ဗညာအံၚ် – ပ္ဍဲပေါဲရုဲမာဲ သၞာံ ၂၀၁၅ ဏံ အမာတ် စၞးဗော်မန်တအ် ဟိုတ်ဒးကျအာမာဲဂှ် ဒၟါနူ ဗော်မန် ဒှ်မံၚ် ၂ ဗော်တုဲ ကျအာမာဲဏောၚ် စွံအဓိကကဵုဟိုတ်ဂှ်တုဲ ဟီုဂးနွံမံၚ်ကီုလေဝ် နကဵုအဲ (ညးချူလိက်ဏံ) ပါဲကၠေံပရေၚ် ၂ ဗော်ဂှ်တုဲ ပ္ဍဲကဵု ဟိုတ်ဒးကျမာဲ နွံမံၚ်ဂလိုၚ်ဂှ် ဒၟါနူကောန်ဂကူမန် ဒေသကွာန်ရးတအ် လုပ်စုတ်မာဲ အောန်လောန်ဂှ်လေဝ် ပါမွဲတၚ်ကီုဏောၚ်ဂှ် မိက်ဂွံပ္တိုန်ထ္ၜးဏာရ။
က္လေၚ်သ္ၚဳဂၠိပ်ရံၚ် ပေါဲရုဲမာဲ သၞာံ၂၀၁၅ ၊ဂိတုနဝ်ဝေမ်ဗာ (၈) တုဲကၠုၚ်ဏံဂှ်မ္ဂး ပ္ဍဲတွဵုရးမန်ပိုဲဏံ ၜိုတ်မၞိဟ် ဂွံလဝ်အခေါၚ်ကဵုမာဲဂှ် လုပ်ကဵုမာဲ သီုဖၟိုတ်ဟွံသေၚ်တုဲ ပ္ဍဲမၞိဟ်နွံကဵု အခေါၚ်ကဵုမာဲဂှ် မၞိဟ်ၜိုတ်ကဝက်ပြၚ်ညိ (၅၁.၃ တၟံကၠံ) ဟေၚ်ရ လုပ်စုတ်မာဲရ။ ပ္ဍဲပွိုၚ်ဍုၚ် (၆) ပွိုၚ်ဍုၚ် ဒၞါဲမန်တအ် နွံဂၠိုၚ်ၚ်ရ ဂှ်လေဝ် ဂွံလဝ်အခေါၚ်ကဵုမာဲတုဲ ဟွံစုတ်မာဲဂှ် ကဝက်ပြၚ်မံၚ် ဂွံတီကေတ်ရ။ ရံၚ်ကေတ် အတိုက်ခံက်အၚ် စရၚ် သၟဝ်ဏံမ္ဂး ပ္ဍဲတွဵုရးမန် ညးမၞုံကဵု အခေါၚ်ကဵုမာဲ နွံမံၚ် ၁၅ ကိုဋ်ပြၚ်တုဲ အပ္ဍဲစှ်သုန်ကိုဋ်ဏံ မၞိဟ်ဟွံဂွံစုတ်မာဲ နွံမံၚ်ၜိုတ် ရ ကိုဋ်ဂှ် ဂွံဆဵုကေတ်ရ။
ညးနွံအခေါၚ်ကဵုမာဲ ၅၁.၃ %
| လၟေၚ် | ပွိုၚ်ဍုၚ် | ညးနွံအခေါၚ်ကဵုမာဲ | ညးကဵုမာဲ | ဗ္ၜတ်ကဵုလဝ်မာဲ |
| 1 | မတ်မလီု | 205372 | 118093 | 57.5% |
| 2 | ဇြပ်ဗု | 124300 | 56952 | 45.8% |
| 3 | ကျိုက်မြဟ် | 157468 | 68011 | 43.2% |
| 4 | ဝါသွာၚ် | 127249 | 56573 | 44.5% |
| 5 | မုဟ်ဍုၚ် | 165376 | 76836 | 46/5% |
| 6 | ရေဝ် | 168826 | 81719 | 48.4% |
| 7 | သဓီု | 175938 | 96896 | 55% |
| 8 | ပံၚ် | 172157 | 85101 | 49.4% |
| 9 | ကျိုက်ထောဝ် | 110779 | 74468 | 67.2% |
| 10 | ၜဳကလေၚ် | 127021 | 72217 | 56.9% |
| အပံၚ်ဖအိုတ် | 15,34,486 | 7,86,866 | 51.3% |
ဗော်မန်တအ် ပတှေ်ဆၜိုတ်မာဲမန်သၟး
သွက်ဂွံဇၞးပေါဲရုဲမာဲဏံဂှ် ဗော်မန်တအ် ပတှေ်လဝ် ဆၜိုတ်မာဲ ကောန်ဂကူမန်တအ်သၟးရ။ ဂကူတၞဟ်ဟ် တန်တဴမံၚ် ပ္ဍဲဒေသဇကု ညံၚ်ဂွံစုတ်မာဲကဵု ဇကုကီုဂှ် ညးတအ် စန်ဒက် ချဳဒရာၚ် ဟွံဆဵုမွဲလှေ်ရ။မိၚ်လေဝ် ဟွံကေၚ်မိၚ်ရ။ ပ္ဍဲပွိုၚ်ဍုၚ်ၜဳလီု(ၜဳက္လေၚ်)၊ ကျာ်ထဝ်၊ သဓီု တအ်ဂှ် လၟိဟ်ကောန်ဂကူမန် ဟွံဂၠိုၚ်နူ ဂကူတၞဟ်ဟ် (ဟွံၜက်ကဝက်) တုဲ ဗော်မန်တအ် ဟွံပလဝ်ပဓာနဂှ် ဂွံဆဵုကေတ်ရ။ ပ္ဍဲပွိုၚ်ဍုၚ်မတ်မလီု လၟိဟ်ဂကူမန် နွံကဝက်ပြၚ် (၅၁% တၟံကၠံ) ကီုလေဝ် ဒှ်ဒၟံၚ်ရဲယိုက်ဂၠေၚ် တာလျိုၚ် အလဵုအသဳ သၟးတုဲ ဇၟာပ်ပ်ပြိုၚ် ဗော်မန်တအ် ကေၚ်ဇၞးကၠုၚ်ဂှ် ဟွံဆဵုမွဲလှေ်ဏီ။ ပ္ဍဲဒၞါဲဂကူမန်တအ် နွံဂၠိုၚ်ၚ် ညံၚ်ရဴ ပွိုၚ်ဍုၚ်ပံၚ်၊ ပွိုၚ်ဍုၚ်ၜါသွာၚ် (ဒေသတ္ကအ်ခၟိုၚ်)၊ ပွိုၚ်ဍုၚ်ကျာ်မြဟ်၊ မုဟ်ဍုၚ်၊ ဇြပ်ဗု၊ ရေဝ်တအ်ဂှ်မ္ဂး အလုံ ညးဍုၚ်ကွာန်မန် ဖၟိုတ် ယဝ်ဍိုက်စုတ်မာဲ ကဵုမန်မ္ဂး တၠုၚ်လအာ သွက်ဂွံဇၞးနွံမာန်ရ။ တော်အကာဲအရာ သာ်ဂှ်တုဲ ပ္ဍဲ ၆ ပွိုၚ်ဍုၚ်ဏံဂှ်ရ ဗော်မန်တအ် ဂစာန်ပဆိုအ်လဝ် အမာတ်တုဲ ဗီုညးကဵုညးတုဲ လုပ်ပြိုၚ်ကၠုၚ် လဝ်ဏောၚ် ဟီုစဂွံရ။
ပ္ဍဲတွဵုရးမန်ဏံ ကောန်ဂကူမန်ရ နွံလၟိဟ်ဂၠိုၚ် ဟီုကၠာလေဝ် ကောန်ဂကူတၞဟ်ဟ် မပ္တံ ဗၟာ၊ ကရေၚ်၊ ပအိုဝ်၊ကြုက်၊ ဂလာ တအ်လေဝ် ပြံက်နွံမံၚ်ဗွဲမဂၠိုၚ်ကီုရ။ အတိုၚ်စရၚ်လၟိဟ်မၞိဟ်၂၀၁၄ တေံဂှ်မ္ဂး ပ္ဍဲတွဵုရးမန် လၟိဟ်မၞိဟ် နွံ ၂၀ ကိုဋ်ပြၚ် (ဝါ) ၜါပြကောဋိကိုဋ်ပြၚ် (၂၀၅၄၃၉၃-တလ) ရ။ ပ္ဍဲဍုၚ်မန်ဗၟာဏံ ယဝ်ပြေၚ်ရေၚ် အလိုက်သတီုမၞိဟ် (လၟိဟ်မၞိဟ်) ဂၠိုၚ်အောန်မ္ဂး ဒေသနွံကဵု သတီုမၞိဟ်ဂၠိုၚ်အိုတ် အဆံၚ် ၁ ဂှ် ရးဇၞော်လ္ဂုၚ်၊ အဆံၚ် ၂ ဂှ် ရးဇၞော်မာန္တလေ၊ အဆံၚ် ၃ ဂှ် ရးဇၞော် ဨရာဝတီ တုဲ စှေ်နူဂှ်မ္ဂး သတီုမၞိဟ်ဂၠိုၚ်အိုတ်ဂှ် ဒှ်တွဵုရးမန်ရ။
ရဲလိုအ်စှေ် ကၠောန်ကလောန် ပ္ဍဲဒေသမန်တအ်လေဝ် နွံမံၚ်ကဵု အခေါၚ်ကဵုမာဲ
ကာလပေါဲရုဲမာဲ သၞာံ ၂၀၁၀ တေံဂှ် လၟိဟ်မၞိဟ် နွံကဵုအခေါၚ်ကဵုမာဲ ပ္ဍဲတွဵုရးမန်ပိုဲဏံ နွံၜိုတ် ၁၀ ကိုဋ်ပြၚ်ဓဝ်တုဲ၊ အခါစိုပ် ပေါဲရုဲမာဲ ၂၀၁၅ ဏံဂှ် လၟိဟ်မၞိဟ် နွံကဵုအခေါၚ်ကဵုမာဲ ဒှ်ကၠုၚ် ၁၅ ကိုဋ်ပြၚ် (၁၅၃၄၄၈၆) ရဂှ် ဂွံတီကေတ် နူရဲကမ္မယှေန် ပေါဲရုဲမာဲ တွဵုရးမန်ရ။ ရံၚ်ကေတ် ဒဒှ်စရၚ်ဏံမ္ဂး အပ္ဍဲကာလ ပွိုၚ် ၅ သၞာံဏံ ပ္ဍဲတွဵုရးမန်ပိုဲ လၟိဟ်မၞိဟ်ကဵုမာဲဂွံ(မၞိဟ်နွံကဵု အခေါၚ်စုတ်မာဲ) ဂၠိုၚ်တိုန်ကၠုၚ် ၅ ကိုဋ် (၅၀% ) ပြၚ်ရ။
“စရၚ်ဏံဂှ် ပိုဲဗက်ကံက်လဝ် အတိုၚ်စရၚ် ဗွဲလၟေၚ်သၞောဝ်ရ။ အတိုၚ်စရၚ် ပိုဲဂွံနၚ်ဂှ်ရ မၞိဟ်ကဵုမာဲဂွံ စုတ်မာဲဂွံတအ် ဍေံဂၠိုၚ်ကၠုၚ်မံၚ်။ ဗီုလဵု ဂွံဂၠိုၚ်တိုန်ရောဟီုမ္ဂး ရဲလုပ်တန်တဴဒၟံၚ် ပေၚ် ၁၈၀ တ္ၚဲတအ်ဂှ် ဍေံတအ် အာတ်ဂရၚ်ပ္တီကၠုၚ် နကဵု တၞးလိက် ဗီုပြၚ် (၃-က) ကီုဂှ်ရ လၟိဟ်မၞိဟ် စုတ်မာဲဂှ် ဍေံဂၠိုၚ်တိုန်ကၠုၚ်” ရဴဝွံ ဒဒှ်ရ ဥုဟိၚ်လေန်ထိတ် ညးလျိုၚ် နူဂကောံကမ္မယှေန် ပေါဲရုဲမာဲ တွဵုရးမန် ဟီုကၠုၚ်လဝ်ဂှ်လေဝ် နူဌာန်ပရိုၚ်ဗၠးၜးကောန်ဂကူမန် ဓမံက်ထ္ၜးလဝ် ပ္ဍဲပရိုၚ်တုဲတုဲတေံ နွံကၠုၚ်မံၚ်ကီုရ။
အတိုၚ်စရၚ်လၟိဟ်မၞိဟ် သၞာံ ၂၀၁၄ ဂှ်မ္ဂး မၞိဟ်နူဒေသတၞဟ်ဟ် ပြံၚ်လုပ်ကၠုၚ် ပ္ဍဲတွဵုရးမန်ဏံ လၟိဟ်နွံမံၚ် ပိကိုဋ်ပန်ဠက်ပြၚ်(၃၄၂၁၈၉ တလ) ဓမံက်ထ္ၜးလဝ် ဗီုဂှ်တုဲ ရံၚ်လ္တူဏံမ္ဂး ကောန်ဂကူတၞဟ်ဟ် လၟိဟ်ကဵုကိုဋ် လုပ်ကၠုၚ် တန်တဴမံၚ် ပ္ဍဲတွဵုရးမန်ပိုဲတုဲ ပ္ဍဲပေါဲရုဲမာဲ သၞာံ ၂၀၁၅ ဏံ မၞိဟ်နူဌာန်ပလုၚ်တအ် ဂွံအခေါၚ်စုတ်မာဲဂှ် နွံမံၚ် (၄) ကိုဋ်ပြၚ် ဟီုစဂွံရ။ မၞိဟ်နူဌာန်ပလုၚ်တအ် ဆက်လိုအ်လုပ်ကၠုၚ် ပ္ဍဲတွဵုရးမန် ပ္ဍဲဒေသ တိဍာ်မန်ပိုဲ အတိုၚ်ၚ်ဏံဏီမ္ဂး အနာဂတ် ၅ သၞာံဂတတေံ အပ္ဍဲတွဵုရးမန် ဒေသတိဍာ်မန်ပိုဲဏံ လၟိဟ်ကောန်ဂကူမန်ကဵု လၟိဟ်ရဲပလုၚ် တၠိၚ်မုက်တၠိၚ်မတ်တအ် တၠုၚ်လအာ ဆက်ဒှ်ၜိုတ်လဵုမာန်ရောဂှ် ချပ်ရံၚ်အိုတ်ညိ။
မၞိဟ်တိတ်အာကၠောန်ကလောန် ပ္ဍဲဍုၚ်မ္ၚးတေံလေဝ် ဂၠိုၚ်မံၚ်
အတိုၚ်စရၚ်လၟိဟ်မၞိဟ် သၞာံ ၂၀၁၄ ဂှ်မ္ဂး ပ္ဍဲလၟိဟ်မၞိဟ် ၂၀ ကိုဋ်ပြၚ် (၂၀၅၄၃၉၃) နွံပ္ဍဲတွဵုရးမန်ပိုဲဏံဂှ် မၞိဟ်အာကၠောန်ကလောန် ပ္ဍဲဍုၚ်မ္ၚး (ရဲကၠတ်အာ/ရဲအာလုပ်သၞောဝ်) နွံ ၄ ကိုဋ် ၂ ဠက်ပြၚ် (၄၂၆၅၈၆) ရ။ အပ္ဍဲရဲတိတ်ကၠောန်စ ကလောန်ပ္ဍဲဍုၚ်မ္ၚးတေံဂှ် မၞိဟ်ပေၚ် အာယုက် ၁၈ တအ် ဆောံဗြံအခေါၚ်စုတ်မာဲ နွံကဵုကိုဋ်တုဲ ညးဂွံအခေါၚ် စုတ်မာဲဒ္စး (ကြိုတၚ်မဲ) ဂှ် တော်ကဵုမာဲဒ္စး အလုံဍုၚ်မ္ဂး မာဲဒ္စး ရဲတိတ်ကၠောန်မံၚ် ပ္ဍဲဍုၚ်မ္ၚးတေံဂှ် ဂွံအယာံမာတ် ကဵုဠက်ဟေၚ်ရဂှ်လေဝ် ဂၠာဲရံၚ်ပ္ဍဲပရိုၚ်မ္ဂး တီကေတ်မာန်ရ။
ရဲဒေသတအ် ဟွံဂွံ အခေါၚ်ကဵုမာဲဂှ်လေဝ်နွံ
ရဲနူဌာန်ပလုၚ် လုပ်ကၠုၚ်တန်တဴ ပ္ဍဲတွဵုရးမန်ဏံ တၞးလိက်သက်သဳ ခိုၚ်ၚ်ကၠိုက်က် ဍိုက်က်ပေၚ်ပေၚ် ဟွံမွဲကီုလေဝ် အခါစရၚ် ညးစုတ်မာဲတိတ်ကၠုၚ်ဂှ် ဍေံတအ် ဂွံမံၚ်အခေါၚ်စုတ်မာဲရ။ ကာလ ရဲဒေသဍက်က် နွံပ္ဍဲဌာန်ဇာတိတိုပ်သုက် ဇကုဖိုဟ် လ္ၚဵုလ္ၚဵု ယၟုဟွံပါကၠုၚ် ပ္ဍဲစရၚ်တုဲ ဟွံဂွံအခေါၚ်စုတ်မာဲဂှ်လေဝ် နွံမံၚ်ဗဝ်သၟဝ်ရ။
ယဝ်ဒးထ္ၜးဥပမာမ္ဂး ပ္ဍဲတ္ၚဲစုတ်မာဲ (နဝ်ဝေမ်ဗာ ၈ ) ဂှ် ကောန်ဍုၚ်လၟိုၚ် မွဲတလ နွံယၟု “ဥုဂျိန်” ဟွံဂွံ အခေါၚ်စုတ်မာဲတုဲ တၞးစၟတ်သမ္တီကောန်ဍုၚ် (နိုၚ်ၚံသားစီစစ်ရေးကဒ်ပြား) ညးတေံ ညးတေံစံၚ်ထ္ၜးထောံ ပ္ဍဲဂတမုက် ရုၚ်မာဲရ ဂှ်လေဝ် ဂွံဆဵုညာတ်ကေတ် ပ္ဍဲ Facebook ကဵု ပရိုၚ်ဂမၠိုၚ်ကီုရ။
စပ်ကဵု စရၚ်မၞိဟ်အခေါၚ်စုတ်မာဲတုဲ “စရၚ်မာဲဏံဂှ် ပရေၚ်ဒဒှ်ဍာံဍာံ နွံၜိုတ် ၃၀% တၟံကၠံဟေၚ်ရ” ဂှ်လေဝ် ဥုတေန်အေ ဥက္ကဌ ကမ္မယှေန်ပေါဲရုဲမာဲကၟိန်ဍုၚ် ဟီုသ္ပလဝ်ဒ္တန်ဂှ် ညးညးအဲအဲ တီမံၚ်ဖၟိုတ်ရ ဟွံသေၚ်ဟာ။
တၚ်နၚ် မဟီုကၠုၚ်လဝ် ဗွဲလ္တူတေံဂှ် ဒှ်တၚ်တၟေၚ်နူ ညးတၞဟ်ဟွံသေၚ်ရ၊ ညးဗှ်လိက် စိုတ်လုပ်စကဵု ပရေၚ်ပေါဲရုဲမာဲ၊ ညးမၚ်ရံၚ် လ္ၚတ်မံၚ်အကာဲအရာ ပရေၚ်ပေါဲရုဲမာဲတအ်ဍာံမ္ဂး တီမံၚ်ဖၟိုတ်ရ။ ၜိုန်ဂှ်လေဝ် ဣဏံဂှ် ဒဒှ်ဗွဲသာမညမွဲဟွံသေၚ်ရ၊ ဗော်မန်တအ် မူဟိုတ် ဒးကျအာမာဲရောဂှ် နကဵုအဲညးချူလိက်ဏံ မိက်ဂွံကဵုညးတအ် ကေဝ်ကၠေဝ် ချပ်ဗ္စာ လ္တူလၟိဟ် ကိုန်ဂၞန် ယောန်လုပ် ယောန်တိတ် ပ္ဍဲဒဒှ်တွဵုရးမန်ဇကုရ။
လၟိဟ်ဒြဟတ်နူဌာန်ပလုၚ် ဟွံသေၚ်ကဵုကောန်ဂကူမန်တအ် လုပ်တန်တဴကၠုၚ် ပ္ဍဲဒေသမန်ဇကုဂှ် ဒှ်ကိုန်ဂၞန် မဖန်ဗဒှ်ကဵု အရာဆောံဗြံ အမာတ်မန်တအ်တုဲ ကောန်ဇကုအရၚ်ဍက်က် လၟိဟ်ကဵုကိုဋ် ဟိုတ်နူဒးတိတ်ကၠောန်စမံၚ် ပ္ဍဲဍုၚ်မ္ၚးတုဲ မဆောံအာ အခေါၚ်စုတ်မာဲ၊ ၜိုန်နွံမံၚ် ပ္ဍဲဍုၚ်ကွာန်ဖိုဟ် ဟွံဂွံအခေါၚ်စုတ်မာဲ၊ ဂွံအခေါၚ်စုတ်မာဲကီုလေဝ် ဟွံစုတ်မာဲအိုတ်ဂှ် ဒှ်အရာ ရဲဗော်ပရေၚ်ဍုၚ်ကွာန်တအ် ဒးစွံသတိဇၞော်ဇၞော်မွဲရ။
ဟိုတ်ဂှ်ရ ကောန်ဂကူမန်ပိုဲတအ် ပရေၚ်စိုတ်လုပ်စ ပရေၚ်သ္ပဇြိုဟ်နက် လ္တူပေါဲရုဲမာဲ ကေုာံ လညာတ်သမ္တီ ပရေၚ်ဍုၚ်ကွာန်ကောန်ဂကူ ၚုဟ်ဟ်က္တဵုက္တဵု ထတ်တ်တ္ၚအ်အ် ဟွံမွဲမ္ဂး အမာတ်မန်တအ် ဂွံလုပ်စိုပ် ပ္ဍဲကၠတ်ထဝ် ဂှ် ဇြိုၚ်သန်ကွေံကွေံရ။ သရောပ်မ္ဂး ကောန်ဂကူမန် မဂၠိုၚ်ကဵုလၟိဟ်တအ် ဗွဲတၟေၚ်မ္ဂး ကောန်ဂကူမန် မတန်တဴမံၚ် ပ္ဍဲကွာန်ရး ဗွဲမဂၠိုၚ်တအ် ဟိုတ်နူသာသ္ပအ် ဟွံတ္ၚအ်ကဵု ပရေၚ်ကဵုမာဲ၊ ဟိုတ်နူဟွံတီၚုဟ်မးမာဲဂှ်ရ ဗော်မန်တအ် ဒးကျအာမာဲဏောၚ် အဲမိက်ဂွံဟီုရအဴ။