ဌာန်ပရိုၚ်ဗၠးၜးမန် – အမာတ်ကလုတ် အမေရိကာန် မဆေၚ်စပ်ကဵုဍုၚ်ဗၟာ ဒေဝ်ရက်ခ်မေတ်ချေဝ်လ် ကေုာံ ဂကောံညးတံ ဆဵုဂဗကဵု ကျာ်ဇၞော်မန် မဒှ်ညးရေၚ်တၠုၚ်ဖဵု ပရေၚ်ၜိုဟ်လလမ် ပ္ဍဲဘာဗဂေါပရိယတ္တိ အရာပ်ကုန်သီ ဍုၚ်မတ်မလီု ပ္ဍဲဂိတုဂျာန္နဝါရဳ ၁၃ ဏံရ။
ဗီုစၟတ်သမ္တီ အမာတ်ဂလုတ်ဍုၚ်အမေရိကာန်ကဵု က္ဍိုပ်သ္ကိုပ်ပရေၚ်ဍုၚ်ကွာန်မန်
စပ်ကဵုပရေၚ်ချဳဒရာၚ် ခမဳသၚ်မန် လတူအကာဲအရာ ပရေၚ်ၜိုဟ်လလမ် မကတဵုဒှ်ဒၟံၚ်လၟုဟ်ဏံတုဲ အမာတ်ကလုတ် အမေရိကာန် ဒေဝ်ရက်ခ်မေတ်ချေဝ်လ် သၟာန်သၟုက်စကီုရောၚ်ဂှ် ကျာ်ဇၞော်အာစာ ဘာဟံသာထဝ် ဘဒ္ဒန္တ သဳလဝန္တ ဟီုရ။
“ဗော်ဍုၚ်မန်တၟိကဵု အလဵုအသဳဗၟာတံ ထပက်စၟတ်တဲ ကဆံၚ်တွဵုရး၊ ကဆံၚ်ကၟိန်ဍုၚ်ဂှ် ပိုဲတံလေဝ် ပါမံၚ်ကီုတုဲ အမာတ်ကလုတ် အမေရိကာန် သၟာန်စအကာဲအရာ ပရေၚ်ၜိုဟ်လလမ်တ္ၚဲဏံကီု၊ ပိုဲတံလေဝ် လက္ကရဴနူထပက်စၟတ်တဲတုဲဂှ် မုပရိုၚ်လေဝ် ဟွံဆက်မိၚ်ရပုဟ်။ ကဵုဥူအံၚ်မေန်လေဝ် ဟွံဂွံအဆက်ရပုဟ်ဂှ် ကလေၚ်လဴထ္ၜးဏာ” သာ်ဝွံ ကျာ်ဇၞော်ဟံသာထဝ် ဟီုရ။
သအာၚ်နူဂှ်ပၠန် အကာဲအရာ ပရေၚ်လိက်ပရိယတ် ခမဳသၚ်မန်၊ လၟိဟ်ဘာလကျာ်မန် ကေုာံ လၟိဟ်ခမဳသၚ်မန်တံလေဝ် အမာတ်ကလုတ် အမေရိကာန် သၟာန်သၟုက်စကီုရောၚ် ဂွံတီကေတ်ရ။
ပ္ဍဲဂိတုဂျာန္နဝါရဳ ၁၂ အခိၚ်ဗတမ်ဂှ်လေဝ် ပ္ဍဲဟဵုတေဝ်အတ္ထရံဂှ် ဆဵုဂဗသဳကၠဳကဵု ဥက္ကဋ္ဌ ဗော်ဒဳမဵုကရေဇြဳ အလုံရးမန် နာဲဇၞူမန်၊ ညးအုပ်ကာနာနာ ဗော်ဒဳမဝ်ကရေသဳမန် ဒံက်တာမေန်သဵုလေန်၊ ကေၚ်ကာဗဟဵု ဗော်ဍုၚ်မန်တၟိ နာဲတၠညးတံကီုရ။
ပ္ဍဲကာလဆဵုဂဗသဳကၠဳဂှ် နကဵုအမာတ်ကလုတ် အမေရိကာန် သၟာန်သၟုက်စ အကာဲအရာပရေၚ်ဗော်မန် ကေုာံ အကာဲအရာ ပရေၚ်ၜိုဟ်လလမ်ကီုရ။
ဗော်ပရေၚ်ဍုၚ်ကွာန်မန်တံဂှေ်လေဝ် ပတိုန်ထ္ၜး အကာဲအရာ ပရေၚ်ဒေသကချေၚ် ကတဵုဒှ်ဒၟံၚ် ပေဲါဗတိုက်လၟုဟ်ဂှ်တုဲ နကဵုအမာတ်ကလုတ် အမေရိကာန် ညံၚ်သ္ဂောံပါလုပ်ဘိုၚ်သောၚ်ကဵု ဗွဲမပြဟ်ညိဂှ် ဗတိုက်ဖအောဝ်ဏာကီုရောၚ် နာဲတၠညး ဟီုရ။
ပ္ဍဲရုၚ်ကလုတ် အမေရိကာန် မလလောၚ်ပ္တိတ်လဝ်ပရိုၚ် နကဵုစၟတ်တ္ၚဲ ဂျာန္နဝါရဳ ၁၀ ဂှ်မ္ဂး လၟေၚ်တရဴဏံဝွံ စၟဳကေတ်လဝ် သွက်သ္ဂောံသဳကၠဳအာ ကိစ္စညးမသ္ပဒတဴ ပ္ဍဲတွဵုရးမန်တံ ဒးဆဵုဂဗမံၚ်ဂမၠိုၚ်၊ ပရေၚ်ဒေံါပန်ပှော် အကြာဂကောံရပ်လွဟ် ကောန်ဍုၚ်အရၚ် ကေုာံ အလဵုအသဳဗၟာဂမၠိုၚ်၊ အကာဲအရာ ပရေၚ်ဍုၚ်ကွာန် ကတဵုဒှ်မံၚ်လၟုဟ်ဂမၠိုၚ် ပါလုပ်ရ။
ဒေဝ်ရက်ခ်မေတ်ချေဝ်လ်ဝွံ သ္ပပ္တမ်နူဂိတုဂျုန် သၞာံ ၂၀၁၂ ဂှ် စယိုက်ဂၠေၚ် ကေတ်တာလျိုၚ် နဒဒှ်အမာတ်ကလုတ် အမေရိကာန် စပ်ကဵုဍုၚ်ဗၟာတုဲ အာစိုပ်တွဵုရးယခေၚ် ဒၞာဲမကတဵုဒှ်မံၚ် ပရေၚ်ပကီုပရာပ်တံကီု၊ တွဵုရးကချေၚ် ဒၞာဲမကတဵုဒှ်မံၚ် ပေဲါဗတိုက်တံကီုတုဲ ကဵုကၠုၚ်အရီုအဗၚ် ကုဗဒိုပ်ညးဒဴဒဒိုက်ပၞာန်ကီုရ။
