ကျာ်ဇၞော်အစာတံ တက်လဝ်ဗီုစၟတ်သမ္တီ(SOI MON Facebook)
မလီု အံက်တိုဝ်ဗါ ၉ ဂှ် ကျာ်ဇၞော်အ္စာ ၂ ဇကု ဟီုမြော်ထ်ၜးရ။
တရဴကျာ်ဇၞော်အ္စာ အာတွံဓရ်သွက်ဂွံထံက်ပၚ်ပရေၚ်ပညာ ကောန်ဂကူမန်အလန်ဏံဂှ် ဍုၚ်သေံဂှ်ဂွံ ၁၇၅ ကိုဋ်၊ ဍုၚ်မလေဝ်ယှာဂှ် ၈၆ ကိုဋ်၊ ဍုၚ်သေၚ်္ဂပေါဝ်ဂှ် ၅၁ ကိုဋ် ဂွံနၚ်သြန်ထံက်ပၚ်ရ၊ သြန်ထံက်ပၚ် နကဵုထိုၚ် လိက်ဂှ် လက္ကရဴ သွက်သ္ဂောံဂွံနွံမံၚ်ဏီရောၚ် ကျာ်ဇၞော်အ္စာၜါဇကုဂှ် မြော်ထ်ၜးရ။
‘သြန်သွက်ဂွံတွံဂွံဓရ်သၟးဂှ် ဂွံၜိုတ် ၃၀၀ ကိုဋ်ပြၚ်၊ ဝတ္ထုဒါန်ထိုၚ်လိက်ဂှ်တှေ် လက္ကရဴနွံမံၚ်ဏီ ဆဂးဂလိုၚ် လဵုဂှ် ဟွံတီဏီ၊ ရံၚ်ကေတ်တှေ် ကောန်မန်ပိုဲနွံၚ်ဍုၚ်ညးတၞဟ်တံ စိုတ်ထတ်လုပ်စကဵုပရေၚ်ပညာမန် ပိုဲ တၟာ ဂလိုၚ်’ ကျာ်ဇၞော်အ္စာ ဘဒ္ဒန္တ ကေုတုမာလာ ဟီုမြော်ရ။
ကျာ်ဇၞော်အ္စာဘဒ္ဒန္တ ကေတုမာလာ ကဵု ကျာ်ဇၞော်အ္စာဘဒ္ဒန္တ သဳလဝန္တ ၜါဇကုဝွံ စပ္တံနူသၞာတုဲကၠုၚ်တေံ နကဵုတာလျိုၚ် ကမ္မတဳပရေၚ်ပညာဗဟဵု သွာၚ်ဂၠာဲသြန်ဂအုံဂှ် တိတ်မံၚ်တရဴတွံဓရ်ဍုၚ်မ္ၚး သွက်သ္ဂောံဂွံ သြန်ဂအုံပရေၚ် ပညာကောန်ဂကူမန်ရ။
ပ္ဍဲကဵုတရဴအလန်ဏံဂှ် ဆဵုဂဗကဵု ညးတၠဒါန်စိုတ်လုပ်စကဵုပရေၚ်ဘာကောန်ဂကူမန်ဂှ်တုဲ သီုဂွံနၚ်ဂတိပါၚ် သွက်ဂွံသိုၚ်ပ္တန််ဘာမွဲမနွံရောၚ် ကျာ်ဇၞော်အ္စာၜါဇကုဂှ် သ္ဂးရ၊ ‘ပိုဲဆဵုဂဗကဵု ကုမ္ပဏဳမန် လွဳမာန် ပ္ဍဲဍုၚ်သေၚ်္ဂ ပေါဝ်တေံတုဲတှေ် ဍေံကဵုထံက်ပၚ် သိုၚ်ကဵုဘာကောန်ဂကူမွဲမ ၚ္ၚုဟ်ၜိုတ် ၁၀၀ ကိုဋ်၊ အပ္ဍဲကဵုပွိုၚ်ဍုၚ်ဇြပ်ဗု မွဲမနွံရောၚ်’ ကျာ်ဇၞော်အ္စာၜါဇကု ဂှ်ဟီုမြော်ထ်ၜးရ။
စပ်ကဵုဘာကောန်ဂကူမန်ဂှ် မန်ပိုဲနွံမံၚ်ဍုၚ်မ္ၚးတေံလေဝ် စိုတ်ဓါတ်ညးတအ်ကတိုၚ်ကၟိုဟ်ကၠုၚ်၊ ဆဂး တှေ် ညးတအ်သၟာန်ကလးကၠုၚ်နွံ ညးတအ်မၚ်ဗဵုလ္ၚတ်နွံမံၚ်ဏီ၊ ယဝ်ခါရ ဂကောံပညာပိုဲဏံ ကၠောန်စှေ် ဗီု ချိုတ်ပၠိုတ်၊ ညးတအ်စိုတ်လုပ်စဂၠိုၚ်ကၠုၚ် ညးတအ်ထံက်ပၚ်ကၠုၚ်သြန်ဒါန်လၟေၚ်သၞာံဒှ်ကၠုၚ် သွက် သြန်ဂအုံပညာဂှ် ဟွံဒးဇြိုၚ်စိုတ်ရောၚ် ကျာ်ဇၞော် ၜါဇကုဂှ် ဟီုမြော်ထ်ၜးရ။
ကမ္မတဳပရေၚ်ပညာဗဟဵု ကျာ်ဇၞော်အ္စာၜါဇကုဝွံ အခိၚ်ခမဳသၚ်ဂမၠိုၚ်လုပ်ဒ္ဂိုန်လေဝ် ဟွံဂွံဒၟံၚ်ပ္ဍဲဘာတုဲ တိတ်တရဴတွံဓရ်ဍုၚ်သ်အာၚ် ဂၠာဲသြန်ဂအုံသွက်ဂွံထံက်ပၚ်ပရေၚ်ပညာမန်ရ၊ ‘ဗီုကျာ်ဇၞော်အ္စာၜါဇကုကေတ် ဒၟံၚ်တာလျိုၚ်ကိစ္စပညာ ချဳဒရာၚ်ဒၟံၚ်ပရေၚ်ဂကူဂှ် မွဲအခိၚ်မွဲအခါ ထေက်ကဵုဒးပ္တိုန်ဂုဏ်စရာဲကဵု ကျာ်ဇၞော်ၜါ ဇကုဂှ် ထေက်ရောၚ် ဥက္ကဌကမ္မတဳသြန်ဂအုံပညာ ပွိုၚ်ဍုၚ် နာဲဗညာဂ္ဇံ ဟီုကေတ်စရာဲကျာ် လ္တူကျာ်ဇၞော် ၜါဇကုဂှ် ရ။
