မာံသုတ – ပ္ဍဲသၞာံဏံ ပေဲါသၟာန်သွဟ်လိက်စှ်တန် သွက်သ္ဂောံတိုန်တက္ကသဵုဂှ် တွဵုရးဍုၚ်မန်ဝွံ နကဵုစရၚ်အံၚ်က္ဍိုပ်ကၠံ ၄၇.၃၈% ဂှ် ဒှ်စရၚ်အံၚ်သၠုၚ်အိုတ် ပ္ဍဲအလုံမွဲကၟိန်ဍုၚ်ဗၟာကီုလေဝ် သဝ်စှေ်ဒၟံၚ်နူအခိၚ်သၞာံအာတေံဏီရောၚ် ဂွံတီကေတ်ရ။
သၞာဲဒဴ နူရုၚ်သ္ကိုပ်ပရေၚ်ပညာ တွဵုရးဍုၚ်မန်မွဲတၠဂှ် “ညးတၠဂုဏ်တၟေၚ် ၆ ဘာသာသၞာံဏံဂှ် ဘာတန်သၠုၚ် ဍုၚ်မတ်မလီု အထက ၉ ဂှ် ၅ တၠ၊ အထက ၆ ဂှ် ၂ တၠ၊ အထက ၈ ဂှ် ၁ တၠ၊ ပွိုၚ်ဍုၚ်သဓီုကဵု မုဟ်ဍုၚ်ဂှ် ၜါၜါတၠ၊ အပံၚ်သီုဖအိုတ် ၁၂ တၠ၊ ဘာစရၚ်အံၚ်ခိုဟ်အိုတ်ဂှ် အထက ၈ ၊ နကဵုပွိုၚ်ဍုၚ်တှေ် ပွိုၚ်ဍုၚ်မုဟ်ဍုၚ်ရ” သာ်ဝွံ ညးဟီုရ။
ကလိဂွံစရၚ်အံၚ်စှ်တန်ခိုဟ်အိုတ် ၅ သၞာံဆက်က်ဂွံကၠုၚ်လဝ် နကဵုတွဵုရးဍုၚ်မန် ပ္ဍဲသၞာံဏံမ္ဂး ပၞောဝ်ကဵုညးလုပ်သွဟ် ၁၃၇၀၇ တၠတံ အံၚ်အာလဝ် ၆၄၉၄ တၠဂှ် ညးတၠဂုန်တၟေၚ် ၆ ဘာသာ ၁၂ တၠ၊ ၅ ဘာသာ ၃၁ တၠ၊ ၄ ဘာသာ ၁၂၀ တၠ၊ ၃ ဘာသာ ၁၆၃ တၠ၊ ၂ ဘာသာ ၂၇၀ တၠ၊ မွဲဘာသာ ၁၄၅၇ တၠတုဲ ညးဂွံဂုဏ်တၟေၚ် အပံၚ်ဖအိုတ် ၂၀၅၃ တၠ မဒှ်ရ။
တုပ်သာ်ဂှ်ကီု ဒၞာဲရးဒေသဇၞော်မာန္တလေဝ် ပ္ဍဲပေဲါသၟာန်သွဟ်လိက်စှ်တန်သၞာံဏံ အပ္ဍဲကွးဘာသွဟ်လိက် ရ၅၂၈၂ တၠဂှ် အံၚ်အာ ၂၉၇၁၅ တၠဒှ်တုဲ ဂွံကၠုၚ်က္ဍိုပ်ကၠံ ၃၉ .၄၇% ဂှ် ညးဂွံဂုဏ်တၟေၚ် (၆) ဘာသာ ၁၅၆ တၠ၊ ၅ ဘာသာ ၃၉၂ တၠ၊ ၄ ဘာသာ ၆၁၃ တၠ၊ ၃ ဘာသာ ရ၃၄ တၠ၊ ၂ ဘာသာ ၉၇၉ တၠ ကေုာံ မွဲဘာသာ ၂၂၀၆ တၠဒှ်တုဲ ညးဂွံဂုဏ်တၟေၚ် အပံၚ်ဖအိုတ် ၅၀၈၀ တၠ နွံရောၚ် ဂွံတီကေတ် နူရုၚ်သ္ကိုပ်ပရေၚ်ပညာ ရးဒေသဇၞော်မာန္တလေဝ်တေံရ။
သၞာံဏံ နကဵုရးဒေသဇၞော်လ္ဂုၚ် ပ္ဍဲပေဲါသၟာန်သွဟ်လိက်စှ်တန် သွက်သ္ဂောံတိုန်တက္ကသဵုဂှ် ကလိဂွံ စရၚ်အံၚ် ၃၃.၃၉%က္ဍိုပ်ကၠံဟေၚ် ပ္ဍဲပရိုၚ်ချူပတိတ်လဝ်နွံရ။
ပ္ဍဲတွဵုရးချေၚ်ဝွံ အပ္ဍဲညးလုပ်သွဟ်လိက်စှ်တန်သၞာံဏံ လၟိဟ် ရ၄၅၉ တၠဂှ် အံၚ်အာ ၁၂၃၂ တၠဒှ်တုဲ နကဵုစရၚ်အံၚ် ၁၆.၅၂% က္ဍိုပ်ကၠံ အံၚ်အာဂှ် ဒှ်စရၚ်အံၚ်က္ဍိုပ်ကၠံသဝ်အိုတ် အလုံမွဲကၟိန် ဍုၚ်ဗၟာရောၚ် ဂွံတီကေတ်ရ။
ပ္ဍဲပေဲါသၟာန်သွဟ်လိက်စှ်တန် သၞာံ ၂၀၁၃ ဏံဂှ် ပါ်စွံလဝ်ဌာနစၟဳစၟတ်လိက် ၁၂၉၆ ဒၞာဲနွံတုဲ ညး လုပ်သွဟ် ပ္ဍဲဌာနသွဟ်လိက် အပ္ဍဲဍုၚ်/မ္ၚးဍုၚ် ၄၈၇၄၁၀ တၠ နွံကၠုၚ်ဂှ် ဌာနဝန်ဇၞော်ပရေၚ်ပညာ လလောၚ်ပ္တိတ်လဝ်ရ။
ပ္ဍဲသၞာံ ၂၀၁၃ ၊ ဂိတုမာတ် ၁၃ ဂှ် စသွဟ်လိက်ပ္တိုန်တန်စှ်တန်တုဲ ပ္ဍဲဂိတုဂျောန် ၈ ပယျာံနူဂယးဂှ် စရၚ်ညးအံၚ်လိက် ပ္ဍဲဌာနစၟဳစၟတ်လိက် မၞုံအလုံမွဲကၟိန်ဍုၚ်ဗၟာဂှ် လလောၚ်တြးပ္တိတ်လဝ်အိုတ်ရ။