မာံသုတ – ပ္ဍဲကောံဓရီုကၠတ်ထဝ်ကောန်ဂကူ ဃောကၠောန်သ္ပမံၚ်ဏံဂှ် ပလီုထောံ သၞောဝ်ကောန်ဍုၚ်လၟုဟ်ထေက်ရောၚ် စပ်ကဵုဂလာန်ပတိုန်ထ္ၜးဂှ်တုဲ ညးစၞးကောန်ဍုၚ်အရၚ်တံ ဒစဵုဒစးဂှ်ရ စွံလဝ်ဆစၟတ်သမ္တီဟေၚ်ရောၚ်ဂှ် ကၠတ်ထဝ်ကောန်ဂကူ ဖျေံသ္ဂုတ်သွာတ် ပ္ဍဲဂိတုနဝ်ဝေမ်ပါ ၆ ဂှ်ရ။
အလဵုအသဳကၟိန်ဍုၚ်ဂှ် ဓဇက်သၞောဝ် ကောန်ဍုၚ်တၟိတုဲ သၞောဝ်ကောန်ဍုၚ်လၟုဟ် (သၞောဝ်ကၠတ်ထဝ်ညးဍုၚ်ကွာန် စၟတ်-၄ သၞာံ ၁၉၈၂) ဂှ် ပလီုထောံထေက်ရောၚ်ဂှ် ညးစၞးကၠတ်ထဝ်ကောန်ဂကူ နူဒေသဆန္ဒမာဲ စၟတ် (၇) ရးသေတ်ကာၚ် ဥူတေန်မျ နူဗော်ခိုၚ်ကၠိုက် ပတိုန်ထ္ၜးလဝ်ရ။
ကၠတ်ထဝ်ကောန်ဂကူ(Internet)
ပ္ဍဲတၚ်ပတိုန်ထ္ၜး ဒံက်တာဗညာအံၚ်မောဝ်ဂှ်မ္ဂး ပ္ဍဲသၞောဝ်ကောန်ဍုၚ်ဂှ် စၟတ်သမ္တီလဝ် ကောန်ဍုၚ် မဒှ်ကောန်ဍုၚ်အရၚ်၊ ကောန်ဍုၚ် ကောန်ဍုၚ်အရၚ်ဟွံသေၚ်၊ ကောန်ဍုၚ်ကၟုဲ၊ အခေါၚ်သ္ပကောန်ဍုၚ်တံ နွံတဴရောၚ်၊ သၞောဝ်ကောန်ဍုၚ် ခိုၚ်ခိုၚ်ကၠိုက်ကၠိုက် နွံမံၚ်ကီုလေဝ် ဟွံဒ္ဂေတ်ဗက်၊ စိုတ်ဓါတ် ကောန်ဍုၚ်အရၚ် ဟွံမွဲမ္ဂး အဝဵုအုပ်ဓုပ် ဆောံလေၚ်မာန်ရောၚ်ဂှ်လေဝ် ပါလုပ်ကီုရ။
တုပ်တဴသာ်ဂှ်ကီု ဥူကျဝ်ကျဝ်၊ ဥူခေန်မိုၚ်ဠာတ်၊ ဥူခေန်မိုၚ် ကော် ဥူအံၚ်ကျဝ်ဥူ၊ ဥူမိုၚ်အေထောန်၊ ဥူအုၚ်တေန် နူဗော်တဴတက်ကောန်ဍုၚ်အရၚ်ရခေၚ် ကေုာံ ဥူသာၚ်ပံၚ် နူဗော်ဒဳမဵုကရက်တေတ် ‘ဝ’ မဒှ်ညးစၞးကၠတ်ထဝ် ကောန်ဂကူတံဂှ်လေဝ် ဒစဵုဒစး ဂလာန်ပတိုန်ထ္ၜးဂှ်ကီုရ။
သၞောဝ်ကောန်ဍုၚ်ဂှ် ၜိုန်ရခိုဟ်မိုဟ်ဍိုက်ပေၚ်မံၚ်ကီုလေဝ် လအ်ကၠုၚ် ပွိုၚ် ၃၀ သၞာံဂှ်ရ ယဝ်ပလေဝ်ထောံ ဂလာန်ဝေါဟာ မကိတ်ညဳကဵုခေတ်မ္ဂး ပြေပြံၚ်ဂၠိုၚ်ကၠုၚ်ဏောၚ်ဂှ် ဥူမာန်ကာန်ညောအ် ကေုာံ ဥူမိုၚ်အေထောန် နူဗော်ခိုၚ်ကၠိုက်တံ ပတိုန်ထ္ၜးအိုတ်ရ။
ပ္ဍဲလိက်ပရိုၚ်ဗၟာ (ကြေးမုံ) မပ္တိတ်လဝ် ပ္ဍဲဂိတုနဝ်ဝေမ်ပါ ရ ဂှ်မ္ဂး နကဵုက္ဍိုပ်လိက် “ပ္ဍဲသၞောဝ်ကောန်ဍုၚ်ဗၟာ သၞာံ ၁၉၈၂ ဂှ် အခန်လဵု၊ ပိုဒ်ဇၞော်လဵု ဍိုန်လျမံၚ်တုဲ ထေက်ကဵုဒးပလေဝ်ရောဂှ် ထံက်ထ္ၜးဗွဲမချိုတ်ပၠိုတ်ထေက်” ချူလဝ် ပရူသဳကၠဳလဝ်လတူဂှ်ရ။
နူကဵုကၟိန်ဍုၚ် ကာလကၠောန်လိက်စၟတ်သမ္တီကောန်ဍုၚ် ကေုာံ ကံက်စရၚ်ကၟိန်သ္ၚိ ကောန်ဍုၚ်အရၚ်တံမ္ဂး အခိၚ်ချုပၠုပ်ယၟု ကောန်ဍုၚ်အရၚ်ဂှ် ညံၚ်ဟွံဂွံဗၠေတ်ဗၠေၚ်ယောၚ်ယာ ပံၚ်တောဲကဵု ဂကောံကောန်ဍုၚ်အရၚ်ဒေသတံ ပါလုပ်တုဲ ရေၚ်တၠုၚ်ဖန်ဇန်ကဵုညိဂှ် ဥူသဝ်မျထောန် ညးစၞးကၠတ်ထဝ်ကောန်ဂကူ တွဵုရးကရေၚ် ပတိုန်ထ္ၜးလဝ်ဂလာန် ပ္ဍဲကောံဓရီုကၠတ်ထဝ် စၟတ်တ္ၚဲ ၆ ဂှ်ကီုရ။
