မာံတဵုလွဳ – အစဳအဇန် က္ၜၚ်ကျာဂြိပ်တိုက်ရိုက် ဍုၚ်မတ်မလီုကဵု မာဲဆံက် ဍုၚ်သေံဂှ် ပရိုၚ်မံက်တိတ်ကၠုၚ်တုဲ ညးဍုၚ်ကွာန်မန်တံ စိုတ်လုပ်စ ဗွဲမလောန်အိုတ်ရ။
ပ္ဍဲဍုၚ်သေံဂှ် သၟာကမၠောန် ကောန်ဍုၚ်ဗၟာ မရပ်လဝ် လိက်တၞးတတ်ကၠောံဍုၚ် (ယာယဳ) နွံမံၚ် ဗွဲမဂၠိုၚ်တုဲ အခေါၚ်ဍိုက်က္ၜၚ်ကျာ မၞုံတဴဂှ်ရ အစဳအဇန် က္ၜၚ်ကျာဂြိပ်ဏံ ဒှ်ကၠုၚ်မ္ဂး သွက်ကောန်ဍုၚ်မန်တံ ပြေပြံၚ်ကၠုၚ်မာန်ရောၚ်ဂှ် မိနန္ဒာ မၞုံပ္ဍဲဇြူရာတ်ဌာနဳ ဍုၚ်သေံဂှ် ဟီုရ။
“ပ္ဍဲဍုၚ်သေံတှေ် နူဒၞာဲလဵုအာအာ ဂွံစိုပ်မာဲဆံက်ဂှ် ဒးဍိုက်ကာ မွဲဗတံရဏောၚ်၊ ယဝ်ရက္ၜၚ်ကျာဂြိပ် မာဲဆက်ကဵု မတ်မလီုတှေ် စိုပ်သ္ၚိပြဟ်ဟ်မာန်ဏောၚ်” သာ်ဝွံ ညးဟီုရ။
ဂၠံၚ်ဓရိပ်က္ၜၚ်ကျာဏံ ဒှ်ကၠုၚ်မ္ဂး သွက်ညးအာတရဴ၊ ညးကူသာန်သွံရာန်ဗၞိက်တံလေဝ် ပြေပြံၚ် ကၠုၚ်မာန်ရောၚ်ဂှ် ညးဆက်ဟီုရ။
“ပရေၚ်ပိုန်ဒြပ် တွဵုရးမန်ဂှ် ညိၚ်မံၚ်၊ နနဲကဲနာနာ အခေါၚ်အရာ ပရေၚ်ပိုန်ဒြပ် ဂွံဇွောဝ်လုပ်ကၠုၚ် ဍုၚ်မန်ဂှ် ပၟိက်ဇၞော်မံၚ်၊ ကာလဂှ်မှ ပရေၚ်ပိုန်ဒြပ် ဇၞော်မောဝ်တဴတက်ကၠုၚ်ဏောၚ်၊ လၟုဟ် ဂၠံၚ်ဓရိပ်က္ၜၚ်ကျာဏံ ဒှ်ကၠုၚ်ဂှ် သွက်ပရေၚ်အာတရဴကီု၊ သွက်ပရေၚ်ပိုန်ဒြပ်ကီု ခိုဟ်ကၠုၚ်မာန်ဏောၚ်” သာ်ဝွံ ဥူအံၚ်သူညိၚ် နူဂကောံဖောအ်ဗြေဝ်ဗဟု မဖျေံသဇိုၚ် ပ္ဍဲဍုၚ်ဇၚ်မာဲဂှ် ဟီုရ။
ဂၠံၚ်ဓရိပ်က္ၜၚ်ကျာတၟိ ဒွန်မံၚ်-မာဲဆံက်-မတ်မလီု ဂွံဓရိပ်ပြဟ်ပြဟ်မာန်ဂှ် ပ္ဍဲဂိတုသေပ်တေမ်ပါ ၂၉၊ ၃၀ ဏံမ္ဂး နူဂကောံဆက်စၠောံဗၞိက်/ပရေၚ်ကွတ်စက် သေံ-ဗၟာတံ ကၠုၚ်ပ္ညဳပ္ညပ်ကဵု အလဵုအသဳ တွဵုရးမန် သွက်သ္ဂောံဂွံအခေါၚ် က္ၜၚ်ကျာဍုၚ်သအာၚ်စှေ် ပ္ဍဲတွဵုရးမန် (CMQ) ရောၚ် ဂွံတီကေတ်ရ။
အစဳအဇန် ဂၠံၚ်ဓရိပ်က္ၜၚ်ကျာ မာဲဆံက်-မတ်မလီုဝွံ မဒှ်က္ၜၚ်ကျာဂျက် မပ္ဍိုက်ညးအာတရဴ ၃၄ တၠမာန်၊ အခိၚ်ဂြိပ် လအ်ပွိုၚ် ၂၅ မိနေတ်ဟေၚ်တုဲ ခရိတ်က္ၜၚ်ကျာ အိုတ် US$ 100 ရောၚ်ဂှ် ဓမံက်ထ္ၜးလဝ် ပ္ဍဲလိက်စၟတ်သမ္တီကောံဓရီု ဂကောံသၟာဗၞိက်ကေုာံ ပရေၚ်ကွတ်စက် သေံ-ဗၟာတံရ။
ပ္ဍဲလၟေၚ်တရဴဝွံ နူသၞေဟ်က္ၜၚ်ကျာ ဒွန်မံၚ်၊ မာဲဆံက် ဍုၚ်သေံ မွဲကဆံၚ် ကၠုၚ်စိုပ်ဍုၚ်မတ်မလီုတုဲ ရန်တၟံကဵု အခိၚ်ဂၠေံဂၠေံ ဂွံဂေတ်ဂ္ၚေၚ် အာကၠုၚ်မာန် ကျာ်ဣသိယဵုကေုာံ ဒၞာဲဒယှ်တှ်ပြာကဋ်ဂမၠိုၚ်ကီု၊ သီုဒၞာဲကောန်ဍုၚ်သအာၚ်တံ စိုတ်လုပ်စဂမၠိုၚ်ကီုတုဲ မ္ဒးစဳဇန် ဂၠံၚ်တရဴက္ၜၚ်ကျာဏံရောၚ်ဂှ် ဂွံတီကေတ်ရ။
ဂကောံဆက်စၠောံဗၞိက်/ပရေၚ်ကွတ်စက်တံဝွံ ပ္ဍဲဂိတုသေပ်တေမ်ပါ ၂၈ ဏံ နူကဵုမာဲဆံက် ကၠုၚ်စိုပ်ဍုၚ်မတ်မလီု နကဵုတရဴက္ၜၚ်ကျာရောၚ် မဒှ်တုဲ သွက်သ္ဂောံဂွံအခေါၚ် က္ၜၚ်ကျာစှေ် ပ္ဍဲသၞေဟ်က္ၜၚ်ကျာ မတ်မလီုဂှ် လဴလၟိၚ်လဝ်တုဲရောၚ်ဂှ်လေဝ် ဂွံတီကေတ် နူညးတာလျိုၚ် သၞေဟ်က္ၜၚ်ကျာမွဲတၠရ။
