သွက်ဂွံတိုန်လ္ၚတ် ပ္ဍဲသ္ဘၚ်သဳကၠဳဗော်ဍုၚ်မန်တၟိ အလန်နဝမ ကၠောန်သ္ပမံၚ်လၟုဟ်ဏံဂှ်ဝွံ ပၞောဝ်ကဵု ဗော်ပရေၚ်ဍုၚ်ကွာန်မန် အပ္ဍဲဍုၚ် နွံမံၚ် ၃ ဗော်ဂှ် ဟွံဘိက်သီုဖၟိုတ်တုဲ ဘိက်လဝ် ဗော်ကောန်ဂကူမန် မွဲရ နဒဒှ်ရဲလ္ၚတ်ဂှ် မူဟိုတ်ရော- ပရူဒဒှ်ဏံ ပ္ဍဲဇာန်နဝါရဳ ၁၀ ဂှ် ဗော်ဍုၚ်မန်တၟိ လဴက္လးကဵု ဌာန်ပရိုၚ်ဗၠးၜး ကောန်ဂကူမန် ပ္ဍဲဌာန်ဂ
ကမ္မတဳဗဟဵုတံ အဃောဒုၚ်သွဴယဵုသစာ(သစ္စာ) NMSP
“ဗော်ကောန်ဂကူမန်ဂှ် လုပ်လဝ် ဂကောံ UNA ၊ဂကောံ UNA ကဵု ဂကောံ UNFC ဂှ်လေဝ် ပရေၚ်ဆက်ဆောံ နွံမံၚ်၊ အဓိပ္ပါယ် မိက်ဂွံဟီုဂှ် ပ္ဍဲအရာချဳဒရာၚ်ကီု၊ ပ္ဍဲအရာလညာတ်ကီု၊ အရာပရေၚ်ကလောန်တံကီု ဆက်စပ် ကြပ်မံၚ်ညးသ္ကအ်တုဲ ဗော်ဏံမွဲရ ပိုဲဘိက်လဝ် သွက်ဂွံတိုန်လ္ၚတ် သ္ဘၚ်သဳကၠဳ” သာ်ဝွံ နာဲဟံသာ ဒုဥက္ကဌ ဗော်ဍုၚ်မန်တၟိ သောၚ်ထ္ၜးရ။
ဗော်ဒဳမဝ်ကရေဇြဳ အလုံရးမန် AMDP ကေုာံ ဗော်ညးဗြဴ(မန်) ကဵု ဗော်ဍုၚ်မန်တၟိဂှ် ပရေၚ်ဆက်ဆောံလေဝ် အောန်၊ လညာတ်ကဵု ဗီုပြၚ်ကမၠောန်လေဝ် ဟွံတုပ်ညးသ္ကအ်၊ ဗော်သပုန်ဏောၚ် ဒုၚ်ကေတ်လဝ် သာ်ဂှ်တုဲ ယဝ်ဆက်ဆောံ စုက်လုက်ကဵု ဗော်ဍုၚ်မန်တၟိမ္ဂး ဒးဒုဟ် ၝောံပိုဒ် ၁၇ (၁) ဏောၚ်၊ တုဲပၠန် မဟာမိတ်လေဝ် ဟွံသေၚ်ရ။ ဒှ်သာ်ဂှ်ရ ဟွံဘိက် ကဵုတိုန်သ္ဘၚ်သဳကၠဳ ညးဂးရ။
နာဲဟံသာ ဆက်သောၚ်ထ္ၜးပၠန်ဂှ် “ ပိုဲဟီုသာ်ဏံဂှ် ဗက်မုက် ပါ်ခြာထောံ မွဲဂကောံကဵု မွဲဂကောံ၊ မွဲဗော်ကဵု မွဲဗော်ဟွံသေၚ်ရ။ ဟိုတ်နူ ဆက်ဆောံကၠောံက္ဍညးသ္ကအ်အောန်တုဲ ပိုဲကၠောန်သ္ဘၚ်သဳကၠဳဂှ် ဟွံဘိက်ညးတံ” နာဲဟံသာ ဂးရ။
ဗော်ကောန်ဂကူမန် MNP မ္ဂးဂှ် ပြံၚ်လှာဲကၠုၚ် နူဗော်ဒဳမဝ်ကရေဇြဳကောန်ဂကူမန် MNDP တေံရတုဲ နာဲထောန်တိၚ်၊ နာဲထဝ်သောန် မဒှ်က္ဍိုပ်သ္ကိုပ် ဗော် MNDP ဂှ်လေဝ် ဒှ်ကၠုၚ်က္ဍိုပ်သ္ကိုပ် ပၠန်ဂတးရပ်လွဟ် ဗော်ပၠတရဴဍုၚ်မန် တေံတုဲ ပ္ဍဲကာလ ထ္ပက်စၟတ်တဲ ဒိုအ်ပန်ပှော်ဂှ်လေဝ် ဒှ်ညး ချဳဒရာၚ်မံၚ် မွဲစွံကဵု ဗော်ဍုၚ်မန်တၟိကီု ဂးရ။
ယၟု ဗော်ဒဳမဝ်ကရေဇြဳကောန်ဂကူမန် MNDP ကၠာတေံဂှ်ရ လၟုဟ်လှာဲထောံယၟု ဗော်ကောန်ဂကူမန်MNP သာ်ဝွံ နာဲအေမန် ကေၚ်ကာဗဟဵု ဗော်ဍုၚ်မန်တၟိ လေဝ် လဴက္လးကဵုကီုရ။
နာဲအေမန် ဆက်လဴထ္ၜးပၠန်ဂှ် “ဗော်ကောန်ဂကူမန်ဏံ အဃောဒုၚ်လဝ်ယၟု ဗော်ဒဳမဝ်ကရေဇြဳမန်ဂှ် လုပ်လဝ် ပေါဲရုဲမာဲ ၁၉၉၀ တေံတုဲ ဇၞးလဝ်မာဲ ၅ တလကီုရ။ အ္ခိၚ်ဂှ် ဥက္ကဌ နာဲယှိုဲကျေန် နွံမံၚ်ဏီတုဲ ဒက်လဝ်မိတ် ကဵုဗော်MNDP ရ။ မဟာမိတ်ကၠာအိုတ်လေဝ် ဟီုစဂွံရ။ ဟိုတ်နူ ဒှ်မံၚ် ဂကောံမဟာမိတ် ပရေၚ်ဍုၚ်ကွာန်ဂှ်ရ ပိုဲ ဘိက်လဝ် ဗော်ညးတံသၟး” ဂးရ။
ပ္ဍဲဒဳဇြေမ်ဗာ ၂၇ ၊သၞာံ ၂၀၁၅ တ္ၚဲစပံက် သ္ဘၚ်သဳကၠဳ ဗော်ဍုၚ်မန်တၟိ အလန်နဝမဂှ် ညးစၞး နူဗော်ကောန်ဂကူမန်ကီု၊ ခမဳသၚ်မန် တီညာတ်ပြာကတ်တံကီု သီုကဵု က္ဍိုပ်သ္ကိုပ်မန် လ္ၚဵုလ္ၚဵုတံ တိုန်စိုပ်လဝ်ကီုရ။
ပ္ဍဲ ဂိတုဇာန်နဝါရဳ (၉) ၂၀၁၆ ဂှ် ရုဲစှ် ကမ္မတဳဗဟဵုပေၚ်ၚ် ၃၃ တလ ကေုာံ အရန် ၅ တလတုဲ ကြဴနူဂှ် ဆက်ရုဲအာ ကမ္မတဳ ပွိုၚ်ဍုၚ်၊ ကမ္မတဳခရိုၚ် တံပၠန်တုဲ ဂိတုဇာန်နဝါရဳ (၁၄ ) ဏံမ္ဂး သ္ဘၚ်သဳကၠဳဗော် အာစိုပ် ဒ္တုဲဏောၚ် ဂွံတီကေတ်ရ။
