အေမဳအံၚ် – နာဲရဿ ဒုဥက္ကဌဗော်ဍုၚ်မန်တၟိ စုတိကလိလောန်အာဂှ်တုဲ က္ဍိုပ်သ္ကိုပ်ပရေၚ်ဍုၚ်ကွာန်ဂမၠိုၚ်၊ ဂကောံပၠန်ဂတးဂမၠိုၚ်၊ ဂကောံအလဵုအသဳဂမၠိုၚ် ကေုာံ ဂကောံမန်ဂမၠိုၚ်တံ ပလံၚ်ဗ္စိုပ် လိက်သဝဏ်အောန်စိုတ်ဂမၠိုၚ်ဂှ် ဗော်ဍုၚ်မန်တၟိ ဂွံဒုၚ်ကေတ်တဲရောၚ် ဂွံတီကေတ်ရ။

လိက်သဝဏ် ဂအုပ်ဂကောံဒဳမဝ်ကရေဇြဳကောန်ဂကူ ဒဝ်အံၚ်သာန်သုကျဳ ပလံၚ်ဗ္စိုပ် ဂိတုဂျောန် (၁၇) ဂှ်မ္ဂး “ဒုဥက္ကဌဗော်ဍုၚ်မန်တၟိ၊ က္ဍိုပ်သ္ကိုပ်ဂကောံသဳကၠဳပရေၚ်ၜိုဟ်လလံမွဲ စုတိကလိလောန်အာ ဂွံမိၚ်ကေတ်ဂှ် အောန်စိုတ်ဗွဲမတုပ်သၟဟ်ကဵု ကၟိန်အိန်ထံၚ်ညးတံကီုရ” သာ်ဝွံ ချူဓမံက်လဝ်ရ။

တုပ်တဴသာ်ဝွံကီု ပ္ဍဲလိက်သဝဏ် ကံၚ်ဇြဳဖေဝ်ဒရေဝ်ကောန်ဂကူကောန်ဍုၚ်အရၚ်ညဳသၟဟ် UNFC ဂှ် “နာဲရဿဝွံ အဃောဥက္ကဌဇၞော် နာဲယှိုဲကျေန် နွံတေံရ ဍိုက်ဍိုပ်ကၠုၚ်ပရေၚ်ပၠန်ဂတး မွဲကရောံမွဲစွံရ။ အဃောစပ္တန် UNFC ဂှ်လေဝ် ပ္ဍဲကဵုညးဍိုက်ဍိုပ် သ္ပကမကထဂမၠိုၚ်ဂှ် ပါလုပ်မွဲတၠကီုရ” သာ်ဝွံ ဓမံက်ထ္ၜး လဝ်ရ။

အလဵုအသဳတွဵုရးဍုၚ်မန်ကဵု ဂကောံအလဵုအသဳတွဵုရးဍုၚ်ကရေၚ်တံလေဝ် ပလံၚ်ဗ္စိုပ် လိက်သဝဏ် အောန်စိုတ် စၞးသ္ကိုပ်ဝန်ဇၞော်ကီုရ။

တုဲပၠန် ဗော်တဴတက်ကောန်ဂကူကရေၚ်ဍာဲ KNPP၊ ဂအုပ်ဂကောံဗၠးၜးကောန်ဂကူပအိုဝ် PNLO၊ ဗော်ဗၠးၜးတွဵုရးရခေၚ် ALP တံဂှ်လေဝ် ပလံၚ်ဗ္စိုပ်လိက်သဝဏ်ဂမၠိုၚ်ရ။

ဗော်ဒဳမဝ်ကရေသဳမန် MDP၊ ဂကောံညဳသၟဟ်ဂကူမန် MUL၊ Mon Youth Friendship Network တွဵုရးဍုၚ်မန်တံ ပလံၚ်ဗ္စိုပ်နၚ်လိက်သဝဏ်ဂမၠိုၚ်ဂှ်လေဝ် ဂွံဒုၚ်ကေတ်တဲကီုရ။

တုပ်သာ်ဂှ်ကီု ဂကောံရပ်လွဟ်ကောန်ဂကူကောန်ဍုၚ်အရၚ်ဘဝတုပ်ဂမၠိုၚ်၊ ဂကောံမှာဇန်ဂမၠိုၚ် ကေုာံ နကဵုပူဂဵုမွဲမွဲတၠတံလေဝ် ပလံၚ်ဗ္စိုပ်နၚ် လိက်သဝဏ်အောန်စိုတ်ကီုရ။

နာဲရဿ အယုက် (၆၇) သၞာံ၊ ညးမဒှ်ဒုဥက္ကဌဗော်ဍုၚ်မန်တၟိဂှ်ဝွံ ပ္ဍဲဂိတုဂျောန် (၁၅)၊ အခိၚ်ဗ္တံ ၜိုတ် (၈း၂၀) နာဍဳဂှ် စုတိကလိလောန်အာ နကဵုယဲကေန်သာ ပ္ဍဲရုၚ်ဂဥုဲဝၚ်က၊ ကၟိန်ဍုၚ်သေံရ။

ရုပ်ဇွခန္ဓညးဝွံ ပ္ဍဲဂိတုဂျောန် (၂၁)၊ အခိၚ်တ္ၚဲစေၚ်ဂှ်မ္ဂး ကၠောန်ဗဒှ်အခန်ကၞာ စံၚ်ဇွဂြဇုတ်ညး နကဵု အခန်ကၞာပၞာန် ပ္ဍဲကွာန်ပလိုၚ်ဂျပါန်၊ ဗ္ဒာဲဍုၚ်ကျာ်ပိ၊ ဒၞာဲဒေသတိဍာ် ဗော်ဍုၚ်မန်တၟိ အုပ်ဓုပ်လဝ်ဂှ်ရောၚ် ဂွံတီကေတ်ရ။