ဇၟန်ဗၠဲ – သၟာဒယှေ်ဒွက် ယၟုဒယှ်တှ်ဒၟံၚ် အကြာပူရိသာတ်မန် “အဂ္ဂ”ဝွံ ဂိတုသေပ်တေန်ပါဏံမ္ဂး ပ္တိတ်ကဝး VCD ကာရာအဝ်ကေ “ပ္ကောံပ္ကေဝ်” နွံမံၚ်ရောၚ်ဂှ် ဂွံတီကေတ်ရ။
ဒါရိုက်တာကဝး VCD ကာရာအဝ်ကေဏံဝွံ JOE, YE HTUT, စၟဳဆာန် မဒှ်တုဲ ညးကုတ်ဆက်ဂှ် JOE, YAR ZAR, YE HTUT တအ်ရောၚ် ဂွံတီကေတ်ရ။
ယၟုဒွက်တအ်ဂှ် အတိုၚ်ဒွက်ပ္တိတ်လဝ် အဝ်ဒဳယဝ် (Audio) တုဲကၠုၚ်တေံ “ရံၚ်ဏး”၊ “ပ္ကောံပ္ကေဝ်”၊ “ဒၞာဲဝိညာဏ်ဗှေ်နွံ”၊ “မန်ဂၠးကဝ်”၊ “ဟွံထေက်ကဵုဆာန်”၊ “ဒေံါရကေတ်ရ” ကေုာံ သီုကဵုဒွက်တၞဟ်ဟ်တအ်လေဝ် ပါလုပ်ရ။
ကောန်သၟိၚ်ညးထ္ၜးရုပ် ပ္ဍဲကဝး VCD ကာရာအဝ်ကေ “ပ္ကောံပ္ကေဝ်” ဂှ်ဝွံ အဂ္ဂ၊ သူရိယမာဉ်၊ မာံသက္က၊ သစ္စံ၊ ဆန္ဒ၊ မာံဂူဂူ၊ မာံဝဳလျာန်၊ တပူ ကေုာံ ဒေဝဳ၊ အမ္မရ၊ မိနန္ဒာဆာန်၊ သဥ္ဇာနွယ်ဝၚ်း၊ စံရတီမိုးမြၚ့်၊ နှၚ်းထက်ထက်ဝေ၊ နန်းသူဇာ၊ မိစန္ဒီ၊ မိအိမ်ရတနာတအ် ပါလုပ်ရောၚ်ဂှ် ဂွံတီကေတ်ရ။
“ပိုဲဟီုမံၚ်လၟိုန်ရ အရေဝ်ဏံဂှ် ဂၠိုက်ဂၠာဲတၚ်ဝါတ်ဂါတ်ဒဒိုက်ပိုဲ လ္ပာ်လက်ကရဴတုဲ ‘လ္ပကဵုဒြဟတ်ကဵု ကဝးသဳဒဳဆာဲပ္တိတ်ဂှ်ညိ၊ ဘိုၚ်ကဵုဒြဟတ်ကဵု ကဝးဗဳသဳဒဳဇေတ်တ်ညိ’” သာ်ဝွံ စၟဳဆာန် အာတ်မိက်ဏာ ပုရိသာတ်တအ်ရ။
သၟာဒယှေ်ဒွက် အဂ္ဂဝွံ လုပ်စိုပ်ကၠုၚ် အပ္ဍဲလောကဂဳတဏံ ဂွံဗၞတ် (၅) သၞာံပြၚ်ၚ်တုဲ ပ္တိတ်ဂွံကဝး နကဵုယၟုကဝး “တ္ၚဲတၟိ”၊ “စောဲ”၊ “ပ္ကောံပ္ကေဝ်”ဏံမ္ဂး ပေၚ် (၃) ကဝးဒှ်တုဲ စပ်ကဵုဒွက်ဂကောံမ္ဂး ပါလုပ်ဒယှေ်ကၠုၚ် ဗၞတ် (၇) ကဝး နွံရောၚ် ဂွံတီကေတ်ရ။
“နူကဵု ဂကောံ Power Music ပိုဲလေဝ် ဂိတုဂတဏံ သွက်ဂွံပ္တိတ်ကဝး VCD ဂကောံလေဝ် နွံဏောၚ်။ ယၟုကဝးဂှ် ကဵုလဝ်ယၟုဂကောံ Power Music 2012’ ရ။ ပ္ဍဲကဝးဂှ်တှေ် သၟာဒယှေ်ဒွက် သစ္စံ၊ ဆန္ဒ၊ အမ္မရ၊ နရဳ၊ စန္ဒဳ၊ အးသြန် တအ် မဒှ်တုဲ အပ္ဍဲဂှ် ညးဗြဴ (၄)တၠ၊ ညးတြုံ (၂) တၠ ပါလုပ်ရ” သာ်ဝွံ စၟဳဆာန်ဆက်ဟီုရ။
ယၟုဒွက်ပ္ဍဲကဝး “ပါဝါ Music 2012” ဂှ်ဝွံ “ဗှေ်နွံမှ”၊ “သ္ၚောဲအာယျ”၊ “ကၠတ်ဆာန်”၊ “ပၟိက်ဟၟဲရ”၊ “ဆာန်မွဲဟေၚ်” ကေုာံ ဒွက်ဖအိုတ် ဗၞတ် (၁၄) ဒွက် ပါလုပ်ရောၚ် ဂွံတီကေတ်ရ။
ပ္ဍဲကဵုသၞာံ ၂၀၁၂ စိုပ်ဂိတုဝှ်တေံမ္ဂး နူကဵု သၟာဒယှေ်ဒွက် ကဏ္ဍ၊ ရူပါ၊ R-ထဝ် တအ်လေဝ် သွက်ဂွံပတိတ်ကဝး နွံမံၚ်ကီုဂးတုဲ စၟဳဆာန် ဒယှေ်လဝ် ဒွက်ဗၟာဂှ်လေဝ် ခြာဟွံလအ် တိတ်ဏောၚ် ဂွံတီကေတ်ရ။