ရဲမန် – ကွာန်မၞုံအပ္ဍဲပွိုၚ်ဍုၚ်မုဟ်ဍုၚ်တံဂှ် ၜိုန်ရရုဲစှ်လဝ် သကိုပ်အုပ်ဓုပ်ကွာန် နဆန္ဒညးဂမၠိုၚ်တုဲကီုလေဝ် ဒးဒုၚ်ဆဵုဂဗဒၟံၚ်ကဵု ပရေၚ်ဒစဵုဒစးရောၚ်ဂှ် ဂွံတီကေတ် နူညးဒေသပွိုၚ်ဍုၚ်မုဟ်ဍုၚ်တံ ဟီုရ။
ပ္ဍဲဂိတုဒဳဇြေမ်ပါ ၁၉၊ သၞာံ ၂၀၁၂ ဂှ် ကွာန်မၞုံအပ္ဍဲပွိုၚ်ဍုၚ်မုဟ်ဍုၚ် မပ္တံကဵု သၞေဟ်ဗဒဝ်၊ ယာန်ဒံၚ်၊ ကွာန်လှာ၊ အၜေတ်၊ ဆက်တဲ၊ ကလအ်သတ်တံ ရုဲစှ်အုပ်ဓုပ်ကွာန် နကဵုမာဲပၞုက်တုဲ ကွာန်ယာန်ဒံၚ်မွဲဟေၚ် ကောန်ဂကောံ ဗော်ခိုၚ်ကၠိုက်ဖောအ်ဗြေဝ် ဒးဒုၚ်ရုဲစှ်ရ။
ကွာန် ကောန်ဂကောံဗော်ခိုၚ်ကၠိုက်ဖောအ်ဗြေဝ်တံ ဟွံဂွံဒုၚ်ရုဲစှ်ဂှ် ပရေၚ်ရုဲစှ်အုပ်ဓုပ်ကွာန်ဏံ ဟွံစှေ်ဗဗွဲဓဝ်ပုဟ် သ္ဂးတုဲ ပတိုန်လဝ်လိက် ဒစဵုဒစးကဵု ပွိုၚ်ဍုၚ်ရောၚ် ဂွံတီကေတ်ရ။ မပ္တံကဵု ကွာန်လှာ၊ သၞေဟ်ဗဒဝ်၊ အၜေတ်တံဂှ် ဒးဒုၚ်ပတိုန်လဝ်လိက် ဒစဵုဒစးရောၚ် ဂွံတီကေတ်ရ။
“အုပ်ဓုပ်ကွာန်ပိုဲဂှ် ပိုဲဒးစိုတ်တုဲ ရုဲစှ်လဝ်။ လၟုဟ် ဍေံတံ (ဗော်ခိုၚ်ကၠိုက်ဖောအ်ဗြေဝ်) ဟွံဂွံဒုၚ်ရုဲစှ်တုဲ ပေဲါရုဲစှ်ဏံ ဟွံမွဲဗဗွဲဓဝ်ပုဟ် ဟီုတုဲ ဍေံတံ ပတိုန်လဝ်လိက်ဒစဵုဒစး။ နူပွိုၚ်ဍုၚ် မုလေဝ်ဟွံကလေၚ်ဟီုဏီပုဟ်” သာ်ဝွံ ကောန်ကွာန် ကွာန်လှာမွဲတၠ ဟီုရ။
ပ္ဍဲကွာန်ယာန်ဒံၚ် ဗော်ခိုၚ်ကၠိုက်ဖောအ်ဗြေဝ် ဒးဒုၚ်ရုဲစှ်ဂှ် လၟုဟ်အပ်ပြာပ်ဇိုန်ဏှၚ်ကဵု အဆံၚ်အလံၚ် သကိုပ်အုပ်ဓုပ်ကွာန် မပ္တံကဵု တဆိပ်ရုၚ်တံတုဲရောၚ်ဂှ် ကောန်ကွာန်မွဲတၠ ဟီုရ။
သွက်သ္ဂောံရုဲစှ် သကိုပ်အုပ်ဓုပ် အရာပ်၊ ကွာန် နနဲဒဳမဝ်ကရေဇြဳမာန်ဂှ် ပ္ဍဲဂိတုဂျာန္နဝါရဳ၊ သၞာံ ၂၀၁၂ ဂှ် နူကၠတ်ထဝ်ကၟိန်ဍုၚ် စၞောန်ပျးကၠုၚ် သၞောဝ်ဥပဒေ အရာပ်/ကွာန်တုဲရ။
ပ္ဍဲကာလရုဲစှ် သကိုပ်အုပ်ဓုပ်ကွာန် ကဆံၚ်ကဆံၚ်ဂှ်မ္ဂး နူကဵုပွိုၚ်ဍုၚ် ပွမရုဲစှ် ဂကောံသမာဓိ နဆန္ဒညးဂမၠိုၚ်၊ ဂကောံသမာဓိတံ ပွမရုဲစှ် ညးစၞး က္ဍိုပ်စှ်သ္ၚိ၊ ညးစၞးက္ဍိုပ်စှ်သ္ၚိတံဂှ် ပွမရုဲစှ် သကိုပ်အုပ်ဓုပ်ကွာန် နကဵုမာဲဒၠုက်တံ ပါလုပ်အိုတ်ရ။
သကိုပ်အုပ်ဓုပ်ကွာန်တံဂှ် အပ္ဍဲကွာန်ဇကု ပရေၚ်ဝေၚ်္ၚၚ်လံၚ်သြန်၊ ပရေၚ်ဒုစရိုတ်မွဲမွဲ ကတဵုဒှ်ကၠုၚ်မ္ဂး အခေါၚ်စၟဳစၟတ်ဂၠိုက်ဂၠာဲ ကာတၟေၚ်၊ အခေါၚ်ပတိတ်ကဵုလိက်ပၟိၚ်ရပ် နွံရောၚ်ဂှ် သၞောဝ်ဥပဒေ အရာပ်/ကွာန်ဂှ် အပ်လဝ်အဝဵု နွံရ။
ၜိုန်ရရုဲစှ် သကိုပ်အုပ်ဓုပ်ကွာန်တုဲကီုလေဝ် ကောန်ကွာန်တံ ဟွံဒးဂၞပ်တုဲ ကောန်ကွာန် လၟိဟ် ၅၀ တၟံကၠံပြၚ်တံ ဒစဵုဒစးကၠုၚ်မ္ဂး နကဵုသကိုပ်အုပ်ဓုပ်ပွိုၚ်ဍုၚ် ဒးပဒေံါပဲါတးကဵု သကိုပ်အုပ်ဓုပ်ကွာန်ဂှ်ရောၚ် သာ်ဝွံ ပ္ဍဲသၞောဝ်ဥပဒေ အရာပ်/ကွာန် ဂှ် စၞောန်ပျးလဝ် နွံကီုရ။