ဌာန်ပရိုၚ်ဗၠးၜးမန် – သွက်သ္ဂောံဒေံါကဵု ပေဲါပၞာန်မကတဵုဒှ်မံၚ် ပ္ဍဲဒေသကချေၚ် သကာတ်မြဟ်မံၚ်ဂှ် ကောန်ဍုၚ်အရၚ် မစိုပ်ဍုၚ်သေံတံ ထ္ၜးဆန္ဒဂတမုက် ရုၚ်ကလုတ်ဍုၚ်ဗၟာ မၞုံပ္ဍဲဍုၚ်ၜၚ်ကံက် ပ္ဍဲဂိတုဂျာန္နဝါရဳ ၁၁ အခိၚ်နူဂယး ၜိုတ် ၁၀ နာဍဳ နကဵုရမျာၚ်ကရေဲအိုတ်ရောၚ် ဂွံတီကေတ်ရ။
“သွက်ဂွံဒေံါကဵု ထပက်မံၚ်ပၞာန်ဒေသကချေၚ်၊ ဒှ်မာန်တှေ် ဒပ်ပၞာန်အလဵုအသဳသီုဖအိုတ် ညံၚ်သ္ဂောံရုပ်သီထောံ နူတွဵုရးကချေၚ်၊ ရုပ်သီကဵုတုဲတှေ် ညံၚ်သ္ဂောံဒှ်တက်ကျာသဳကၠဳ ပရေၚ်ဍုၚ်ကွာန် ပိုဲဓမံက်ဏာအဓိကရ” သာ်ဝွံ ညးဟီုရ။
နူပေဲါထ္ၜးဆန္ဒဝွံ အာတ်မိက်ဏာ အလဵုအသဳဗၟာ အတိုၚ်သၟဝ်ဏံရ။
နကဵုက္ၜၚ်ကျာပၞာန်ကေုာံ လွဟ်ဇၞော် ပန်ပှော်ဒၟံၚ် ဗဒိုပ်ညးဒဒိုက်တုဲ ဗတိုက်ဒၟံၚ် KIO/KIA ကေုာံ ကောန်အရာပ်ကချေၚ်တံဂှ် ညံၚ်သ္ဂောံဒေံါကဵု၊ ပွမကဵုမံၚ်ဇြဟတ်ဓရိုဟ် ကု KIO/KIA၊ ပွမဗတိုက်ဒၟံၚ် ဌာန်ဂအုပ်ညးတံဂှ် ညံၚ်သ္ဂောံဒေံါကဵုပြဟ်ပြဟ်၊ ညံၚ်သ္ဂောံကဵုအခေါၚ် ကုဂကောံဟွံသေၚ်ကဵု အလဵုအသဳ မၞုံအပ္ဍဲဒေသတံ ညံၚ်သ္ဂောံလုပ်တိတ် ကဵုအရီုအဗၚ် ဗၠးဗၠးၜးၜး အပ္ဍဲဗဒိုပ်ညးဒဒိုက်ကချေၚ်။
ကောန်ပၞာန်ဗၟာတံ ကလေၚ်စဴဌာန်ဒပ်ဇကုတုဲ ညံၚ်သ္ဂောံတက်ကျာသဳကၠဳ ပရေၚ်ဍုၚ်ကွာန် ကုဂကောံရပ်လွဟ် ကောန်ဍုၚ်အရၚ်ပြဟ်ပြဟ် မပ္တံသာ်ဝွံ ရပ်ပဝ်သတာတုဲ က္ညာၚ်ကရေဲအိုတ်ရောၚ် ညးဟီုရ။
သွက်သ္ဂောံဒေံါကဵု ပေဲါပၞာန်ကချေၚ်တုဲ ပ္ဍဲဂိတုဂျာန္နဝါရဳ ရ ဂှ်လေဝ် ကောန်ဍုၚ်အရၚ် မစိုပ်ဍုၚ်မလေဝ်ယှာ ၜိုတ် ၅၀၀ တၠတံ ထ္ၜးဆန္ဒ ဂတမုက်ရုၚ်ကလုတ်ဗၟာ အပ္ဍဲဍုၚ်မလေဝ်ယှာကီုရ။
တုပ်တဴသာ်ဂှ်ကီု ကောန်ဂကူကချေၚ် မဒှ်ဇာတိဍုၚ်ကြုက် ၜိုတ် ၈၀၀ တၠတံဂှ်လေဝ် ကောံကလောံ ပ္ဍဲပယျဵုကြုက်-ဗၟာအိုတ်တုဲ ညံၚ်အလဵုအသဳဗၟာတံ သ္ဂောံဒေံါကဵု ပရေၚ်ထပက်ဒၟံၚ်ပၞာန်ဂှ် သွက်သ္ဂောံထ္ၜးဆန္ဒ ဃောဂစာန်လုပ်ဒၟံၚ် ဍုၚ်လာၚ်ဇြာ ဗၠာဲသၟိၚ်ကြုက်တံ ကၟာတ်ပဒေံါထောံရောၚ်ဂှ် ဂွံဆဵုကေတ် ပ္ဍဲမုက်လိက်ပရိုၚ်အိုတ်ရ။
ပ္ဍဲဂိတုဂျာန္နဝါရီ ၁၀ မဒှ်တ္ၚဲတွဵုရးကချေၚ် မရနုက်ကဵု ၆၅ ဝါဂှ်လေဝ် သွက်ၜိုဟ်လလမ် တွဵုရးကချေၚ် အာတ်အခေါၚ်ကွာ်ရေၚ် ပ္ဍဲဗဒိုပ်ဗၠာဲသၟိၚ် ပွိုၚ်ဍုၚ်မျေတ်ကျဳဏာကီုလေဝ် ဟွံဂွံအခေါၚ်ရောၚ် ဂွံတီကေတ်ရ။
ပ္ဍဲအခိၚ်ခရေတ်သမာတ်ဂှ် ဒပ်ပၞာန်အလဵုအသဳဗၟာတံ ပတေၚ်အသိၚ်ထပက်ပၞာန် နကဵုပၞာန်ကျာတုဲ ပ္ဍဲဂိတုဒဳဇြေမ်ပါ ၃၀ ဂှ် သီထောံဗဒိုပ်မုက်ပၞာန် KIA လဂျာယာန်ရောၚ်ဂှ် ဌာန်ပရိုၚ်ဂမၠိုၚ် ချူဓမံက်အိုတ်ရ။
ကံၚ်ဇြဳဖက်ဒရေဝ် ဂကူကောန်ဍုၚ်အရၚ်ညဳသၟဟ် UNFC မဒက်ပ္တန်လဝ် နကဵုဂကောံရပ်လွဟ်ကောန်ဍုၚ်အရၚ် ၁၁ ဂကောံ မပါလုပ်သီုဂကောံ KIO ဂှ် နူဂိတုဂျာန္နဝါရဳ ရ ကၠောန်ဗဒှ်ပေဲါကောံဓရီုသဳကၠဳ ဂကောံပေၚ် ၂ သၞာံတုဲ ယဝ်ရဒပ်ပၞာန်အလဵုအသဳဗၟာတံ ဆက်ထပက်ဒၟံၚ်ပၞာန် ဒေသကချေၚ်မ္ဂး သွက်သ္ဂောံဆက်ကၠောန်အာ မွဲနဲမွဲဗီုဂှ် ဖျေံကၠုၚ်လဝ်သ္ဂုတ်သွာတ်ရောၚ်ဂှ် ပ္ဍဲစၟတ်တ္ၚဲ ဂျာန္နဝါရဳ ၁၂ ဏံ UNFC ပတိတ်ကၠုၚ် လိက်လလောၚ်တြးရ။