ပ္ဍဲဂိတုဇာန္နဝါရဳ ၂၁ ဂှ်ညးစၞးကၠတ်ထဝ် တွဵုရးမန် မတိုန်ကၠုၚ်နူပေါဲရုဲမာဲ ၂၀၁၅ ကဵု ရဲချဳဒရာၚ် ဂကောံမှာဇန်တံ သ္ပဏာပေါဲ ဆဵုဂဗဆက်မိတ် ပ္ဍဲၝောံခန် ရုၚ်သွံအပေါတ်ဗၞိက် (ကုန်စည်ဒိုၚ်-ပွဲရုံ) နွံပ္ဍဲသၞေဟ်ကွဳစက် ဂြိပ်တရဴ ဇမ္ၚောဲ အရာပ်ဇြေဂျဵု ဍုၚ်မတ်မလီုရ။
စိုပ်လက်ထက် ကၠတ်ထဝ်တၟိတေံမ္ဂး သ္ဂောံသမၠုၚ်ပ္တိုန် ကဏ္ဍပရေၚ်ဆက်ဆောံ ပရေၚ်ပံၚ်တောဲ ရၚ်တၠုၚ် အလဵုအသဳ တွဵုရးမန်ကဵု ဂကောံဂမၠိုၚ် မချဳဒၟံၚ်ပရေၚ်ဝေါဟာမၞိဟ် တံဂှ်တုဲ ဒးသ္ပဏာပေါဲဆဵုဂဗ ဆက်မိတ် ဏံရဂှ် မာံဝေန်ဗဵု နူဂကောံတိုၚ်ခဳပရေၚ်ဖေါအ်ဗြေဝ် (ဖွံ့ဖြိုးရေးမဏ္ဍိုၚ်) ဂးရ။
“ပိုဲစၟဳမံၚ်ဂှ် မွဲပေါဲဏံဓဝ်ဟွံသေၚ်၊ ဂကောံ လ္ပာ်အရာပ် မချဳဒရာၚ်မံၚ် ပရေၚ်ဝေါဟာတံဏံဂှ် ဂကောံသောၚ်ၚ် ဗၠးဗၠးၜးၜးဏောၚ်၊ ဒှ်ဂကောံ ဒုၚ်လဝ်ဒယံက် ပရေၚ်ဘာသာ ပရေၚ်ဂကူ ပရေၚ်ဗော် မွဲမွဲ ဟွံသေၚ်ရ။ ကၠောန်သွက်ညးဍုၚ်ကွာန် ကၠောန်ကလောန် ပရေၚ်ဝေါဟာမၞိဟ်တံ သၟးရဂှ် ညးစၞးကၠတ်ထဝ်တံ ဂကောံအလဵုအသဳတံ ညးတံ တီအာ ညာတ်အာဗီုဂှ်တုဲ ဓဝ်ပတှေ်ညးတံ နွံကၠုၚ်” သာ်ဝွံ မာံဝေန်ဗဵု ဂးရ။
ရဲဂကောံ CSO တံ အဃောဆဵုကဵု ညးစၞးတၟိဂမၠိုၚ် ကၠတ်ထဝ်တွဵုရးမန် (MNA)
ဟိုတ်နူ ဂွံဆဵုဂဗ ဆက်မိတ် ညးသ္ကအ်ဗီုဏံတုဲ ပ္ဍဲကဏ္ဍ ပရေၚ်ပြံၚ်လှာဲ ကဏ္ဍပရေၚ်ပံၚ်ကၠောန် အကြာ ဂကောံတံဏံကဵု အလဵုအသဳ သီုကၠတ်ထဝ်တံဂှ်မ္ဂး ဍေံဒှ်အထံက်ပၚ်ကလောန်မာန်ဏောၚ် ဂှ်လေဝ် မာံဝေန်ဗဵု ဂးရ။
“ပ္ဍဲကာလကၠတ်ထဝ် တုဲကၠုၚ်တေံကီု ပ္ဍဲကာလကၠတ်ထဝ်ဏံကီု ညးဍုၚ်ကွာန်တံ စၟဳမံၚ် ပရေၚ်ဓဝ်ယာ ပရေၚ်ဗဗွဲဓဝ် ပ္ဍဲကဏ္ဍပရေၚ်အုပ်ဓုပ်ဂှ် အတိုၚ်ညးတံ နွံပၟိက် အဲဂစာန်အာ ဒတဴလိုၚ်အာ လ္ပာ်ဆန္ဒ ညးဍုၚ်ကွာန်တံဏောၚ်။ တုဲပၠန် ကိုန်အစဳဇန်ကမၠောန် ကၠောန်ဓမံက်မံၚ်ရုပ်ရဴ ပ္ဍဲဒေသမန် ပ္ဍဲအကြာဗွိုၚ် ကောန်ဂကူမန်တံဂှ် ယဝ်ဒှ်လလေၚ် သွက်ညးဍုၚ်ကွာန်တံမ္ဂး ညံၚ်ဟဂွံဒှ်ဂှ် အဲရၚ်တၠုၚ်အာဏောၚ်” သာ်ဝွံ ဒံက်တာ အံၚ်နာၚ်ဥု ညးစၞးကၠတ်ထဝ်တွဵုရးမန် မတိုန်စိုပ် ပေါဲဆက်မိတ်ဂှ် ဟီုရ။
ပ္ဍဲတွဵုရးမန်ဝွံ ညးစၞးကၠတ်ထဝ် ကၠုၚ်နူပေါဲရုဲမာဲ ၂၀၁၅ ဂှ် နွံလၟိဟ် (၄၅) တလတုဲ ၜိုန်ဘိက်လဝ် သီုဖ်အိုတ် ကီုလေဝ် ညးစၞးကၠတ်ထဝ် အယာံမာတ် (၄) တလဓဝ်ရ တိုန်စိုပ်ကၠုၚ်ဂှ် ဂွံဆဵုကေတ်ရ။
ပေါဲဗီုဏံရ အပ္ဍဲဂိတုဏံရ အလန်ပထမဂှ် ကၠောန်ကၠုၚ် ပ္ဍဲရုၚ်တိုၚ်ခဳပရေၚ်ဖေါအ်ဗြေဝ် (LRC) အရာပ်မျာၚ် သာယာ ဍုၚ်မတ်မလီုဂှ်တုဲ ဆဵုဂဗအလန်ဏံဂှ် ဒှ်အလန်ဒုတိယ ဂွံတီကေတ်ရ။
0 Comments