အိုက်သာၚ် – “ကွေံကွေံ။ ကောန်ဂကောံ UNA ပိုဲ သ္ပကောံဓရီုတုဲတှေ် ပ္ဍဲအခန်ပရေၚ်ဍုၚ်ကွာန်ဂှ် ဗီုလဵု ဂွံပံၚ်အာကဵု ဗော် NLD ရောဂှ် သဳကၠဳညးသ္ကအ်ဏောၚ်။ ဆ္ဂး ဟွံဂွံ ချိၚ်တ္ၚဲ ချိုတ်တ်ပၠိုတ်တ်ဏီ။ ချပ်စကဵု ဥုဃောန်ထောန်ဥု တအ်တုဲမှ သ္ဂုတ်သွာတ်ဏောၚ်” ဥုအေသာအံၚ် ညးက္ဍိုပ် ဂကောံ UNA ဟီုရ။

ပ္ဍဲပေါဲရုဲမာဲ ၂၀၁၅ ဝွံ ပၞောဝ်ကဵု ကောန်ဂကောံ UNA ဂှ် ဗော်ဂဥပ်ဒဳမောကရေဇြဳ ကောန်ဂကူသေံ ဇၞးမာဲ က္လိဂွံ သွက်ကၠတ်ထဝ် ညးဍုၚ်ဂှ် ၁၂ တလ၊ သွက်ကၠတ်ထဝ်ကောန်ဂကူဂှ် ၃ တလ၊ သွက်ကၠတ်ထဝ် တွဵုရးဂှ် ၂၅ တလ။ ဗော်ကောန်ဂကူရခေၚ်လေဝ် ဇၞးမာဲ က္လိဂွံ သွက်ကၠတ်ထဝ် ညးဍုၚ် ၁၂ တလ၊ သွက်ကၠတ်ထဝ် ကောန်ဂကူ ၁၀ တလ၊ သွက်ကၠတ်ထဝ် တွဵုရး ၂၅ တလ။ ဗော်ကောန်ဂကူမန်ဂှ် ဇၞးမာဲ က္လိဂွံ သွက်ကၠတ်ထဝ် ကောန်ဂကူဂှ် ဂွံ ၁ တလ၊ သွက်ကၠတ်ထဝ် တွဵုရးဂှ် ၂ တလ။ ဗော်ဂဥုပ် ဒဳမောကရေဇြဳ ဇြဵုမဳ ဂှ်လေဝ် ဇၞးမာဲ က္လိဂွံလဝ် ၆ တလ ကီုရ။

ဟိုတ်နူ ဗော် NLD ဇၞးမာဲ က္လိဂွံအမာတ် ဂၠိုၚ်နူ ဗ်ၜတ် မပံက်အလဵုအသဳမာန် ဂှ်ရ သာ်လဵု ဂွံပံၚ်ကၠောန် ကလောန် ပရေၚ်ဍုၚ်ကွာန် အနာဂတ် ကရောံ NLD ရောဂှ် ကောန်ဂကောံ UNA တအ် သ္ဒးကၠောန်ကောံဓရီု မွဲဏောၚ် ဖျေံလဝ်သ္ဂုတ်သွာတ်နွံ ဥုအေသာအံၚ်ဟီုရ။

ၜိုန်ဂှ်လေဝ် တ္ၚဲလဵု သ္ပကောံဓရီုရောဂှ် ချိၚ်စွံလဝ် တ္ၚဲချိုတ်တ်ပၠိုတ်တ် ဟွံမွဲဏီတုဲ ပ္ဍဲတတိယသတ္တဟ ဂိတုဏံ ညံၚ်ဂွံသ္ပကောံဓရီုမာန်ဂှ်လေဝ် ဖန်ဇန်မံၚ်ဖိုဟ် ဂွံတီကေတ် နူဂကောံ UNA ရ။

ကၠာဟွံစိုပ် အ္ခိၚ်ပေါဲရုဲမာဲ ၂၀၁၅ က္ဍၚ် ဒေသညးကဵုညး ညံၚ်ဂွံဇၞးမာဲ ဒၞါဲဂၠိုၚ်ၚ်ဂှ် ကောန်ဂကောံ UNA တအ် ကၠောန်ကၠုၚ် သ္ဘၚ်သဳကၠဳ အလန်တတိယ ပ္ဍဲဂိတု ဂျူလာဲ နူ ၂ရ ဒဵုကဵု ၂၉ ဂှ် တုဲဒှ်တုဲမှ ညးတအ် လုပ်ကၠုၚ်ပေါဲရုဲ ပေါဲရုဲမာဲဏောၚ်။

ဂကောံ UNA ဝွံ ကေုာံဂကောံ ရပ်လွဟ် ကောန်ဍုၚ်အရၚ်ဂမၠိုၚ် မပ္တံဗော်ကောန်ဂကူကရေၚ် KNU၊ ကံၚ်ဇြဳက္လေၚ်ပ္တန်ရးသေံ RCSS၊ ဗော်ပရေၚ်ဗၠးၜး ရးရခေၚ် ALP ၊ မုက်ဒပ်ဂကူချေၚ် CNF ၊ ဗော်ဍုၚ်မန်တၟိ NMSP ၊ ကံၚ်ဇြဳပရေၚ်ၜိုဟ်လလံ KNU/KNLA-PC ၊ဂကောံဒပ်ကရေၚ် DKBA တအ်ဂှ်လေဝ် ဒက်ပ္တန်လဝ် ပရေၚ်ဆက်ဆောံတၟိ မွဲကီု ဂွံတီကေတ်ရ။

ဂကောံ UNA ဝွံ ပပ္တံနူ သၞာံ၂၀၁၂ ၊ ဂိတုမေ ၁၈ တေံတုဲ ဒက်ပ္တန်ကၠုၚ် ဂကောံ နကဵုဗော်ဂမၠိုၚ် မဇၞးလဝ်မာဲ ၁၉၉၀ တေံ မတွံဂး ဗော်ဒဳမောကရေဇြဳမန်၊ ဗော်ဂဥုပ် ဒဳမောကရေဇြဳ ဇြဵုမဳ၊ ဗော်ကောန်ဂကူ ရခေၚ်၊ ဗော်ဂဥပ် ဒဳမောကရေဇြဳ ကောန်ဂကူသေံ၊ ဗော်ကောန်ဂကူကယာန်၊ ဗော်ကောန်ဂကူကရေၚ်၊ ဗော်ဒဳမော ကရေတ်တေတ် ကဝ်က ရးသေံဇၞော်၊ ဗော်ကောန်ကရေတ် ဒဳမောကရေဇြဳ ကောန်ဂကူသေံ တအ်ရ။