မာံသုတ – ၝောံမၞိဟ်ကွာန်၊ အရာပ် ပ္ဍဲပွိုၚ်ဍုၚ်ဇြပ်ဗုတံဂှ် ဒှ်မံၚ်ဥက္ကဋ္ဌ လက်ထက်အလဵုအသဳပၞာန် နအဖဟေၚ်တုဲ ပရေၚ်ပြံၚ်လှာဲဒၞာဲ ဟွံမွဲဏံရောၚ် ဂွံတီကေတ်ရ။
ပ္ဍဲပွိုၚ်ဍုၚ်ဇြပ်ဗုဂှ် အရာပ်၊ ကွာန် မၞုံ ၄၁ တုဲ ကြဴနူအလဵုအသဳ သမတဥူတိၚ်သိၚ် တိုန်ကၠုၚ်ဏံဂှ် ပြံၚ်လှာဲကၠုၚ် ၝောံမၞိဟ် အရာပ်၊ ကွာန် ဆၜိုတ် ရ တၠဟေၚ်ရောၚ်ဂှ် တခဳနူရုၚ်အုပ်ဓုပ်နာနာပွိုၚ်ဍုၚ် ဟီုရ။
ဇြပ်ဍုၚ်ဇြပ်ဗု(TBZY-Facebook)
ကြဴနူအလဵုအသဳတၟိ တိုန်ကၠုၚ်တုဲ အပ္ဍဲပွိုၚ်ဍုၚ်ဇြပ်ဗုမ္ဂး အရာပ်အံၚ်သာယျာ၊ ကွာန်အနေၚ်၊ ဝါဂၠံၚ်၊ ပ္ၚ၊ ဖံၚ်စိၚ်၊ သၞေဟ်ကိုၚ်၊ ကြုၚ်ကြုက်တံဟေၚ် ၝောံမၞိဟ် ပြံၚ်လှာဲကၠုၚ်ရ။
တုပ်တဴသာ်ဂှ်ကီု ပ္ဍဲပွိုၚ်ဍုၚ်မုဟ်ဍုၚ်၊ ရေဝ်တံလေဝ် ညိညဟေၚ် ပြံၚ်လှာဲကၠုၚ် ၝောံမၞိဟ်ရောၚ် ဂွံတီကေတ်ရ။
“အလဵုအသဳတၟိ တိုန်ကၠုၚ်တုဲ ဒၞာဲလ္ၚဵုပရေၚ်ပြံၚ်လှာဲ နွံကၠုၚ်ကီုလေဝ် ဥက္ကဋ္ဌကွာန် လပါ်ပိုဲဂှ် သဇိုၚ်ဍေံခိုၚ်ကွေံကွေံ။ ဍေံတံဂှ် ဒၞာဲပြံၚ်လှာဲ ဟွံမွဲဏီပုဟ်။ ဗိုန်မံၚ်ဖိုဟ်” သာ်ဝွံ ညးစၞးကၠတ်ထဝ် နူပွိုၚ်ဍုၚ်ဇြပ်ဗုမွဲတၠ ဟီုရ။
ကြဴနူအလဵုအသဳတၟိ တိုန်ကၠုၚ်တုဲ ပ္ဍဲဂိတုဖေဖဝ်ဝါရဳ ၂၄၊ သၞာံ ၂၀၁၂ ဂှ် သမတ ဥူတိၚ်သိၚ် ထပက်စၟတ်တဲတုဲ သ္ပဒတန်ကၠုၚ်ကဵု သၞောဝ်ဥပဒေ အုပ်ဓုပ်အရာပ်၊ ကွာန်တံရ။
အတိုၚ်သၞောဝ်ဂှ်မ္ဂး ၝောံမၞိဟ်ကွာန်၊ အရာပ်မွဲတၠမ္ဂး ဂွံသြန်ထံက်ပၚ် မွဲဂိတု ရ ဠက်ဒကေဝ်တုဲ ဖျေံကဵုလဝ် သြန်ခရိတ်ရုၚ် မွဲဂိတု ၅ ဠက်ဒကေဝ်ရ။
ၝောံမၞိဟ်ကွာန်၊ အရာပ်မွဲတၠဂှ် ဒးပေၚ်အာယုက် ၂၅ သၞာံတုဲ ဒးဍိုက်ပေၚ်ကဵုလက်သဏ် ညးဂမၠိုၚ်လျုၚ်ပတှေ်၊ ဟွံဒှ်ညးဒုၚ်ကာအလဵုအသဳ၊ ဟွံဒှ်ကောန်ဂကောံရပ်လွဟ် (ဟွံသေၚ်) ဟွံဒှ်ညးမဆက်ဆောံကဵု ဂကောံဟွံဗဗွဲဓဝ်တံရောၚ် ဖျေံသ္ဂုတ်လဝ်ရ။
ကာလရုဲစှ် ၝောံမၞိဟ်အရာပ်၊ ကွာန်တံဂှ်မ္ဂး မိမညးဍုၚ်ကွာန် မဆေၚ်စပ် ၅ တၠ ဒးကောပ်ကာဲတုဲ မွဲအိန်ထံၚ် မွဲမာဲ ဒးကဵုမာဲပၞုက် သွက်ဂွံရုဲစှ် ၝောံဂကောံစှ်အိန်ထံၚ်ရ။ နူဂှ်မွဲကဆံၚ် ၝောံဂကောံစှ်အိန်ထံၚ်တံဂှ် ဒးဆက်ကလေၚ်ရုဲစှ် ၝောံမၞိဟ်ကွာန်၊ အရာပ်ဇကုတံရ။
နကဵုဌာနဝန်ဇၞော် ကာအပ္ဍဲဍုၚ် စၟတ်သမ္တီလဝ် ၝောံမၞိဟ်အရာပ်၊ ကွာန် နဒဒှ်ညးဒုၚ်ကာ သၟဝ်ဌာနဍိုက်က္ဍိုပ်အုပ်ဓုပ်နာနာ၊ ကဵုလဝ်သြန်ဂိတုတုဲ ကုသကိုပ်အုပ်ဓုပ် ပွိုၚ်ဍုၚ်တံဂှ်လေဝ် သၠုၚ်ကဵုလဝ်ကဆံၚ် သကိုပ်စၞောန်ပ္ညုၚ်လစှေ်ကီုရ။
