ဟ်ဂြိုဟ်( ကေန်သာဂြိုဟ်) ပ္ဍဲသ္ၚိညး ဍုၚ်ကၟာဝက်၊ ပွိုၚ်ဍုၚ်မုဟ်ဍုၚ် ဂှ်ရ။
စှ်တ္ၚဲပၠန်တှေ် စိုပ်ပေါဲရုဲမာဲရ ဆ္ဂး ညးစုတိအာယျတှေ် “ပၟိက်စိုတ်ဆန္ဒညး ဟွံဍိုက်ပေၚ်ရ” သာ်ဝွံ သမ္ဘာညး မိသြန်အံၚ် ဂးရ။
ပ္ဍဲကာလ ပရေၚ်စန်ဒက် ပေါဲရုဲမာဲ ပွိုၚ်ၜါဂိတုဂှ် ဒၟါနူယဲဝေဒနာ ညးဒးတိုန်ဝဳ ပ္ဍဲဍုၚ်လ္ဂုၚ်တုဲ ညးစှေ်ပရေၚ်စန်ဒက်ဟွံမာန် ဒှ်ၜိုတ်မွဲဂိတုကပါ်ရ သာ်ဝွံ နာဲဆာန်အာဲ မဒှ်စၞး နာဲမျယှိၚ် ဟီုရ။
“ဝါဒိတေံ ၜိုတ်ၜါပိဒၞါဲဂှ် ညးစှေ်ပရေၚ်စန်ဒက် မာန်မံၚ်ဏီ။ လက္ကရဴဏံ ဝေဒနာညး သ္ကာတ်တိုန်ညိတုဲ ဒးအာတိုန်ဝဳ ပ္ဍဲလ္ဂုၚ်ရ၊ စနူဂှ် ညးဟွံဒှ်စှေ် ပရေၚ်စန်ဒက်ရ” နာဲဆာန်အာဲ ဂး။
“လုပ်ပြိုၚ်ရုဲတှေ် မိက်ဂွံတီ ဇၞး/ကျ – အဃောနွံမံၚ်ပ္ဍဲရုၚ်ဂဥုဲဂှ် ညးဟီုကဵုအဲဏီရ။ ဂွံစိုပ်တ္ၚဲရုဲမာဲဂှ် နွံစှ်တ္ၚဲပၠန်ရ၊ ဆ္ဂး သွဟ်ပေါဲရုဲမာဲဂှ် ညးတီကေတ်ဟွံမာန်ရ” မိသဇၚ်ထွေ လၟောဝ်ညးစၞး ကၠတ်ထဝ်ကောန်ဂကူ၊ဒေသမာဲ စၟတ်(၆) ပွိုၚ်ဍုၚ်မုဟ်ဍုၚ်၊နူဗော်ဒဳမဵုကရေဇြဳအလုံရးမန် ဟီုရ။
နာဲသစ္စ ကော် နာဲမျယှိၚ်ဝွံ ပ္ဍဲဂကောံယေန်သၞာၚ် တွဵုရးမန်ကီု၊ နဒဒှ်သၟာဒွက်မန်မွဲကီု၊ ပ္ဍဲဂကောံ လိက်ပတ် ယေန်သၞာၚ်မန် ပွိုၚ်ဍုၚ်မုဟ်ဍုၚ်ကီု၊ ပ္ဍဲကလောန် ပရေၚ်ဖေါအ်ဗြေဝ်ဒေသ ကေုာံ ကလောန် ပရဟိတ တအ်ကီု ချဳဒရာၚ် ကၠောန်ကၠုၚ်လဝ်နွံ- ရဴဝွံ ဂွံတီကေတ် နူသ္ကအ်နာံမြိုၚ်ညးရ။
အခိၚ်ညးစုတိအာဂှ် သမ္ဘာညး မိသြန်အံၚ် ကေုာံ ကောန်ဇါတ် ၄ တလ သှ်ၜေက်မံၚ်ရ။
“ပ္ဍဲကာလ မစုက်ကဵုပေါဲရုဲမာဲဏံမှ ညးစုတိအာတှေ် ဂွံက္လေၚ်စုတ် အဇာညးတေံပၠန် ဟွံဂွံရ။ ညးစၞး မပ္တုဲဖဵုကဵု ကောန်ဂကူမန်မာန် ဂှ်ရ ရုဲစှ်ညိ” သာ်ဝွံဟေၚ် ဒံက်တာမာံနဲသဵု ညးအုပ်ကာ ဗော်ဒဳမဵုကရေဇြဳ အလုံရးမန် ဟီုရ။
ဒၞာဲကၠတ်ထဝ်ညးဍုၚ်ကွာန် ပွိုၚ်ဍုၚ်မုဟ်ဍုၚ် ဂှ် ဒဝ်အိအိအေ (ဗော် တစည)၊ ဥုအံၚ်မေန် (ဗော် အမျိုးသားဒီမိုကရေစီအၚ်အားစုပါတီ)၊ ဥုကျဝ်ဝ်လွေန် (ဗော် ပျဳခါၚ်ဖျဵု) ဥုသဝ်ထောန် (ဗော် NLD) ဥုအံၚ်ကျဳ ဗော် (အမျိုးသားတိုးတက်ရေးပါတီ)၊ မိကျေန်တာန် ကော် မိလေဝ်မန် (ဗော်ကောန်ဂကူမန်) မိမဵုမဵုခါၚ် နူဗော်ညးဗြဴ (မန်) တအ် ဆက်ပြိုၚ်အာဏောၚ် ဂွံတီရ။