လလောၚ်တြးပေါဲဗှ်လိခ်စံၚ်ဍုၚ်ရေဝ်(Copy)
ကမ္မတဳကၠောန်ဗဒှ်ပေဲါဗှ်လိက်စံၚ်တအ် ဟီုထ္ၜးရ။
ဂိတုဂျူလာၚ် (၇) အခိၚ်နူဂယးဂှ် ဂကောံမဟာဇန် ပ္ဍဲပွိုၚ်ဍုၚ်ရေဝ်ကီု ညးနွံပ္ဍဲဒေသဍုၚ်ရေဝ်ကီု ဂကောံသၚ်တံကီု ညးနွံတာလျိုၚ်ပွိုၚ်ဍုၚ် (ဦးစီးမႉး) သီုဂကောံ (ကဝ် ၃ ကဝ်) တံကီု ဂကောံသၟတ်တံ သီုဖအိုတ် ၜိုတ် (၆၀) တၠ တိုန်စိုပ်သဳကၠဳ ဖျေံလဝ်သ္ဂုတ်သွာတ် သွက်ဂွံကၠောန်အာ ပေဲါဗှ်လိက်စံၚ်ဂှ်ရောၚ်။
“ဂိတုခ္ဍဲသဳ (၈) မံက် (၂၃-၈-၂၀၁၅) တေံတှေ် နာဲဇြာန်ဝေန် အ္စာဝၚ်သုတေသန ကေုာံ ညးဗှ်လိက်စံၚ် ဗၞတ် (၁၀) တၠတံ ပြာပ်ကၠုၚ်တုဲ လိက်စံၚ်စှ်က္ဍိုပ်ပရောဂှ် ညးတံဗှ်ထ္ၜးကဵုရောၚ်” သာ်ဝွံ ညးအုပ်ကာ ကမ္မတဳကၠောန်ဗဒှ်ပေဲါဗှ် လိက်စံၚ်သုတေသနဝၚ်ဍုၚ်ရေဝ်တြေံ နာဲလောန် ဟီုရ။
ပ္ဍဲတ္ၚဲကၠောန်ဗဒှ် ပေဲါဗှ်လိက်စံၚ်ဂှ် အ္စာသုတေသနဝၚ် နာဲဇြာန်ဝေန်ကီု နူနေပျဳဒဝ် ကေုာံ နူတက္ကသိုလ်မတ်မလီု အ္စာဝၚ် (၁၀) တၠတံ ပရောဝၚ်ဍုၚ်ရေဝ်တြေံဒှ်တမ်တုဲ ပရေၚ်တဴတက်ဖောအ်ဗြေဝ် ဍုၚ်ရေဝ်တံဂှ် နကဵုက္ဍိုပ်လိက် စံၚ် (၁၀) ကၞပ်ဂှ် ဗှ်ထ္ၜးအာရောၚ်။
“ဒုၚ်သ္ဇိုၚ်ကဵု လိက်စံၚ်သုတေသန ဝၚ်ဍုၚ်ရေဝ်တြေံတုဲ မွဲကရောံဂှ် ဝၚ်ဍုၚ်လၟိုၚ်တြေံလေဝ် ဆေၚ်စပ်ကၠုၚ်ကီု ဏောၚ်” သာ်ဏံ ညးမတိုန်စိုပ်လဝ် ပေဲါသဳကၠဳဂွံဗှ်လိက်စံၚ်မွဲတၠ မာံပရ ဟီုရ။
သွက်ဂွံသ္ပဒတန်ဝၚ်ဍုၚ်ရေဝ်တြေံဂှ် နူတက္ကသိုလ်မတ်မလီု ပါမောက္ခဒံက်တာမိကျေန်သွာန် (ဒေါက်တာဒေါ်ကြၚ် စွမ်) ကဵု ကောန်ဂကောံသုတေသန (၁၂) တၠတံ ကၠုၚ်လ္ၚတ်လဝ် ဒေသဍုၚ်ရေဝ် (၅) အလန်တုဲအာယျရောၚ် ဂကောံကမ္မတဳကၠောန်ဗဒှ်တံ ဟီုရ။
နူကဵုအလဵုအသဳတွဵုရးဍုၚ်မန် ဝန်ဇၞော်မန်နဲသဵု ကေုာံ ဝန်ဇၞော်နာဲလွဳအံၚ်တံ က္ဍိုက်က္ဍိုပ်တုဲ ပံၚ်ကောံကဵုဂကောံကမ္မ တဳကၠောန်ဗဒှ် (၃၀) တၠပြၚ်ဂှ် သွက်ဂွံထၟံက်အာရုပ်ရဴ ပေဲါဗှ်လိက်စံၚ်ဏံရောၚ်။
ပ္ဍဲတွဵုရးဍုၚ်မန်ဝွံ ဒုၚ်သ္ဇိုၚ်ကဵုဍုၚ်တြေံတုဲ ကၠောန်ဗဒှ်မံၚ်ပေဲါဗှ်လိက်စံၚ်ဝၚ်ခၞံဍုၚ် မပ္တံကဵုဍုၚ်သုဝဏ္ဏဘုံ၊ ဍုၚ်မုဟ်တၟံ၊ ဍုၚ်ဝါခရူတံကီုလေဝ် လၟုဟ်ကၠောန်ဗဒှ်ပ္ဍဲဍုၚ်ရေဝ်ဂှ် အလန်ကၠာအိုတ်ရောၚ်။
