မိလျးထဝ် – အ္စာဘာမန်ဂမၠိုၚ် မဗ္တောန်ဒၟံၚ်လိက်ပ္ဍဲဘာကောန်ဂကူမန် မတန်တဴဒၟံၚ် သၟဝ်တိဍာ်ဗော်ဍုၚ်မန်တၟိတံဂှ် ဟိုတ်နူဂွံသြန်ဂိတုအောန်လောန်တုဲ နွံပၟိက်မိက်သ္ဂောံ ထပဵုပတိုန်ကဵုသြန်ဂိတု သာ်ဝွံအ္စာဘာမန်တံ ဟီုရ။
ဟိုတ်နူသြန်ဂိတုအောန်လောန်တုဲ ဂၠာဲပကောံညးကၠောန်ကမၠောန်အ္စာဘာမန် ဝါတ်ဂါတ်ကၠုၚ်သၟးဟွံက အ္စာဘာတြေံလ္ၚဵုတံလေဝ် ဒေံါဇူထောံနွံကီု ညးသ္ဂးရ။
“သြန်ဂိတုဂှ်၂ -၃ ဂိတုမှ မွဲအလန်ဂွံဒုၚ်တဲ၊ လပါ်ညးဇၞော်ကွာန်တံဂှ် ထံက်ပၚ်ကဵုမံၚ်စရိတ်စမွဲဂိတုသြန်သေံ ၂၅၀ ၜါတ်ကဵု သ္ၚုမွဲစေဝ်၊ အပ္ဍဲမွဲဂိတု ညံၚ်ဂွံရုမ်ဂပ်အာဂှ်တှေ် ဒးစအာၜဵုၜဵုခရံက်ခရံက်ရလေဝ်” သာ်ဝွံ အ္စာၝောံကွာန်ပလိုၚ်ဂျပါန် မိပ္ကဴထဝ် ဟီုရ။
သွက်အ္စာဘာမန်တံဂှ် နူကဵုဌာနပရေၚ်ပညာကောန်ဂကူမန် ကဵုဒၟံၚ်အထံက်အပၚ် စနူသၞာံ ၂၀၁၁ တုဲကၠုၚ်ဂှ် သြန်ဂိတုသွက်မွဲဂိတု ၈၀၀ ၜါတ် ဂွံတီရ။
“နကဵုဌာနပညာဏံဂှ်တှေ် မိက်ဂွံထပဵုကဵုမံၚ် သြန်ဂိတုကဵု အ္စာဘာတံရ၊ တော်အာ မွဲဂိတု ၂ ဠက်ဒကေဝ်ဂှ် ဍေံအောန်မံၚ်အစောန်၊ ဆဂး ဟိုတ်နူတၠဒါန်အောန်မံၚ်တုဲ သြန်ဟွံရုမ်ဂပ်၊ နကဵုဌာနပိုဲလေဝ် ဂစာန်ဂၠာဲဒၟံၚ် တၠဒါန်ရ” သာ်ဝွံ ကမ္မတဳဌာနပရေၚ်ပညာကောန်ဂကူမန် အ္စာနာဲအာဲကောံ ဟီုလဴကဵုရ။
ဂိတုမာတ်ချ်သၞာံ ၂၀၁၃ တေံမ္ဂး သြန်ဂိတုသွက်အစာဘာမန်မွဲတၠ ၆၀၀၀၀ တြဴဠက်ဒကေဝ် ညံၚ်သ္ဂောံဂွံမာန်ဏောၚ် စဳဇန်လဝ်နွံ” သာ်ဝွံ အ္စာနာဲအာဲကောံ ဆက်ဟီုရ။
ဘာကောန်ဂကူမန်မၞုံ ပ္ဍဲပွိုၚ်ဍုၚ်ဇြပ်ဗု၊ မုဟ်ဍုၚ်၊ လှာဒကှ်၊ ကံကြိက်၊ ကျာ်မြဟ်၊ ဘာအၚ်တံ ဘာၜိုတ် ၁၄၅ ဘာတံဂှ် စနူသၞာံ ၂၀၁၂ ဏံ ပအပ်သၠောဲကဵုဏာ ကမ္မတဳပံၚ်ကောံလိခ်ပတ်ယေန်သၞာၚ်မန်(ဗဟဵု) အပ္ဍဲဍုၚ်ရ။
“နူကမ္မတီပရေၚ်ပညာကောန်ဂကူမန် ပအပ်ကဵုလဝ်ပိုဲတုဲ လၟုဟ်ဂွံကဵုသြန်ထံက်ပၚ် အစာဘာတံဂှ် ပ္ဍဲပိုဲလေဝ်ဒှ်မံၚ်အခက်အခုဲဖိုအ်ရ၊ ဂၠာဲမံၚ်နဲကဲအထံက်အပၚ်ဖိုအ်” သာ်ဝွံ ဥက္ကဌဂကောံပံၚ်ကောံ လိခ်ပတ်ယေန်သၞာၚ်မန်(ဗဟဵု) အစာသဝ်ဟံၚ်ဍုၚ် ဟီုလဴနၚ်ရ။
အစာဘာအလဵုအသဳတန်မူလမွဲမ္ဂး ဂွံဒၟံၚ်သြန်ဂိတု ပန်ဠက်ဒကေဝ်ဒှ်တုဲ ပ္ဍဲဒေသတၟေၚ်ပွိုၚ်ဍုၚ်ကျာ်ပိဂှ် စနူဂိတုအေဗရာတုဲကၠုၚ်ဏံ အလဵုအသဳထပဵုကဵုလဝ်သြန်ထံက်ပၚ်တၟေၚ် မွဲဂိတု (၁၁၀၀၀၀ိ) မွဲကိုဋ်မွဲဠက်ဒကေဝ်ပြၚ် ဂွံတိုန်ကၠုၚ်ဂွံတီရ။