ဂတဵုမုက်တွဵုရးဍုၚ်မန်တံ ညံၚ်ဂွံတောဲစုတ်သီုဘာသာမန်ဂှ် ပတိုန်လဝ်ဂလာန်ပ္ဍဲကၠတ်ထဝ်တွဵုရးယျ

by | Dec 9, 2014 | ပရိုၚ် | 1 comment

ဂတဵုမုခ် တိုက်အလဵုအသဳပိုၚ်ပြဳလဝ် ပ္ဍဲတွဵုရးဍုၚ်မန် မပ္တံ ရုၚ်ဂဥုဲ၊ ဘာဗ္တောန်လိက်ကဵု ရုၚ်အုပ်ဓုပ်တံ ညံၚ်ဂွံဓမံက်ထ္ၜးအာ သီုဘာသာမန် ကေုာံ ဘာသာဗၟာဂှ် ပ္ဍဲဒၞာဲကၠောန်သ္ပကောံဓရီု ကၠတ်ထဝ်တွဵုရး နူသတ္တဟ တုဲကၠုၚ်တေံဂှ် ဗတိုက်ဖအောဝ်လဝ်ရောၚ် သာ်ဝွံ ညးစၞးကၠတ် ထဝ်တွဵုရး၊ ပွိုၚ်ဍုၚ်ဇြပ်ဗု နာဲတၠဆာန် ဟီုကဵု ဌာန်ပရိုၚ်ဗၠးၜးမန်ရ။

ပ္ဍဲတ္ၚဲပထမ ကောံဓရီုလၟိုန်ဒဿမ ကၠတ်ထဝ်တွဵုရးဍုၚ်မန် အလန်ပထမဂှ် ညးစၞးကၠတ်ထဝ်တွဵုရး၊ နိုၚ်တၠဆာန် ဟီုဂှ် ဂၠံတိုက်ဆေၚ်ကဵုဌာန နာနာတံ မၞုံသၟဝ်တဲအလဵုအသဳ တွဵုရးဍုၚ်မန်တံဂှ် ယဝ်ရပံၚ်တောဲ ဓမံက်ထ္ၜးအာဏောၚ်တှေ် ဒှ်ဒၟံၚ်ညံၚ်ရဴရီုဗၚ်ကဵုမံၚ် ပရေၚ်ဖောဝ်ဗြေဝ် တဴတက် လိက်ပတ်ကောန်ဍုၚ်အရၚ်တံ ကီုဏောၚ်၊ ပ္ဍဲကောန်ဍုၚ်အရၚ်တံလေဝ် ပရေၚ်ညဳသၟဟ်ဂှ် ဒှ်အထံက်အရီုမာန်ရောၚ် ရန်တၟံတုဲ သဳကၠဳ သၟာန်သွဟ်လဝ် ပ္ဍဲကၠတ်ထဝ်ဂှ်ရ သာ်ဝွံ ဂးရ။

“ဣဏံဂှ် အလဵုအသဳလေဝ်ကဵုလဝ်အခေါၚ်ရ၊ ဗွဲမဂၠိုၚ်ဟိုတ်နူဟွံကၠိုဟ်ဂှ်ရ ဂတဵုမုခ်ဘာတံ၊ ရုၚ်ဂဥုဲတံ ဂွံချူစုတ်လိက်မန်ဂှ် ဟွံဂံၚ်ကၠောန် ပုဟ်၊ ဟွံဂံၚ်ကၠောန်ပုဟ်ဟီုဂှ်လေဝ် နူကဵုညးအုပ်ဓုပ်ပွိုၚ်ဍုၚ်တံ ချူလိက်မန်ဟွံဂွံ ဘပဠကၠုၚ်လဝ်နွံရ၊ ဟိုတ်ဂှ်ရ ကိစ္စဏံဂှ် ညံၚ်ဂွံလုပ်သၞောဝ် ပ္ဍဲကၠတ်ထဝ်မာန်ဂှ် အဲက္လေၚ်သၟာန်ရ " သာ်ဝွံ နာဲတၠဆာန်ဟီုရ။

ဆေၚ်ကဵုသၟာန်လဝ်တံဏံတုဲ ပ္ဍဲသ္ဇိုၚ်သၞောဝ်ဥပဒေ လိက်ပတ်ကောန်ဍုၚ်အရၚ်တံဂှ် ညးဍုၚ်ကွာန် ကောန်ဍုၚ်အရၚ်တံ ဟီု,ချူ ဗၠးဗၠးၜးၜးမာန်မံၚ် ပ္ဍဲသၞောဝ်ဥပဒေတေံ နွံမံၚ်ရောၚ်၊ ဘာအလဵုအသဳပိုၚ်ပြဳတံ၊ ရုၚ်ဂဥုဲတံ၊ ဆေၚ်ကဵုဌာနနာနာတံ ကေုာံဘာသာကောန်ဍုၚ် အရၚ် ပံၚ်တောဲဓမံက်ထ္ၜးမာန်မံၚ်၊ နကဵုအလဵုအသဳကၟိန်ဍုၚ် ပဒေါအ်မာန်ဟွံသေၚ်ပုဟ် နူကဵုကၠတ်ထဝ် ကလေၚ်သှ်ကဵုရ သာ်ဝွံ ညးဆက် ဟီုရ။

ကောံဓရီုကၠတ်ထဝ်တွဵုရးဍုၚ်မန် တ္ၚဲပထမဂှ် ဂတဵုမုခ်ရုၚ်အလဵုအသဳ ပိုၚ်ပြဳလဝ်တံ သီုကဵုသၟာန်လဝ် သွက်ဂွံပံၚ်တောဲစုတ် ဘာသာကောန်ဍုၚ်အရၚ်ဂှ်ကီု၊ တၚ်သၟာန်ထ္ၜးသၞံၚ် ၁၈ တၚ်၊ ဂလာန် ၃တၚ် ၊ သၞောဝ်အပြောံ ၂ တၚ်၊ သဳကၠဳပၠောပ်လဝ်ကီုရောၚ် ဂွံတီကေတ်ရ။

“သ္ဇိုၚ်သၞောဝ်ဥပဒေ ပ္ဍဲၝောံပိုဒ် ၂၂ ၊ အရေဝ်ကောန်ဍုၚ်အရၚ်ကဵု လိက်ပတ်ယေန်သၞာၚ်တံဂှ် နူကဵုကၟိန်ဍုၚ်တေံ ၜိုတ်ပမာန် ဒးရီုဗၚ်ရေၚ် တၠုၚ်ကဵုဏောၚ်ဟီုဂှ် နွံမံၚ်ဏောၚ်၊ ဣဏံဂှ် သွက်ကောန်ဍုၚ်အရၚ်သီုဖအိုတ် ဂွံညဳသၟဟ်မာန်ရ၊ လ္ၚဵုတံဂှ် ယၟုကောန်ဍုၚ်အရၚ်တံ ပ္ဍဲဒေသ ဇကု ပံၚ်တောဲတုဲ မိက်ဂွံချူမံၚ်ရ၊ ဣဏံဂှ် ကိစ္စထေက်ကဵုဒးဒှ်ဏောၚ်၊ ပ္ဍဲဒေသပိုယ်လေဝ် ဟိုတ်နူချူလဝ်ဗီုဏံတုဲ ပွိုၚ်ဍုၚ်/ရုၚ်အုပ်ဓုပ် နာနာတံ ဟိုတ်နူဟွံကဵုအခေါၚ်ဂှ် ကေၚ်ဒှ်ကၠုၚ်လဝ်ပြဿနာနွံမံၚ်” သာ်ဝွံ ညးစၞးကၠတ်ထဝ်တွဵုရး နူပွိုၚ်ဍုၚ်ၜါသွာၚ် အစာသဝ် အံၚ်နာၚ်ဥူ ဟီုရ။

ပဲါနူဂှ် ဒၞာဲပွိုၚ်ဍုၚ်ဇြပ်ဗု ရုၚ်အုပ်ဓုပ်ပွိုၚ်ဍုၚ်နာနာ ခဒမ်ၝောံခန်ကောံဓရီုဂှ် ကဵုလဝ်ယၟု “ခဒမ်ၝောံခန်ပရေံနံၚ်” ပ္ဍဲအရာကဵုလဝ်ယၟုဂှ် ဟိုတ်နူဒှ်ဒၟံၚ်ဒေသ ကောန်ဂကူမန်တံ တန်တဴဂၠိုၚ်တုဲ မိက်ဂွံကဵုက္လေၚ်သၠာဲထောံ ယၟုသၟိၚ်မန် (ဟဂှ်ဟွံသေၚ်တှေ်) သရာဲသ္ဂံၚ်မန် မွဲမွဲ ပ္ဍဲအရာပၠောပ်ဂလာန်ဂှ် နူကဵုကၠတ်ထဝ်တွဵုရးတံ တးပဲါထောံရောၚ် သာ်ဝွံ ဂွံမိၚ်အရေဝ် နာဲတၠဆာန် ဟီုတုဲ ဂွံတီကေတ်ရ။

ကၠတ်ထဝ်တွဵုရးဍုၚ်မန်ဂှ် နူကဵုပေဲါရုဲမာဲ ၂၀၁၀ တုဲ မံက်ဂတဝ်ကၠုၚ်တုဲ ကၠောန်ဒၟံၚ်ပေဲါကောံဓရီုလၟိုန်ဂှ် ဗၞတ် ၁၀ အလန်နွံတုဲ ကောံဓရီုလၟိုန် ဒဿမဂှ် ကၠောန်သ္ပလဝ် ပ္ဍဲဂိတု ဒဳဇြေန်ဗာ ၂၊ ၃၊ ၅၊ ဂှ်ရ။

Written by

Related Posts

ပရေင်တြးပၟတ်ဓာတ်လလဳ ပ္ဍဲဒေသရေဝ်သၟဝ်ကျာ ဖအောန်ဖျေံလဝ်အခိင်

ပရေင်တြးပၟတ်ဓာတ်လလဳ ပ္ဍဲဒေသရေဝ်သၟဝ်ကျာ ဖအောန်ဖျေံလဝ်အခိင်

ဟိုတ်နူပရေင်ခက်ခုဲကၠေင်စက်တုဲ ဓာတ်လလဳဒေသရေဝ်သၟဝ်ကျာ ဖအောန်ဖျေံအခိင် ဗလးပၟတ်ရောင် နူကဵုတၠကမၠောန် ဗလးဓာတ်လလဳ ပတိတ်လလောင်လဝ်ရ။

သွက်ဂွံလိင်မၞိဟ်ယိုက်ဝန်ပၞာန်ဗၟာ စၞးကွာန်ဂှ် အုပ်ဓုပ်ကွာန်တံ ကၠတ်ဗက်မံင်ဩန် နဲညးကဵုညးနွံ

သွက်ဂွံလိင်မၞိဟ်ယိုက်ဝန်ပၞာန်ဗၟာ စၞးကွာန်ဂှ် အုပ်ဓုပ်ကွာန်တံ ကၠတ်ဗက်မံင်ဩန် နဲညးကဵုညးနွံ

လဂွံကဵုသၞောဝ်ဥပဒေ ညးဍုင်ကွာန်တံ ဇၟာပ်အာယုက်စိုပ် ဒးလုပ်ယိုက်ဂၠေင်သ္ပကောန်ပၞာန်ဗၟာဂှ် အုပ်ဓုပ်ကွာန်တံ နဲကဲညးကဵုညး ကၠတ်ဗက်မံင်ဩန်တုဲ ဂၠာဲလိင်ဗပေၚ်စုတ်လဝ်မၞိဟ် စၞးကွာန်နွံ ရောင် ညးလုပ်ဂကောံအုပ်ဓုပ်ကွာန် ပွိုင်ဍုင်ရေဝ်သၟဝ်ကျာ မွဲတၠ ဟီုလဴထ္ၜးရ။

ပ္ဍဲတ္ရဲကောန်ဂကူမန်ဂှ် ဟွံကၟာတ်ဘာလေဝ် ကွးဘာတိုန် ဟွံမွဲ

ပ္ဍဲတ္ရဲကောန်ဂကူမန်ဂှ် ဟွံကၟာတ်ဘာလေဝ် ကွးဘာတိုန် ဟွံမွဲ

ပ္ဍဲတ္ၚဲကောန်ဂကူမန် မာ် (၁) စွေက်ဂှ် ၜိုန်ရဘာဟွံကၟာတ်ကၠာလေဝ် နကဵုဓဝ်သမ္တီဇကုကဵုဇကု ကွးဘာတံ ဟွံတိုန်ဘာအိုတ်ရောင် မိမတံကဵု ကွးဘာတံ ဟီုရ။

1 Comment

Submit a Comment

Your email address will not be published. Required fields are marked *

This site uses Akismet to reduce spam. Learn how your comment data is processed.