ပရေၚ်ဆဝ်ဗ္ၚုဟ် ၄၃၆(Copy)
ကောံဓရီုကေၚ်ကာဗဟဵု ဗော်ကောန်ဂကူမန် MNP ဂှ် ကၠောန်ဗဒှ်ဒၞာဲဌာန်ဂအုပ်ဗဟဵု ဍုၚ်မတ်မလီု ပ္ဍဲကဵုဂိတုဂျောန် ၄ တေံတုဲ ဖျေံလဝ်သ္ဂုတ်သွက်ရောၚ်ဂးရ။
အစာသဝ်ဟံၚ်ဍုၚ်ဂှ် ” သ္ဂောံပလေဝ်သ္ဇိုၚ်သၞောဝ်ဥပဒေ ၂၀၀၈ ဏောၚ်ဟီုတှေ် ဒၞာဲလဵုပိုဒ်လဵု ၊ အခန်လဵုပလေဝ်ပလေဝ် နကဵုဗော်ပိုယ်ဏအ်ဂှ် ထံက်ဂလာန်မံၚ်လၟိုန်ရ၊ လ္ပာ်ဗော် NLD တေံလေဝ် ဂွံထံက်ဂလာန်ထပက်စၟတ်တဲ သ္ဂောံပလေဝ် ၝောံပိုဒ် ၄၃၆ ဂှ် ပညဳလဝ်နွံ၊ သွက်ဂွံထပက်စၟတ်တဲဂှ် ဗော်ပိုယ် ပံၚ်တဲတုဲ ဆက်ကၠောန်အာဏောၚ်” သာ်ဏံ ဟီုလဴလဝ်ရ။
နကဵုဗော်ကောန်ဂကူမန်ဂှ် သွက်ဂွံပလေဝ် ၝောံပိုဒ် ၄၃၆ သၟးဟွံသေၚ်၊ သ္ဂောံပလေဝ်အလုံသ္ဇိုၚ်သၞောဝ်ဥပဒေ ၂၀၀၈ ဂှ်လေဝ် ပတိုန်ထ္ၜးလဝ် ပ္ဍဲကဵုကောံဓရီုဇၞော်ပရေၚ်ဂကူမန်တေံတုဲအာကီု၊ သွက်ဂွံပလေဝ် ၝောံပိုဒ် ၄၃၆ ဂှ်ညံၚ်ဂွံကၠောန်ဗဒှ်အာ ပေါဲဟီုတွံကုညးဍုၚ်ကွာန်တံကီု၊ တၚ်ပညဳလဝ်ကဵု ဗော် NLD သ္ဂောံကၠောန်ဗဒှ် ပေဲါထပက်စၟတ်တဲတအ်ဂှ် ခြာဟွံလအ်ပံၚ်တောဲထမံက်အာရုပ်ရာဏောၚ် အစာသဝ်ဟံၚ်ဍုၚ် ဆက်ဟီုလဝ်ရ။
လပါ်ဗော်ဒီမဵုရေဇြဳအလုံရးမန်(AMDP)တေံလေဝ် ပရေၚ်ချီဒရာၚ်လၟုဟ်သ္ဂောံပလေဝ်ၝောံပိုဒ် ၄၃၆ ဂှ် မၚ်ကျောဝ်ရံၚ်မံၚ်အကာဲအရာကီု၊ နကဵုဗော် AMDP လေဝ် ဒုၚ်တဲလဝ် သ္ဇိုၚ်သၞောဝ်ဥပဒေ ၂၀၀၈ ပေၚ်ၚ်ဟွံသေၚ်ကီု၊ ၝောံပိုဒ်ဒးပလေဝ်ထေက်ပ္ဍဲသ္ဇိုၚ်သၞောဝ် ၂၀၀၈ တအ်ဂှ်ပလေဝ်အာသိုက်က်ဏောဝ် သာ်ဝွံ ညးအုပ်ကာနာနာ AMDP အစာသဝ်မာံနဲသိုဝ် ဟီုလဴကဵုဌာန်ပရိုၚ်ဗၠးၜးမန် IMNA ရ။
အစာသဝ်မာံနဲသိုဝ် ဂှ်” ၝောံပိုဒ်ဒးပလေဝ်ထေက်ပ္ဍဲသ္ဇိုၚ်သၞောဝ် ၂၀၀၈ ဂှ် သွက်ဂွံပလေဝ် ပိုယ်တအ် ပတိုန်ထ္ၜးလဝ် ပ္ဍဲကဵုကၠတ်ထဝ်တေံတုဲမံၚ်ရ၊ ရံၚ်အာၝောံပိုဒ် ၄၃၆ ဂှ်တှေ် အခက်အခုဲနွံဒၞံၚ်တၟာဟလိုၚ်ဏောၚ်၊ ဆ္ဂးယဝ်ရပလေဝ် ၝောံပိုဒ် ၄၃၆ မာန်တှေ် ၝောံပိုဒ်တၞဟ်ဟ်ကီု သၞောဝ်တၞဟ်ဟ်ကီုဂှ် ပလေဝ်လောဲအာဏောၚ်၊ ပလေဝ်ဂှ် ဒးပလေဝ်ထေက်ဍာံဍာံရ၊ နကဵုပိုယ်တှေ် နကဵုနဲၜိုဟ်ဟ်သြိုဟ်ဟ် ပြံၚ်သၠာဲအာဂှ်ရ မိက်ဂွံကဵုဒှ်” သာ်ဏံ ဟီုလဴရ။
အတိုၚ် ၝောံပိုဒ် ၄၃၆ ထမံက်ထ္ၜးလဝ်မ္ဂး ယဝ်ရပလေဝ်သ္ဇိုၚ်သၞောဝ်ဥပဒေမ္ဂး ပၞောဝ်ကဵုအလုံညးစၞးကၠတ်ထဝ်ကၟိန် ဍုၚ်ဖၟိုတ်ဂှ် ညးစၞး ရ၅ %တၟအ်ကၠံတအ် တုပ်စိုတ်ဒုၚ်တဲသွက်ဂွံပလေဝ်တုဲ၊ ကၠောန်ဗဒှ်ပေဲါဒုၚ်ဆန္ဒမာဲအလုံကၟိန် ဍုၚ်မွဲကီု၊ အပ္ဍဲကဵုမၞိဟ်အခေါၚ်ကဵုမာဲနွံအပံၚ်ဖၟိုတ် နကဵုဆန္ဒမာဲ ၅၀ တၟံကၠံပြၚ်ထံက်ဂလာန်မှ ပလေဝ်သ္ဇိုၚ်သၞောဝ်မာန် ဂွံတီကေတ်ရ။
အရၚ်သွက်ဂွံပလေဝ် ၝောံပိုဒ် ၄၃၆ ဂှ် ဗက်တြးကဵုမံၚ် လိခ်လၟေၚ်ကီု၊ ကၠောန်ဗဒှ်ပေဲါထပက်စၟတ်တဲ သွက်ဂွံပလေဝ်ၝောံပိုဒ်ကီု၊ ကၠောန်ဗဒှ်ပေဲါဟီုတွံသောၚ်ကလးကုညးဍုၚ်ကွာန်တအ်ဂှ် နကဵု ဗော် NLD ကေုာံ ဂကောံကွးဘာ ၈၈ တအ် က္ဍိုက်ဍိုပ်တုဲ ဒၞာဲရးဒေသဇၞော်တံကဵု တွဵုရးဂမၠိုၚ်တံဂှ် ကၠောန်သ္ပမံၚ် ပရေၚ် ချီဒရာၚ်ကီုရောၚ် ဂွံတီကေတ်လဝ်ရ။
