သကိုပ်အုပ်ဓုပ်ကွာန် အပ္ဍဲပွိုၚ်ဍုၚ်မုဟ်ဍုၚ်တံ ဒးဒုၚ်ဒစဵုဒစး

by | Jan 11, 2013 | ပရိုၚ် | 0 comments

ရဲမန် – ကွာန်မၞုံအပ္ဍဲပွိုၚ်ဍုၚ်မုဟ်ဍုၚ်တံဂှ် ၜိုန်ရရုဲစှ်လဝ် သကိုပ်အုပ်ဓုပ်ကွာန် နဆန္ဒညးဂမၠိုၚ်တုဲကီုလေဝ် ဒးဒုၚ်ဆဵုဂဗဒၟံၚ်ကဵု ပရေၚ်ဒစဵုဒစးရောၚ်ဂှ် ဂွံတီကေတ် နူညးဒေသပွိုၚ်ဍုၚ်မုဟ်ဍုၚ်တံ ဟီုရ။

အဃောစမ်ၜိုတ်မံၚ်ညးအုပ်ဓုပ်ကွာန် ပ္ဍဲကွာန်ကြုၚ်ကြိုက် ပွိုၚ်ဍုၚ်ဇြပ်ဗု

အဃောစမ်ၜိုတ်မံၚ်ညးအုပ်ဓုပ်ကွာန် ပ္ဍဲကွာန်ကြုၚ်ကြိုက် ပွိုၚ်ဍုၚ်ဇြပ်ဗု

သကိုပ်အုပ်ဓုပ်ကွာန်ဂှ် ပ္ဍဲအရာစန်ဒက်ညးဍုၚ်ကွာန် သွက်ပေဲါရုဲမာဲ သၞာံ ၂၀၁၅ ဂတဏံ ပၟိက်ဇၞော်ဗွဲမလောန်တုဲ ဗော်ပရေၚ်ဍုၚ်ကွာန်တံဂှ် မၞိဟ်ညး မၞိဟ်အဲ ပြိုၚ်ပ္ကာန်မံၚ် ညံၚ်သ္ဂောံဒှ်အုပ်ဓုပ်ကွာန်အိုတ်ဂှ်ရ ဒှ်ကၠုၚ်ပရေၚ်ဒစဵုဒစး သာ်ဏံရ။

ပ္ဍဲဂိတုဒဳဇြေမ်ပါ ၁၉၊ သၞာံ ၂၀၁၂ ဂှ် ကွာန်မၞုံအပ္ဍဲပွိုၚ်ဍုၚ်မုဟ်ဍုၚ် မပ္တံကဵု သၞေဟ်ဗဒဝ်၊ ယာန်ဒံၚ်၊ ကွာန်လှာ၊ အၜေတ်၊ ဆက်တဲ၊ ကလအ်သတ်တံ ရုဲစှ်အုပ်ဓုပ်ကွာန် နကဵုမာဲပၞုက်တုဲ ကွာန်ယာန်ဒံၚ်မွဲဟေၚ် ကောန်ဂကောံ ဗော်ခိုၚ်ကၠိုက်ဖောအ်ဗြေဝ် ဒးဒုၚ်ရုဲစှ်ရ။

ကွာန် ကောန်ဂကောံဗော်ခိုၚ်ကၠိုက်ဖောအ်ဗြေဝ်တံ ဟွံဂွံဒုၚ်ရုဲစှ်ဂှ် ပရေၚ်ရုဲစှ်အုပ်ဓုပ်ကွာန်ဏံ ဟွံစှေ်ဗဗွဲဓဝ်ပုဟ် သ္ဂးတုဲ ပတိုန်လဝ်လိက် ဒစဵုဒစးကဵု ပွိုၚ်ဍုၚ်ရောၚ် ဂွံတီကေတ်ရ။ မပ္တံကဵု ကွာန်လှာ၊ သၞေဟ်ဗဒဝ်၊ အၜေတ်တံဂှ် ဒးဒုၚ်ပတိုန်လဝ်လိက် ဒစဵုဒစးရောၚ် ဂွံတီကေတ်ရ။

“အုပ်ဓုပ်ကွာန်ပိုဲဂှ် ပိုဲဒးစိုတ်တုဲ ရုဲစှ်လဝ်။ လၟုဟ် ဍေံတံ (ဗော်ခိုၚ်ကၠိုက်ဖောအ်ဗြေဝ်) ဟွံဂွံဒုၚ်ရုဲစှ်တုဲ ပေဲါရုဲစှ်ဏံ ဟွံမွဲဗဗွဲဓဝ်ပုဟ် ဟီုတုဲ ဍေံတံ ပတိုန်လဝ်လိက်ဒစဵုဒစး။ နူပွိုၚ်ဍုၚ် မုလေဝ်ဟွံကလေၚ်ဟီုဏီပုဟ်” သာ်ဝွံ ကောန်ကွာန် ကွာန်လှာမွဲတၠ ဟီုရ။

ပ္ဍဲကွာန်ယာန်ဒံၚ် ဗော်ခိုၚ်ကၠိုက်ဖောအ်ဗြေဝ် ဒးဒုၚ်ရုဲစှ်ဂှ် လၟုဟ်အပ်ပြာပ်ဇိုန်ဏှၚ်ကဵု အဆံၚ်အလံၚ် သကိုပ်အုပ်ဓုပ်ကွာန် မပ္တံကဵု တဆိပ်ရုၚ်တံတုဲရောၚ်ဂှ် ကောန်ကွာန်မွဲတၠ ဟီုရ။

သွက်သ္ဂောံရုဲစှ် သကိုပ်အုပ်ဓုပ် အရာပ်၊ ကွာန် နနဲဒဳမဝ်ကရေဇြဳမာန်ဂှ် ပ္ဍဲဂိတုဂျာန္နဝါရဳ၊ သၞာံ ၂၀၁၂ ဂှ် နူကၠတ်ထဝ်ကၟိန်ဍုၚ် စၞောန်ပျးကၠုၚ် သၞောဝ်ဥပဒေ အရာပ်/ကွာန်တုဲရ။

ပ္ဍဲကာလရုဲစှ် သကိုပ်အုပ်ဓုပ်ကွာန် ကဆံၚ်ကဆံၚ်ဂှ်မ္ဂး နူကဵုပွိုၚ်ဍုၚ် ပွမရုဲစှ် ဂကောံသမာဓိ နဆန္ဒညးဂမၠိုၚ်၊ ဂကောံသမာဓိတံ ပွမရုဲစှ် ညးစၞး က္ဍိုပ်စှ်သ္ၚိ၊ ညးစၞးက္ဍိုပ်စှ်သ္ၚိတံဂှ် ပွမရုဲစှ် သကိုပ်အုပ်ဓုပ်ကွာန် နကဵုမာဲဒၠုက်တံ ပါလုပ်အိုတ်ရ။

သကိုပ်အုပ်ဓုပ်ကွာန်တံဂှ် အပ္ဍဲကွာန်ဇကု ပရေၚ်ဝေၚ်္ၚၚ်လံၚ်သြန်၊ ပရေၚ်ဒုစရိုတ်မွဲမွဲ ကတဵုဒှ်ကၠုၚ်မ္ဂး အခေါၚ်စၟဳစၟတ်ဂၠိုက်ဂၠာဲ ကာတၟေၚ်၊ အခေါၚ်ပတိတ်ကဵုလိက်ပၟိၚ်ရပ် နွံရောၚ်ဂှ် သၞောဝ်ဥပဒေ အရာပ်/ကွာန်ဂှ် အပ်လဝ်အဝဵု နွံရ။

ၜိုန်ရရုဲစှ် သကိုပ်အုပ်ဓုပ်ကွာန်တုဲကီုလေဝ် ကောန်ကွာန်တံ ဟွံဒးဂၞပ်တုဲ ကောန်ကွာန် လၟိဟ် ၅၀ တၟံကၠံပြၚ်တံ ဒစဵုဒစးကၠုၚ်မ္ဂး နကဵုသကိုပ်အုပ်ဓုပ်ပွိုၚ်ဍုၚ် ဒးပဒေံါပဲါတးကဵု သကိုပ်အုပ်ဓုပ်ကွာန်ဂှ်ရောၚ် သာ်ဝွံ ပ္ဍဲသၞောဝ်ဥပဒေ အရာပ်/ကွာန် ဂှ် စၞောန်ပျးလဝ် နွံကီုရ။

Written by

Related Posts

ကွးဘာနူဘာကောန်ဂကူလ္ၚဵု ပြံၚ်ကၠောံဘာတန်အလဵုအသဳဂှ် ဂအုပ်ဘာတအ် ဟွံဒုၚ်တဲ

ကွးဘာနူဘာကောန်ဂကူလ္ၚဵု ပြံၚ်ကၠောံဘာတန်အလဵုအသဳဂှ် ဂအုပ်ဘာတအ် ဟွံဒုၚ်တဲ

ကွးဘာနူဘာကောန်ဂကူလ္ၚဵု ပြံၚ်ကၠောံဘာတန်အလဵုအသဳဂှ် ဂအုပ်ဘာတအ်ဟွံဒုၚ်တဲတုဲ ကွးဘာတအ် ဂွံဆက်တိုန်ဘာဂှ် ဒှ်ဒၟံၚ်ပရေၚ်ခက်ခုဲဖိုဟ်ရောၚ် ညးတာလျိုၚ် ဂကောံ ကေၚ်ကာပွိုၚ်ဍုၚ် (ဗွိုၚ်ပ္ဍဲဍုၚ်) မွဲတၠ ဟီုလဴထ္ၜးရ။

ပိုဲမၞိဟ်တံ အာယုက်ဇၞော်ကၠုင်မ္ဂး

ပိုဲမၞိဟ်တံ အာယုက်ဇၞော်ကၠုင်မ္ဂး

အာယုက်ဇၞော်ကၠုင် ဗျုကၠုင်မ္ဂး ပ္ဍဲခန္ဓကာယပိုဲဏံ မွဲသာ်လေဝ် ဟွံခိုဟ်ရ။ အာယုက်အကြာ ၄၅ – ကဵု – ၆၀ ဂှ် လက်သဏ်ယဲ ထေက်ကဵုပိုဲတံ မ္ဒးစွံသတိ ညံင်ရဴသ္ဂောံစွံသတိမာန်တုဲ သွက်ရသ္ဂောံစဵုဒၞါ သ္ဂောံလွဳပရာမာန်ဂှ် လိက်ပရေင် မဒှ်ဗဟုသုတ စပ်ကဵုပရေင်ထတ်ယုက်ဏံ ဗှ်လ္ၚတ်လဝ်တုဲ မ္ဒးပါ်ပရအ်ဏာကဵုကောန်ဂကူမန် ညးမဗှ်လိက်တံရ။

ကိုန်စဳဇန်ရပ်ကွဳစက်ယာန် ဟွံရုပ်သီဏီတုဲ ကွဳလိုန်ဓာတ်၊ ကွဳစက်တအ် ဒးတိတ်ကမၠောန် အကြာဘဲအန္တရာဲဒးဒုၚ်ရပ်

ကိုန်စဳဇန်ရပ်ကွဳစက်ယာန် ဟွံရုပ်သီဏီတုဲ ကွဳလိုန်ဓာတ်၊ ကွဳစက်တအ် ဒးတိတ်ကမၠောန် အကြာဘဲအန္တရာဲဒးဒုၚ်ရပ်

ကိုန်စဳဇန်ရပ်ကွဳစက်ယာန် ဟွံရုပ်သီဏီဂှ်ရ ကွဳလိုန်ဓာတ်၊ ကွဳစက်တအ် ဟိုတ်နူဒေါံဇူကမၠောန်လအ် ဒှ်ခက်ခုဲတုဲ ဒးတိတ်ကမၠောန်အကြာဘဲအန္တရာဲ ဒးဒုၚ်ရပ်ဂှ်ရောၚ် ညးသွံခၞေဝ်ကေဝ် အကြာကွာန် ပွိုၚ်ဍုၚ်မုဟ်ဍုၚ်မွဲတၠ ဟီုရ။

0 Comments

Submit a Comment

Your email address will not be published. Required fields are marked *

This site uses Akismet to reduce spam. Learn how your comment data is processed.