သိုၚ်ခၞံပတန်ဂွံလဝ် ဘာပန်မ ပ္ဍဲဘာရာမညရဋ္ဌဗုဒ္ဓတက္ကသိုလ် အရာပ်မျာၚ်သာယျာ ဍုၚ်မတ်မလီုဂှ် ဂိတုမာ် (၃-၄-၅) စွေက်ဏံမ္ဂး ကၠောန်သ္ပသဘၚ်မ္ၚဵုစရိုဟ်ဍာ်ဘာရောၚ် ဂွံတီကေတ်ရ။
“မိနော်ပါန်ကျဳဂှ် သိုၚ်ဂွံလဝ် ဘာပိမ၊ တၠဂုဏ်အ္စာ (သဳလာစာရ) ဂှ် သိုၚ်ဂွံလဝ်မွဲမ၊ အာစိုပ်လဝ်ဒတုဲယျတှေ် ညးတံကၠောန် သဘၚ်စရိုဟ်ဍာ်၊ ပါ်ပရအ်ပိုန်ကုသဵု ကုသတ်တံသီုဖအိုတ်ရ။ နိမန်လဝ်သၚ် ဗၞတ် (၁၀၀၀) ဇကုပြၚ်ဏောၚ်။ ခရှ်ပုရိသာတ်တံဂှ် ဇၟာပ်ဒေသ ဘိက်လဝ်ဖအိုတ်ရ။ ရဲဍုၚ်သေံတံလေဝ် ကၠုၚ်ကီုဏောၚ်” သာ်ဝွံ တၠၠဂုဏ်အ္စာခေမာစာရ ဟီုမြော်ရ။
ဘာဓမ္မသာလာမွဲမ၊ ဘာဘောဇနသာလာမွဲကဵု ဘာပရိယတ္တိဝိဟာရမွဲမတံဂှ် ညးတၠဒါန် (နာဲထောန်အိၚ်) + မိပါန်ကျဳတံ ကဵုလဝ်ဒါန်တုဲ ဘာဓမ္မဒေသနာမွဲမဂှ် ဘဒ္ဒန္တသဳလာစာရ (ဂုဏ်ၝေအ်) ကဵုဒါန်သိုၚ်ခၞံလဝ်တံဂှ် အာစိုပ်ဒတုဲ စရိုဟ်ဍာ်ကၠောန်သဘၚ်ဝွံရောၚ်။
“သွက်သၚ်တံဂှ် ပဲါနူဝတ္ထုဒါန် ကပေါတ်ပရၚ်တဲဂှ် ကံက်ကဵုမာဲကွဳစက်ၜါမဏောၚ်။ ပ္ဍဲတၞးကာဒ်ဝတ္ထုဒါန်ဂှ် စုတ် လဝ်မဂၞန်နွံမံၚ်၊ ဂၠံက်ကဵုအတိုၚ်ဂှ်ရ။ သွက်ခရှ်တိုန်စိုပ်တံ ကေတ်လဝ်စရၚ်ယၟုသီုဖအိုတ်၊ ကလေၚ်ဂၠံက်ကဵုမာဲ ကွဳလိုန်ဓာတ် (၂၀) ဖ္ဍိုက်ကီုဏောၚ်” သာ်ဝွံ ဒကာဘာမွဲတၠ ဟီုရ။
ပ္ဍဲသ္ဘၚ်ဂှ် ကၠောန်လဝ်ရုပ်ဗီုက်ၜၚ်ကျာဇၞော်ဇၞော်မွဲတုဲ ဗီုဓာတ်ချဳဓရာၚ်လဝ် ပရေၚ်သိုၚ်ခၞံဘာဂှ် ထ်ၜပျးအာကီုရောၚ်။ အခိၚ်ဗ္တံဂှ် ဂကောံဂဳတမန်၊ ဂကောံ (Mon Music Band-MMB) ကေုာံ ဂကောံဇြဟတ်ဂဳတ (Power Music) တံကီု ညးတၠရမျာၚ်ဒယှ်တြေံတြေံကီု သွက်ဂွံဒယှေ်လဟိၚ်အာနွံရောၚ်။
ဘာရာမညရဋ္ဌဗုဒ္ဓတက္ကသိုလ်ဂှ် အတိုၚ်ပၠတရဴဂကောံရာမညဓမ္မာစရိယဂှ် စဓမံက်ကၠုၚ်ရုပ်ရဴတုဲ အခိၚ်ကာလ ကလိဂွံဂအာၚ် ဒဒှ်အရှာံဘာဂှ် တၠဂုဏ်အ္စာသဳလာစာရ အပ်ပြာပ်ကဵုသၚ်ရာမညတံရ။ နူကဵုဂကောံသၚ်ရာမည တံ ကလေၚ်ကဵုတာလျိုၚ်ကျာ်ဇၞော်အ္စာသဳလာစာရ သွက်ဂွံက္ဍိုက်ပ်ပရေၚ်သိုၚ်ခၞံ ဘာတက္ကသိုလ်ဂှ်ပၠန်ရောၚ်။
ပ္ဍဲသဘၚ်စၟတ်သမ္တီသၚ်မန်ကလိဂွံအခေါၚ်သွဟ်လိက်ဘာသာမန် ပေၚ် (၁၀၀) သၞာံဂှ် ဘိက်နိမန်လဝ်သၚ် နူတက္ကသိုလ်ဍုၚ်သဳရိလၚ်္ကာ၊ နူဍုၚ်သေံတံနွံကီုတုဲ သွက်ဂွံပံက်အာဘာတက္ကသိုလ်ရာမညရဋ္ဌပြဟ်ဟ်မာန်ဂှ် သွက်ဂွံသဳကၠဳတက်ကျာနွံရောၚ် ညးမကြပ်ကဵုဘာတက္ကသိုလ်ဂှ် ဟီုရ။
နူကဵုသၞာံ (၂၀၁၂) ဂိတုမေ (၂၆) ဂှ် စဖျေံကၠုၚ်ရိုဟ်ကၞက် သိုၚ်ပတန်ကၠုၚ်လဝ် ဘာရာမညရဋ္ဌဂှ် အခိၚ်လၟုဟ် မ္ဂး ကၠောန်သဘၚ်စရိုဟ်ဍာ်ဘာပန်မတုဲ ဘာသွက်ဂွံပံက်တက္ကသိုလ်ဂှ် သိုၚ်ခၞံမံၚ်ဖိုဟ်ေရောၚ်။