လိက်လလောၚ်တြး UNFC
အရာ ကရေက်ကလှေ်ပ္တ္တိ်တ် ဒြဟတ်ကောန်ဍုၚ် အရၚ်တံတုဲ မၚ်ဗ္တိုက်သ်အးမံၚ်ဏောၚ် သာ်ဝွံ ပ္ဍဲအံက်တဝ်ဗာ ၁၀ ဂှ် UNFC (ကံၚ်ဇြဳဝှိဒ္ဒရေဝ် ကောန်ဍုၚ်အရၚ် မညဳသၟဟ်) ပ္တိတ်လဝ် လိက်လလောၚ်တြးရ။
ဟိုတ်နူ ပါလုပ် သီုဂကောံဖ်အိုတ် ဟွံသေၚ်ဂှ်ရ ဗီုအလဵုအသဳ ဍိုက်ထ္ပက်မံၚ်ပၞာန် ကုဂကောံရပ်လွဟ် ဟွံဒှ်ထ္ပက်စၟတ်တဲ ပ္ဍဲကာလလၟုဟ်ဏံဂှ် တုပ်တဴညံၚ်ရဴ မထောကဵုထ္ပက်စၟတ်တဲ အတေၚ်ကီုရ။ နဲပတှေ်ဒြဟတ်တုဲ သောၚ်က္လးကၠုၚ် ဗ္ဒါဲ (၇၀ ) သၞာံ ဟွံဂွံရဂှ် အလဵုအသဳ ကပှ်တုဲ က္လေၚ်ပၠောပ်မံၚ် လမျီုဏောၚ် UNFC ဂးရ။
“ ဒုၚ်ယၟု ဒိုအ်ပန်ပှော် အလုံမွဲဍုၚ်တုဲ ဂကောံရပ်လွဟ် ညံၚ်ဂွံပါလုပ် သီုဖ်အိုတ်ဂှ် ဟွံဖန်၊ စွံပသှေ်လဝ် ဂကောံလ္ၚဵုလ္ၚဵုတုဲ ကဵုဂကောံ လ္ၚဵုလ္ၚဵုရ ဒုၚ်ထ္ပက်စၟတ်တဲဂှ် ဒှ်ပွ ကရေက်ကလှေ်ပ္တိတ် ဒြဟတ် ကောန်ဍုၚ်အရၚ်တုဲ မၚ်ဗ္တိုက်ဖ်အိုတ်မံၚ် နကဵုကသပ်ပရေံပရေံဏောၚ်။ အတိုၚ်ပိုဲ ထေၚ်လဝ်ဂှ်ရ လၟုဟ် ဍိုက်ဗ္တိုက်မံၚ် ကုဂကောံ ဟွံဒှ်ထ္ပက်စၟတ်တဲဂှ် ဒှ်အရာ ဓမံက်ထ်ၜး အဇှေ်အမှေ် ဍေံတံရ” သာ်ဝွံ နာဲဟံသာ ဒုဥက္ကဌ UNFC ဟီုရ။
ထ်ၜးဗီုကဵု ပရေၚ်ၜိုဟ်လလံတုဲ ယဝ်ဆက်ဓမံက်ရုပ်ရဴ အတိုၚ်နဲတြေံ အခိုက်သ္ပမာန်ကဵု ဒြဟတ်ပၞာန် မဒှ်ကွေတ် ဝါဒမဟာဂကူ အလဵုအသဳပၞာန် အဆက်က် မစကာကၠုၚ်လဝ်ဂှ် ဏီမ္ဂး ပရေၚ်ၜိုဟ်လလံ အပ္ဍဲဍုၚ်ဂှ်လေဝ် တရဴဍေံသ္ၚောဲမံၚ်ဏီဏောၚ် UNFC လလောၚ်ပ္တိတ်လဝ်ရ။
ပ္ဍဲဂိတု အံက်တဝ်ဗာ (၁၅) ဏံ သွက်ဂွံထ္ပက်စၟတ်တဲ လိက်ကသုက် NCA နကဵု ဂကောံရပ်လွဟ် (၈) ဂကောံဂှ် အလဵုအသဳ သမ္မတ တိၚ်သိၚ် ဖန်ဇန်မံၚ် သွက်ဂွံကၠောန် အသေအဟာန် ပဋဳပဋဳပဒါပဒါ ပ္ဍဲနေပျဳဒဝ် တေံတုဲ မွဲလ္ပာ်ဂှ် နကဵုပရေၚ်ပၞာန် လုပ်ဗ္တိုက် ဒဵုကဵုစိုပ် ဝါမ်ဟာဲ ဒၞါဲဌာန်ဂအုပ် ဗော်ပရေၚ်တောတက် ရးသေံဇၞော် (SSPP) တေံဏောၚ် ကြဵုဇာကၠုၚ်တုဲ သ္ပမံၚ်ပေါဲဗ္တိုက် ဇၞော်ဇၞော်ဖိုဟ်ရ။ ကုဒပ်ပလံၚ် (PSLF/TNLA) ဂှ်လေဝ် ထ်ၜးဟိုတ်နာနာသာ်တုဲ ဒပ်ပၞာန် အလဵုအသဳ ဍိုက်ထ္ပက်မံၚ်ပၞာန်ဖိုဟ်ရ။ ဗီုဂှ်ကီု ကုဂကောံကချေၚ် KIO ဂှ်လေဝ် ဒပ်အလဵုအသဳ ဍိုက်ဗ္တိုက်မံၚ် သ္ကာတ်တ်မြဟ်ဟ်ရ။ ဆဂှ်သၟးဟွံသေၚ် လ္ပာ်ဒေသ တွဵုရးကရေၚ်ဂှ်လေဝ် လွဟ်ဗြုတိုန်မံၚ်တုဲ အရာထ္ပက်ပၞာန်လေဝ် နွံမံၚ်ဂှ် ဂွံဆဵုကေတ် သာ်ဝွံ ဂွံညာတ်ကေတ် ပ္ဍဲလိက်လလောၚ်တရး UNFC ရ။
အပ္ဍဲကဵု ဂကောံရပ်လွဟ် (၁၅) ဂကောံ အလဵုအသဳ ကော်ဘိက်လဝ်ဂှ် ဗော်ကရေၚ် KNU၊ ဒပ်ကရေၚ် DKBA၊ ဒပ်ကရေၚ် KNU/KNLA-PC ၊ ကံၚ်ဇြဳက္လေၚ်ပ္တန်ရးသေံဇၞော် RCSS ၊ဂကောံပရေၚ်ဗၠးၜး ဂကူပအိုအ် PNLO၊ မုက်ဒပ်ဂကူချေၚ် CNF ၊ ဗော်ပရေၚ်ဗၠးၜး ရးရခေၚ် ALP ၊မုက်ဒပ် ဒဳမဝ်ကရေတ်တေတ် ကွးဘာ အလုံရးဗၟာ ABSDF တံ (၈) ဂကောံဂှ် အံက်တဝ်ဗာ ၁၅ ဏံမ္ဂး ညးတံ ထ္ပက်စၟတ်တဲ လိက်ကသုက် ဒိုအ်ပန်ပှော် NCA ဏောၚ်။
ဥုလှမိုၚ်ယှိုဲ မၞိဟ်ကဵုကသပ် အဆံၚ်လ္တူ နူဌာနပရေၚ်ၜိုဟ်လလံဗၟာ MPC ဂှ်် “စပ်ကဵုကိစ္စ လလောၚ်လဝ် ဂကောံဟွံဗဗွဲဓဝ်ဂှ်တုဲ နူကၠာ ဟဂွံထ္ပက်စၟတ်တဲ NCA ၜိုတ် ၂/၃ တ္ၚဲဂှ်မ္ဂး နူအလဵုအသဳ ဇိုတ်ပလီုဏောၚ် ဒုၚ်လဝ်ကအ်ပါၚ်ရ။ အကၠာဂှ် ဟီုလဝ် ထ္ပက်စၟတ်တဲတုဲမှ ဇိုတ်ကဵုဏောၚ်ဂးလဝ်၊ ဆ္ဂး လၟုဟ်ပၠန် ကၠာဟွံဂွံထ္ပက်စၟတ်တဲဂှ် ဇိုတ်ကဵု ယၟုဂကောံ ဟွံဗဗွဲဓဝ်ဏောၚ် အဟိန်သဳကၠဳမံၚ်ကဵု ဂကောံရပ်လွဟ် (၈) ဂကောံဂှ် နူအလဵုအသဳ ဟီုလဝ်နွံ” ဂးရ။
ဒှ်သာ်ဂှ်ရ ကုဂကောံ ရပ်လွဟ် ဟွံဒှ်ထ္ပက်စၟတ်တဲ NCA ဂှ် နူစရၚ် ဂကောံဟွံဗဗွဲဓဝ် ဂှ် အလဵုအသဳ ဇိုတ်ကဵု ဟွံသေၚ်ရ။
“ဂကောံ ရပ်လွဟ် ကောန်ဍုၚ်အရၚ်ပိုဲဂှ် တန်တဴကၠုၚ် နကဵုယၟု ဂကောံဟွံဗဗွဲဓဝ် မွဲအလုံကာလ ပၠန်ဂတးရ။ ကိစ္စ ဗဗွဲဓဝ် ဟွံဗဗွဲဓဝ် ဟီုဂှ် တဴရဴ အလဵုအသဳရ။ သ္ဇက်ဒး ဒှ်ဓဝိၚ်ဟွံမွဲ” နာဲဟံသာ ဂးရ။
ကာလလၟုဟ်မ္ဂး ပ္ဍဲဒေသ တွဵုရးသေံဇၞော် ကဵု တွဵုရးကချေၚ် တေံဂှ် ဒပ်အလဵုအသဳ ကဵု ဒပ်ဗော်သေံဇၞော် SSPP ၊ဒပ်ကချေၚ် KIO မဟွံဒှ်ထ္ပက်စၟတ်တဲတံ ဆက်ဒှ်မံၚ်ပေါဲဗ္တိုက်ဖိုဟ်ရ။
