ညးအုပ်ကာနာနာ နာဲဟံသာ ကေုာံ ဂကောံ UNFC(internet)
အပ္ဍဲကောံဓရီု ဂကောံညဳသၟဟ်ကောန်ဍုၚ်အရၚ် ဖေဝ်ဒရေဝ်ကံၚ်သဳ UNFC ကဵု ကောန်ဂကောံဟွံသေၚ်တံ ပံၚ်ကောံတုဲ ဂကောံရပ်လွဟ် ကောန်ဍုၚ်အရၚ်ဂမၠိုၚ် အပ္ဍဲကဵုပေါဲကောံဓရီုဂှ် ဖျေံဏာသ္ကုတ်သွာတ်ဏံရ။
နာဲဟံသာဂှ် “ ဂကောံကဝ်ကတံဂှ် အာတ်မိက်ကၠုၚ် မိက်ဂွံဒှ် ကောန်ဂကောံ UNFC ရ၊ နကဵု UNFC ဂှ် ဂကောံကဝ်ကတံဂှ်တှေ် အခိၚ်လၟုဟ်ဏံ နကဵု ကောန်ဂကောံ ယာယဳ မွဲဒုၚ်လဝ်တဲရ၊ တၚ်နၚ်လိက်စၟတ်သမ္တီနာနာ ဍိုက်ပေၚ်တှေ် နကဵုကောန်ဂကောံ ပေၚ်ပေၚ်မွဲဂှ် သ္ပဏာစၟတ်သမ္တီဏောၚ်” သာ်ဏံဟီုရ။
အပ္ဍဲကောံဓရီု ပွိုၚ် (၃) တ္ၚဲဏံဂှ် အတိုၚ် UNFC ဖျေံလဝ်သ္ကုတ်သွာတ်လဝ် လပါ်အလဵုအသဳတံက္ဍိုက်ပ်တုဲ ကၠောန်ဗဒှ်ပေါဲသဳကၠဳ ထ္ပက်စၟတ်တဲ သွက်ဂွံဒေါံပန်ပှော် အလုံမွဲဍုၚ်မ္ဂး ဂကောံ UNFC ကီု ကောန်ဂကောံဟွံသေၚ်တံကီု ကောံဂကောန်ဍုၚ်အရၚ်ရပ်လွဟ်သီုဖအိုတ် သွက်ဂွံဒတူဒလိုၚ်အာ ဗွဲမတုပ်သၟဟ်ဂှ် တုပ်လဝ်စိုတ်ရောၚ် ဂွံတီကေတ်ရ။
“နူကဵု UNFC သဳကၠဳလဝ် သွက်ဂွံဒတူလိုၚ်အာ ဗွဲမတုပ်သၟဟ် တၚ်နၚ်တံဏံဂှ် ကောန်ဍုၚ်အရၚ် သီုဖအိုတ် ဒုၚ်မံၚ်တဲရ၊ သီုဖအိုတ်ဂှ်လေဝ် ဒတူလိုၚ်အာ တုပ်ပ်ရောၚ်” သာ်ဏံ နာဲဟံသာ ဟီုရ။
တၚ်နၚ် သွက်ဂွံဒတူဒလိုၚ်အာ တုပ်သၟဟ်ညးသ္ကအ် ကၠာဟွံဂွံထ္ပက်စၟတ်တဲဏီဂှ်၊ တၚ်နၚ်မ္ဒးပါလုပ်ဂမၠိုၚ်၊ အဃောထ္ပက်စၟတ်တဲ တၚ်နၚ်မ္ဒးပါလုပ်ဂမၠိုၚ်၊ အဃောထ္ပက် စၟတ်တဲ ဂကောံမ္ဒးပါလုပ်ဂမၠိုၚ်၊ တၚ်နၚ်သဇိုၚ် (၃) တၚ်ဏံ ပါလုပ်ရောၚ် ဂွံတီကေတ်ရ။
တၚ်နၚ်သီုဖအိုတ်ဏံ ညံၚ်ဂွံ သ္ပဒ္တန် လလောၚ်တြးအာမာန်ဂှ် ၊ အပ္ဍဲကဵုပေါဲသဳကၠဳဂတးတေံ မွဲကဆံၚ်တုဲဒှ်အာမ္ဂး ဆက်လလောၚ်တြးပတိတ်ကဵုရောၚ် နာဲဟံသာ ဆက်ဟီုရ။
MNDAA ဂကောံကဝ်က လျိုၚ်ဌာနဆက်ဆောံ ဥူဖုန်ဝေန်နာၚ်ဂှ် “ ပိုဲတံဂှ် ညံၚ်ရဴ ကောန်ဍုၚ်အရၚ်တၞဟ်ဟ်တံကီု ၜိုဟ်လလမ်PEACE ဂှ် နွံပၟိက်စိုတ်ကွေံကွေံရ၊ သၟဝ်တဲ UNFC ဂှ် ကောန်ဍုၚ်အရၚ်ဂမၠိုၚ် ညဳသၟဟ်သီုဖအိုတ်တုဲ တံၚ်တဲညးသ္ကအ် ကၠောန်အာတုပ်တုပ်ရောၚ်” သာ်ဏံ ဟီုဏာရ။
အပ္ဍဲကဵုကောံဓရီုဂှ် ဂကောံ UNFC ဟွံသေၚ်တံ မပ္တံကဵုဂကောံရပ်လွဟ်ဂမၠိုၚ် ဗော်ဗၠးၜးရခေၚ် ALP ၊ ဒပ်ပၞာန်ရခေၚ် AA ၊ ဂကောံပတဲဖဵုဒဳမဝ်ကရေဝ်ဇြဳ ဒပ်ပၞာန်ကောန်ဍုၚ်အရၚ်ကရေၚ် DKBA ၊ MNDAA ဂကောံကဝ်က ကဵု မုခ်ဒပ်က္ၜးဘာဒဳမေဝ်ကရေက်တေတ်အလုံဍုၚ်ဗၟာ ABSDF ညးက္ဍိုက်ပ်ဂကောံဂမၠိုၚ်၊ တိုန်စပ်သဳကၠဳတုဲ လ္တူ UNFC ဖျေံသ္ကုတ်သွာတ်ဂှ် ညးဂမၠိုၚ်ဂွံတၚ်တုပ်စိုတ်အိုတ်ရ။
တုပ်သာ်ဂှ်ကီု အပ္ဍဲကဵုတ္ၚဲအကြာဏံ ဂကောံထမံက်ရုပ်ရဴ ပရၚ်ၜိုဟ်လလမ်အလဵုအသဳကဵု ဗော်ဗၠးၜးကချေၚ် KIO တံ ကဆံၚ်ကၟိန်ဍုၚ် ကၠောန်လဝ်ပေါဲစဵုဂဗသဳကၠဳ ပရေၚ်ၜိုဟ်လလမ်တုဲ ဂွံကၠုၚ်တၚ်တုပ်စိုတ် (၇)တၚ်ဂှ်လေဝ် ဂိတုအိုတ်ဏံမ္ဂး ဒၞာဲဌာန်ဂအုပ်ဗဟဵု KIO အပ္ဍဲကဵုဍုၚ်လိုၚ်သာဂှ် ဂကောံကောန်ဍုၚ်အရၚ်ရပ်လွဟ်သီုဖအိုတ် သွက်ဂွံကၠောန်ပေါဲသဳကၠဳကောံဓရီုဇၞော်မွဲမာန်ဂှ် အလဵုအသဳတံတုပ်လဝ်စိုတ်တုဲဒှ်မံၚ်ယျရောၚ်။
