလုံဍုၚ်၊ ဒေါအ်ပန်ပှော်အိုတ်တုဲ ပွိုၚ်(၆၀)တ္ၚဲဂှ် ညံၚ်ဂွံတက်ကျာသဳကၠဳပရေၚ်ဍုၚ်ကွာန်ကဆံၚ်ကၟိန်ဍုၚ်တံပါလုပ်ရ။
အပ္ဍဲကၞောတ်သၞာံ ၂၀၁၁ တေံဂှ် ဝန်ဇၞော်ဥူအံၚ်မေန်ကဵု ဥက္ကဌ PNLO ခေါန်ဥက္ကာတံ ကေၚ်တက်ကၠုၚ်ကျာ ပ္ဍဲဍုၚ်သေံမွဲဒၞာဲတုဲ ပရေၚ်ဆက်သဳကၠဳတက်အာကျာပၠန်ဂှ် ဆက်က္တဵုဒှ်ကၠုၚ်ရ။
PNLO ဝွံ ပါ်တိတ်ကၠုၚ်နူ ဂကောံဗၠးၜးကောန်ဂကူတွဵုရးသေံဇၞော်တုဲ ချဳဒရာၚ်မံၚ်ပ္ဍဲ သၠုၚ်ကျာတွဵုရးသေံဇၞော်ရ။