ကောန်ဍုၚ် – ပ္ဍဲကဵုကွာန်ကအ်ပှ်လှ်၊ ပွိုၚ်ဍုၚ်လှာဒကှ်၊ တွဵုရးကရေၚ်ဂှ် သွက်ပရေၚ်ဖောအ်ဗြေဝ် ဒေသကွာန်ကီု၊ မွဲကွာန်ကဵုမွဲကွာန် ညံၚ်သ္ဂောံအာကၠုၚ်ကၠောံက္ဍ လောဲသွာရေၚ်သ္ကံကီု ရန်တၟံတုဲ နူကဵုနာဲဗၠာဲ က္ဍိုက်ပ်ပံၚ်တောဲကဵု ညးအုပ်ဓုပ်ကွာန် ကေုာံ ကောန်ကွာန်တံတုဲ လးကၠောန်လဝ်ဂၠံၚ်တိ သမ္မထိုက် မၞုံကဵု သွာၚ်ပါ်တိတ်ပိသွာၚ်ရောၚ် ဂွံတီကေတ်ရ။
“ဆေၚ်စပ်ကဵု ကၠောန်ဂၠံၚ်ဏံတုဲ ဒးဗက်သြန်လ္တူညးဍုၚ်ကွာန်ဂှ် ဟွံမွဲရ။ ၜိုတ်စေတနာကောန်ကွာန်တံနွံဂှ်ရ ညးတံစုတ်ကၠုၚ်ကဵုပိုဲ၊ မသြန်လေဝ် ဂွံတၟာဂလိုၚ် သီုသြန်ထံက်ပၚ်အဲ သီုသြန်စေတနာဂှ် ဗ္ဒဲါကၠံပြၚ်ၚ်ကီုရ။ ဆဂး ပြဟ်ဟ်ဏံ ဟိုတ်နူမသြန်တံဂှ် ဟွံသှေ်ရတုဲ ဒးဇူဒီုလဝ်ကၠာရ။ တုဲပၠန် လ္ပာ်ပိုဲကသပ်အောန်အာမွဲဂှ် ဆေၚ်ကဵုကၠောန်ဂၠံၚ်ဏံတုဲ ဟွံဂွံချပ်လဝ်ကဵု ဗော်ဍုၚ်မန်တၟိဂှ်ရ ယောၚ်ယာမ္ဂး ဒုဟ်နွံလ္ပာ်ပိုဲရ” ဂှ်လေဝ် နာဲဗၠာဲ ဆက်ဟီုရ။
ဂၠံၚ်တိသမ္မထိုက်ဝွံ ဇမၠိၚ်မွဲဟတ် မညဳသၟဟ်ကဵု အနာံသြိုဟ် (၈) ဟတ်မ္ဂး ဒတုံသြန် ၚုဟ်မး (၁၀၀၀၀) ဒ္ကေဝ်ဂှ်ရ မၞိဟ်ကဵုလဝ်ဒါန် ပေၚ် (၁၀၀၀၀) ဒ္ကေဝ်မ္ဂး ဒှ်ညးကဵုလဝ်ဒါန်ဂၠံၚ် မွဲဟတ်ရောၚ်တုဲ သြဝ် အိုဟ်တၟိုဟ်ကေတ် ကုသဵုဇကုဇကုအိုတ်ညိဂှ်လေဝ် နူကဵုကမ္မတဳကၠောန်ဂၠံၚ်တံ ဓမံက်ထ္ၜးလဝ် ပ္ဍဲကဵုလိက်တၞးသောၚ်စရၚ်ညးတံဂှ်ရ။
ဒေသပွိုၚ်ဍုၚ်လှာဒကှ်ဂှ် နွံမံၚ်အကြာၜဳၜါ မကော်ဂး ၜဳဝၚ်ရူ ကဵု ၜဳဇမိ သီုမဒှ်တိဍာ် ဗော်ဍုၚ်မန်တၟိ သြဇာတဴမွဲတုဲ နူကဵုဗော်ဍုၚ်မန်တၟိ ပံၚ်တောဲကဵု ခမဳသၚ်၊ ညးဍုၚ်ကွာန် ဒေသတံတုဲ ကၠောန်ဗဒှ်လဝ် ဂၠံၚ်ဍာန်ဇၞော်လးတၟံပိတၞုၚ် နူကွာန်ဒဵုထောၚ် စိုပ်သမ္မယျာ မွဲတၞုၚ်၊ နူကွာန်ကွိက်ခွိ အာကဵုသၞေဟ်သွံ၊ တံၚ်ဒဳမွဲတၞုၚ် ကေုာံ နူကွာန်ဒဵုထောၚ် အာလ္ပာ် ကွာန်ဝေသာလဳမွဲတၞုၚ် နွံရ။
အပ္ဍဲကဵုပွိုၚ်ဍုၚ်လှာဒကှ်ဂှ် လၟိဟ်ကွာန် ဗ္ဒဲါ (၃၀) ကွာန်မၞုံတုဲ ကွာန်ကအ်ပှ်လှ်ဝွံ လၟိဟ်သ္ၚိ နွံၜိုတ် (၆၀၀) ပြၚ်၊ ဗွဲမဂၠိုၚ်ဂှ် ကၠောန်တဴကမၠောန် တဵုကၠအ်၊ ခွာတ်ထၜိုတ်ရောၚ် ဂွံတီကေတ်ရ။