ဌာန်ပရိုၚ်ဗၠးၜးမန် – စပ်ကဵုအကာဲအရာ ယဲကၠောံထၞာန် ပ္ဍဲပယျဵုသေံ-ဗၟာတုဲ ဂကောံသၟိၚ်ခရိုၚ်ကမ္မရဳ ဍိုက်က္ဍိုပ်တံဂှ် အခိၚ် နူဂယး နူတနေံဏံ ကၠုၚ်စၟဳစၟတ် ပ္ဍဲဒေသကျာ်ပိ၊ ပွိုၚ်ဍုၚ်သၚ်ခလပူရဳရောၚ် ဂွံတီကေတ် နူရုၚ်ကမ္မတဳ ပယျဵုသေံ-ဗၟာရ။
ကၠုၚ်စၟဳစၟတ် အကာဲအရာယဲကၠောံထၞာန် ကုကောန်ပၞာန်သေံ၊ ညးဒေသကေုာံ သၟာကမၠောန်ဆုဲပြံၚ် မၞုံပ္ဍဲပယျဵုသေံတံရောၚ် ဂွံတီကေတ်ရ။
“ဒေသကျာ်ပိဏံဂှ် ဇွဟ်အိက်ဂစေံ ဂၠိုၚ်မံၚ်။ ယဲဏံဂှ်လေဝ် ယဲကၠောံထၞာန်မွဲသာ်ကီု၊ တုဲပၠန် ယဲတၞဟ်တၞဟ်တံလေဝ် နွံမာန်မံၚ်၊ ကၠုၚ်စၟဳစၟတ် အကာဲအရာပရေၚ်ထတ်ယုက် ကောန်ပၞာန်သေံ၊ ညးဒေသ ဖျေံလဝ်သဇိုၚ် ပ္ဍဲပယျဵုဏံဏောၚ်” သာ်ဝွံ ညးတာလျိုၚ် နူရုၚ်ကမ္မတဳ ပယျဵုသေံ-ဗၟာ မွဲတၠ ဟီုရ။
ဂကောံစၟဳစၟတ်ယဲဏံဂှ် သၟိၚ်ခရိုၚ်ကမ္မရဳ န္ၚဲာဲဝါတ် ရေန်ဝါန်ထ (Nai Chaiwat Rinwantha) ကေုာံ ဒံက်တာ ပေန်ထက် သဳရိဝဏ္ဏရာန်သြန် နူဌာနဝန်ဇၞော် ပရေၚ်ထတ်ယုက်ခရိုၚ်တံ ဍိုက်က္ဍိုပ်အိုတ်ရ။
သအာၚ်နူဂှ်ပၠန် ကၠုၚ်စၟဳစၟတ်မံၚ် အကာဲအရာ ပရေၚ်ထတ်ယုက် ဗွိုၚ်ကမၠောန် ရုၚ်စက်ဒေသ ကျာ်ပိကေုာံ သၟာကမၠောန်ဗၟာတံကီုတုဲ ကုညးဟွံကိတ်ညဳကဵု သၞောဝ်ဥပဒေသေံတံဂှ် နူတနေံဏံ ဗဒေံါလဝ်ကမၠောန် မွဲချိုန်ခဏရောၚ် နာဲဝေဖျဵု ညးမချဳဒရာၚ် ပရေၚ်သၟာကမၠောန် ဒေသကျာ်ပိဂှ် ဟီုရ။
“ညးဇၞော်ခရိုၚ် ကၠုၚ်ဏောၚ် ဟီုတုဲ မၞိဟ်အာယုက် ၁၈ သၞာံ ဟွံပေၚ်တံဂှ် သေဌဳတံ ကဵုကလေၚ်စဴအာ လပါ်သြၚ်ဗၟာ၊ တ္ၚဲဂတတေံတှေ် ဆက်ကၠောန်ကမၠောန် ဂွံဟာ ဟွံဂွံဟာဂှ် ဟွံတီဏီပုဟ်” သာ်ဝွံ ညး ဟီုရ။
ဂကောံစၟဳစၟတ်တံဂှ် ကၠုၚ်သၟာန်သၟုက် အကာဲအရာ ကာဒ်သၟာကမၠောန်၊ အခိၚ်ကၠောန်ကမၠောန် ပွိုၚ်မွဲတ္ၚဲကေုာံ ပရေၚ်ရပ်စပ်သုၚ်စောဲဍာ်တံရောၚ်ဂှ်လေဝ် ညးဆက်ဟီုရ။
ပ္ဍဲဒေသကျာ်ပိ လပါ်သြၚ်သေံဂှ် မပ္တံကဵုရုၚ်စက်ဗွိုက်လတက်၊ ရုၚ်စက်ဇိၚ်ဒၞပ် မၞုံ ၄၀ ရုၚ်တုဲ သၟာက မၠောန် ကောန်ဍုၚ်ဗၟာ ၜိုတ်မွဲလက်တံ ကၠုၚ်စှေ်မံၚ်ကမၠောန် လပါ်သြၚ်သေံဂှ်ရ။
ဟိုတ်နူဟွံပြေပြံၚ် အကြာတၠကမၠောန်ကဵု သၟာကမၠောန် စပ်ကဵုပြသၞာ သၠုၚ်ကဵုၚုဟ်မးကမၠောန်၊ ၚုဟ်မးအခိၚ်အပဵု၊ ၚုဟ်မးဂိလေၚ်တံတုဲ သၞာံအာဏံ သၟာကမၠောန်တံ ထ္ၜးကၠုၚ်ဆန္ဒ မွဲနှေံမွဲနှေံရ။
