မိလျးထဝ် – အပ္ဍဲဒေသပယျဵုသေံကဵုဗၟာ လပါ်ဒေသမေဝ်သာဲဂှ် ဗၠာဲသၟိၚ်သေံတံ ရပ်ဂွံဘိၚ်ဗု (Heroin) ကုကောန်ဍုၚ်ဗၟာ ၃ တၠ ၚုဟ်မးသြန်သေံ ၜိုတ် ၁၀၀၀ ကိုဋ်ၜါတ်နွံရောၚ် ဂွံတီကေတ်ရ။
ဗၠာဲသၟိၚ်သေံ ရပ်ဂွံဘိၚ်ဗုတုဲ ဗီုသောၚ်ထ္ၜးမံၚ်(Daily News)
“ဘိၚ်ဗုတံဏံဂှ် ကေတ်နၚ်နူ ဍုၚ်ဗၟာရ၊ ဘိၚ်ဗုဂှ် ၚုဟ်မး အပ္ဍဲဒေသပယျဵုတှေ် မွဲကဳလဵုဂရာမ်မ္ဂး သြန်သေံ အကြာ ၈ ဠက် ကဵု ၁ ကိုဋ်ၜါတ်သွံဂွံမံၚ်ရ” သာ်ဏံ ညး ၃ တၠတံ ဒုၚ်ဝန်ကုဗၠာဲသၟိၚ်သေံဂှ် ချူထမံက်လဝ် အပ္ဍဲလိက်ပရိုၚ်သေံ Daily news ရ။
သၟာကူသာန်သွံရာန်ဂဥုဲၜူမာဲ ကောန်ဍုၚ်ဗၟာ ၃ တၠတံဂှ် မသိုဲ (မဆွေ) အာယုက် ၂၈ သၞာံ၊ ဥူကျာလေန် (ဦကျာလၚ်း) အာယုက် ၃၀ သၞာံ ကေုာံ မံၚ်လှဝေန် (မောၚ်လှဝၚ်း) အာယုက် ၁၆ သၞာံတံ မဒှ်ရ။
သၟာကူသာန်သွံရာန် ဂဥုဲၜူမာဲကောန်ဍုၚ်ဗၟာ ၃ တၠတံဂှ် နူကဵုဗၠာဲသၟိၚ်သေံတံ ဗီုလဵုဆက်ဖျေံအာဒဏ်ဂှ် အပ္ဍဲလိက်ပရိုၚ်သေံတံ ဟွံထမံက်ထ္ၜးလဝ်ကီုလေဝ်အတိုၚ်သၞောတ်ဝ်ဥပဒေဍုၚ်သေံမ္ဂး စပ်ကဵုဂဥုဲၜူမာဲတုဲ ယဝ်ရ ရပ်ဂွံ ပူဂဵုသွံတံမ္ဂး ဖျေံဒဏ် စုတ်ထံၚ်မွဲအာယုက် ဟွံသေၚ် ဒးဘဲဒဏ်ဂစိုတ်ရောၚ် ဂွံတီကေတ်ရ။
အပ္ဍဲဂိတုဂျုလာၚ် ၂၇ တေံဂှ်လေဝ် ဗၠာဲသၟိၚ်သေံတံ ရပ်ဂွံဂဥုဲၜူမာဲ မပ္တံ ဂဥုဲချေံ၊ ဘၚ် ကေုာံ ဂဥုဲၜူမာဲမွဲဂကူ ကော်အာဲသ် (Ice) တံ ကုကောန်ဍုၚ်ဗၟာ ဇဝ်ကိုဝ်ဝ်အံၚ် (ဇော်ကိုကိုအောၚ်) အာယုက် ၂၅ သၞာံ အပ္ဍဲဍုၚ်ဖူဂေတ် ဍုၚ်သေံသ္ကုတ်သၠုၚ်ကျာတေံဂှ် အပ္ဍဲဌာန်ပရိုၚ် ဧရာဝတဳ ချူထမံက်လဝ်နွံရ။
ပ္ဍဲဂိတုဂျုလာၚ် ၂၆ မဒှ်တ္ၚဲဍုၚ်ဂၠးကဝ် ဗတိုက်ပလီုဂဥုဲၜူမာဲဂှ် နူကဵုဌာနဆေၚ်စပ်ဂဥုဲၜူမာဲဍုၚ်သေံတံ ကၠောန်ဗဒှ်သ္ဘၚ်ကၞာ စံၚ်ပလီုထောံ လျိုၚ်ဂဥုဲၜူမာဲၜိုတ် ၃၀၀၀ ကဳလိုဂရာမ် ၚုဟ်မးၜိုတ် ၁၀၀၀၀၀ ကိုဋ် နွံရောၚ် ထမံက်ထ္ၜးလဝ် အပ္ဍဲလိက်ပရိုၚ်သေံတံဂးရ။
