စပ်ကဵုအကာဲအရာပရေၚ်ဗော်၊ အကာဲအရာပရေၚ်ဍုၚ်ကွာန်ကဵု ဂကောံကောန်ဍုၚ်အရၚ်ရပ်လွဟ်တံ ဗီုပြၚ်ပညဳပညပ်သဳကၠဳလဝ် သွက်ဒေံါပန်ပှော် အလုံဍုၚ်ဂှ် ညးတာလျိုၚ်ဗော်ဍုၚ်မန်တၟိ သွာၚ်ပရေၚ်အပ္ဍဲဍုၚ် ကေၚ်ကာဗဟဵုနာဲဝေန်လှ က္ဍိုက်ပ်ကၠောန်သ္ပပေဲါဆဵုဂဗ သောၚ်ကလးကု ဂကောံမှာဇန်နာနာ တန်တဴဒၟံၚ်ပ္ဍဲဍုၚ်မတ်မလီုတံရ။

ဂိတုသေတ်တေန်ပါ ၁ အပ္ဍဲကၠောန်သ္ပ ပေဲါသောၚ်ကလး ဒၞာဲတိုက်ရံၚ်လိက်နာဲယှိုဲကျေန် လ္တူဍုၚ်မတ်မလီုဂှ် ဂကောံသၟတ်မန်လညာတ်တဴတက် MYPO ၊ MYEO ၊ MSDN ၊ ဂကောံညးဗြဴမန် MWO ၊ ဂကောံစေတနာ၊ ညိၚ် ဖမ်ဒေယှေန်ကေုာံ သီုကဵုဂကောံလ္တူဍုၚ် ၂၀ ဂကောံပြၚ် ညးစၞး ၜိုတ် ၃၀ တၠပြၚ် တိုန်စိုပ်လဝ်ရ။

ဗော်ဍုၚ်မန်တၟိ၊ ညးတာလျိုၚ်ဖောဝ်ဗြေဝ်ဒေသ သ္ကိုပ်ဗိုလ် M သိုက်ဆာန်ဂှ် “ပရေၚ် ထပက်စၟတ်တဲအလုံကၟိုန်ဍုၚ်ဂှ် ညးဍုၚ်ကွာန်တံဂွံတီမာန်ကီု ၊ လ္တူပိုယ်တံသောၚ်ကလးဂှ် မုညးတံ မိက်ဂွံကဵုကသပ်ရော၊ လပါ်ညးဍုၚ်ကွာန်တံပၠန် အခက်ခုဲညးတံဗီုလဵုနွံမံၚ်၊ မုနွံပၟိက်၊ မုမိက်ဂွံဟီု၊ ပိုယ်မိက်ဂွံတီ၊ မိက်ဂွံကေတ်လညာတ်ကီု ” သာ်ဝွံ ညးဟီုကဵု ဌာန် ပရိုၚ်ဗၠးၜးမန် IMNA ရ။

နကဵုဗော်ဍုၚ်မန်တၟိဂှ် ဂကောံပၠတရဴဗဟဵုက္ဍိုက်ပ်တုဲ ပ္ဍဲဇၟာပ်ဒေသခရိုၚ်ဂှ်လေဝ် အာစိုပ်ဆဵုဂဗသောၚ်ကလးကဵုလဝ် ညးဍုၚ်ကွာန်ဂမၠိုၚ်၊ ဂကောံလိက်ပတ်ယေန်သၞာၚ်၊ ဂကောံသၟတ်၊ ကေုာံ ခမဳသၚ်ဂမၠိုၚ်လေဝ် နွံမံၚ်ကီု ညးဆက်ဟီုရ။

“အပ္ဍဲပေဲါသဳကၠဳပရေၚ်ဍုၚ်ကွာန်တံဂှ် ညးစၞးဂကောံမဟာဇန်တံ ညံၚ်ဂွံပါလုပ်မာန်၊ ပ္ဍဲတွဵုရးဍုၚ်မန်ပိုဲဏံ မပ္တံ ဒးဒုၚ်သီတိကၠအ် ဟွံစှေ်ဗဗွဲဓဝ်တံဂှ် ညးဍုၚ်ကွာန်တံ ညံၚ်ဂွံကလေၚ်မာန်ပၠန်ဂှ် မုဗော်ဍုၚ်မန်တၟိ ရေၚ်တၠုၚ်ကဵုမာန်ရော သၟာန်လဝ်ရ” သာ်ဝွံ ဒု-ဥက္ကဌ ကမ္မတဳမၚ်ရံၚ်လ္ၚတ်ပရေၚ်ဒေံါပန်ပှော် နာဲမေန်မေန် ဟီုရ။

တၚ်ပတိုန်ထ္ၜးလဝ် ဆဵုဂဗသောၚ်ကလးဏံဂှ် ဆက်တုဲပတိုန်ထ္ၜးကဵု ဌာန်ဂအုပ်ဗဟဵုဗော်ဍုၚ်မန်တၟိရောၚ် ဂးရ။

ပ္ဍဲတွဵုရးဍုၚ်မန် တိကၠအ်ဒးဒုၚ်သီလဝ် ဂှ် ၜိုတ် ၂၂၀၀၀ ဨက ပြၚ်ပြၚ်နွံမံၚ်တုဲ အပ္ဍဲပွိုၚ်ဍုၚ်ရေဝ်၊ ပွိုၚ်ဍုၚ်ဇြပ်ဗုကဵု ပွိုၚ်ဍုၚ်ကျာ်မြဟ်တံဂှ် ဒးဒုၚ်သီလဝ်ဂၠိုၚ်အိ်ုတ်ရောၚ် ညးတိုန်စိုပ်တံ ပတိုန်ထ္ၜးတုဲ ဂွံတီရ။

နကဵုဗော်ဍုၚ်မန်တၟိဂှ် ဒုၚ်သ္ဇိုၚ်ကဵု ခရိုၚ်ထဝဲါ၊ ခရိုၚ်မတ်မလီု၊ ခရိုၚ်သဓီုတုဲ စနူသၞာံ ၂၀၁၂ စိုပ်သၞာံ ၂၀၁၄ မွဲသၞာံမ္ဂး အောန်အိုတ်မွဲဝါ ကၠောန်သ္ပလဝ်ပေါဲသောၚ်ကလးကု ညးဍုၚ်ကွာန်တံနွံကၠုၚ်ရ သာ်ဝွံ သ္ကိုပ်ဗိုလ် M သိုက်ဆာန် ဟီုရ။