Dawei Watch – ဟိုတ်နူရုၚ်စက် သတ်ဗြဴကၠေၚ် ယုဇန မၞုံအပ္ဍဲပွိုၚ်ဍုၚ်ခမံက်ကျဳ၊ ခရိုၚ်ကအ်သံၚ်တုဲ ဍာ်ကြုၚ်ခမံက်ကျဳ ၚေက်ကၠိခ္ဍက်မံၚ်ဂှ် အပ္ဍဲဂိတုအေဗရာအိုတ်ဏံ ၚးသောၚ်ကဵုဒတုဲရောၚ်ဂှ် နူကုမ္ပဏဳ ကဵုလဝ်ကတိပါၚ်ရောၚ် သကိုပ်အုပ်ဓုပ် ခရိုၚ်ကအ်သံၚ် ဟီုရ။
ဂကောံကွးဘာတၞောဝ် ၈၈ ကအ်သံၚ် ၉ တၠတံဂှ် ပ္ဍဲဂိတုဂျာန္နဝါရဳ ၉ အခိၚ်လဒေါဝ်တ္ၚဲ ၁ ကလေၚ်ဂှ် ဆဵုဂဗကဵု သကိုပ်အုပ်ဓုပ် ခရိုၚ်ကအ်သံၚ် ပ္ဍဲရုၚ်သကိုပ်အုပ်ဓုပ်ခရိုၚ်ရ။
နကဵုကုမ္ပဏဳ ယုဇန ပ္ဍဲဂိတုဂျာန္နဝါရဳအိုတ်ဏံမ္ဂး ၚးသောၚ်ကဵု ပရေၚ်ဍာ်ကြုၚ်ကၠိခ္ဍက် ၅၀ တၟံကၠံ၊ ပ္ဍဲဂိတုအေဗရာအိုတ် ၚးသောၚ်ကဵု စဵုစိုပ်ဒတုဲရောၚ်ဂှ် ဟီုဂးလဝ်ရောၚ် သာ်ဝွံ ပ္ဍဲလိက်လလောၚ်ပရိုၚ် ကွးဘာတၞောဝ် ၈၈ ဂှ် ချူဓမံက်လဝ်ရ။
ၜိုန်ဂှ်လေဝ် နကဵုညး ဟီုဂးလဝ်သာ်ဂှ် ချိုတ်ချိုတ်ပၠိုတ်ပၠိုတ် ဟွံမွဲရောၚ်ဂှ် သကိုပ်အုပ်ဓုပ်ခရိုၚ် ဟီုရ။
“ဆလအ် စကၠောန်၊ အခိၚ်လဵုတုဲဒှ်ဂှ် ပြဟ်ပြဟ်ဏံ ဟွံတီဏီပုဟ်။ အခိၚ်လဵု ကၠောန်ကဵုဒတုဲဂှ်လေဝ် ပိုဲဟွံဟီုလဝ်ပုဟ်” သာ်ဝွံ သကိုပ်အုပ်ဓုပ်ခရိုၚ်ကအ်သံၚ် ဥူကျဝ်ဇြဲထောန် ဟီုရ။
ပရေၚ်ၚေတ်ကၠိခ္ဍက် အပ္ဍဲကြုၚ်ဂှ် နူကဵုကုမ္ပဏဳ သၟးဇ္ၚးကဵု နနဲဓာတုဗေဒတုဲ တ္ၚဲလဵုစကၠောန်၊ တ္ၚဲလဵုတုဲဒှ်မာန်ဂှ် ပ္ညဳပ္ညပ်မံၚ်ကဵု ကုမ္ပဏဳဖိုဟ်ရောၚ်ဂှ်လေဝ် ညးဆက်ဟီုရ။
လဟီုသကိုပ်အုပ်ဓုပ်ခရိုၚ် ကေုာံ တၚ်လလောၚ်ပရိုၚ် ကွးဘာတၞောဝ် ၈၈ တံဂှ် တၞဟ်ခြာမံၚ်တုဲ နကဵုကုမ္ပဏဳယုဇနလေဝ် ဟွံတိုန်စိုပ်လဝ် ပေဲါဆဵုဂဗသဳကၠဳဂှ်ရ။
“ဟိုတ်နူဟီုလဝ် ပ္ဍဲကောံဓရီုဂှ်တုဲ ပိုဲချူလဝ်ဏောၚ်။ ဟွံဗၠေတ်ပုဟ်။ ကိစ္စဒးဗၠေတ်မှာလေဝ် ဟွံသေၚ်ပုဟ်” သာ်ဝွံ ညးမတိုန်စိုပ်လဝ် ပေဲါဆဵုဂဗသဳကၠဳ နူဂကောံကွးဘာတၞောဝ် ၈၈ ဥူမေန်လွေန် ကလေၚ်ဟီုပလန်ရ။
အိက်ထွုတ်ရုၚ်စက်သတ်ဗြဴကၠေၚ်ယုဇန ဗုတ်လဝ်တံဂှ် ကၠဟ်ထောံလဝ် အပ္ဍဲကြုၚ်ခမံက်ကျဳတုဲ ဍာ်ကြုၚ်ကၠိၚေက်ကၠုၚ်ကီု၊ သၟူပရေံပရေံတိတ်ကၠုၚ် မွဲဒမြိပ်ကြုၚ်ဂှ်ကီု၊ သတ်ဍာ်တံ မဒးချိုတ်ကၠုၚ်ကီု၊ ဒှ်အခက်အခုဲကဵု ဍာ်သွုၚ်ကီုဂှ် ဒးဆဵုဂဗကၠုၚ်ဒၟံၚ်နာနာရောၚ် ညးဒေသတံ ဟီုအိုတ်ရ။
ပရေၚ်ဍာ်ကြုၚ်ကၠိၚေက်မံၚ်ဏံဂှ် တမ်ဒပ် စၟတ် (၂၈၈) မဖျေံသဇိုၚ်ဒေသဂှ်ကီု၊ ညးဒေသ မၞုံအပ္ဍဲအရာပ် ၁၊ အရာပ် ၄ ကေုာံ အရာပ်ပါၚ်ကြုၚ်တံကီု ဒးဒုၚ်စသိုၚ်တုဲ ညးမဗ္ဒဗ္ဒဲါဒၟံၚ် ကြုၚ်ဏံဂှ်လေဝ် ဒှ်ကၠုၚ်အခက်အခုဲ ပရေၚ်ဂယိုၚ်လမျီုရောၚ် ဂွံတီကေတ်ရ။