ပ္ဍဲကဵုဒေသပွိုၚ်ဍုၚ်ရေဝ်သၠုၚ်ကျာ၊ ကွာန်ပါၚ်မ္ၚဵု (ကဗျာဝ) ဂှ်ဝွံ လောန်ကၠုၚ်ဂိတုမာတ် (၂၂)၊ အခိၚ်သဝ်တ္ၚဲ ၜိုတ် (၇) နာဍဳဂှ် ကောန်ၚာ်ဗြဴမၞုံအာယုက် (၄) သၞာံမွဲတၠ ဒးဒုၚ်သ္ပကောန်ဗြဴအဓမ္မရောၚ် ဂွံတီကေတ်နူညး ဒေသတံဟီုရ။
ဂတဵုမုက်ပစူတိ ကွာန်ပါၚ်မ္ၚဵု (သၞံၚ်တိုၚ်)
သ္ၚိဒၟံၚ်ကောန်ၚာ်ဗြဴဂှ် နွံမံၚ်ဗ္ဒဲါပြၚ်ၜဳတုဲ အဃောဝေၚ်မံၚ်ဂှ် ညးမံၚ်မွဲကွာန် မၞုံယၟု (မောၚ်ဖိုးဆေး) ကော်ဏာသွက်ဂွံ အာဝေၚ်သ္ဂးတုဲ ဒှ်အာပရောကိစ္စဝွံရောၚ် ညးဒေသတံ ဂးရ။
ဥက္ကဌကွာန်ပါၚ်မ္ၚဵု နာဲအံၚ်သာန် (နိုၚ်အောၚ်ဆန်း) ဂှ် “တ္ၚဲဒှ်ပရောဂှ်ရ ကောန်ၚာ်ဗြဴဂှ် ပိုဲတံပ္လံၚ်ဏာ ရုၚ်ဂဥုဲ ဍုၚ် ခေါ ဇာ၊ ပ္ဍဲကဵုရုၚ်ဂဥုဲဂှ် ဟိုတ်နူကဵု ဒံတ်တာဟွံမွဲတုဲ ဗ္တံဂှ်ရ ဆက်တုဲပ္လံၚ်ဏာရုၚ်ဂဥုဲဍုၚ်ရေဝ်တေံ” သာ်ဝွံ ဟီုကဵုသၞံၚ်တိုၚ် ဂိတုမာတ် (၂၄) ဂှ်ရ။
ပ္ဍဲကဵုဂိတုမာတ် (၂၃)၊ အခိၚ်လဒေါဝ် ဗၞတ် (၁း၃၀) နာဍဳဂှ် နူကဵုဗၠာဲသၟိၚ်ခေါဇာ ကေုာံ ဂကောံညးအုပ်ဓုပ်ကွာန်တံ ကဵု (မောၚ်ဖိုးဆေး) ထ္ၜး ဒၞဲါဒှ်က္လိလောန်လဝ် ဒၞဲါပြၚ်ၜဳပါၚ်မ္ၚဵုတေံတုဲ တက်လဝ်သီုဗီုရောၚ် နာဲအံၚ်သာန် ဆက်ဟီု လဝ်ရ။
ကောန်ၚာ် (၂) တၠဂှ်ဝွံ မဒှ်ရဲကၠုၚ်နူကဵုဒေသကွာန်ဖျာပုၚ် (ဖျာပုံ) တေံတုဲ ကောန်ၚာ်တြုံ (မောၚ်ဖိုးဆေး) ဂှ် မံၚ်ဂွံပ္ဍဲ ကွာန် ပါၚ်မ္ၚဵု ဗၞတ် (၃/၄) သၞာံတုဲ ကောန်ၚာ်ဗြဴဂှ်ဝွံ ပြံၚ်ကၠုၚ်နူကဵုကွာန် (အစေၚ်) စိုပ်ကၠုၚ်ကွာန်ပါၚ်မ္ၚဵု ဟွံလအ်ဏီရောၚ် အတိုၚ်ညးဒေသတံ ဟီုလဴလဝ်ဂှ် ဂွံတီကေတ်ရ။
ကိစ္စကောန်ၚာ်ဗြဴ အာယုက် ၄ သၞာံ ဒးဒုၚ်သ္ပကောန်ဗြဴအဓမ္မဏံဂှ် ညးမဒှ် မိနော်ကောန်ၚာ်ဗြဴဂှ် အာစိုပ်ပံက်လဝ် အမှု ပ္ဍဲကဵုရုၚ်ဗၠာဲသၟိၚ်ဍုၚ်ခေါဇာ တုဲကၠုၚ်ဂိတုမာတ် (၂၃)၊ သၞာံ (၂၀၁၆) လ္ပာ်နူဂယး (၃) နာဍဳရ။
စပ်ပရောဂဗုတ်ဝွံတုဲ ညးသ္ပကောန်ဗြဴအဓမ္မ ကောန်ၚာ်ဗြဴ အယုက် (၄) သၞာံ မၞိဟ်ယၟု (မောၚ်ဖိုးဆေး) အယုက် (၁၅) သၞာံဝွံ နူကဵုရုၚ်ဗၠာဲသၟိၚ် ပွိုၚ်ဍုၚ်ခေါဇာတံ ရပ်စပ်လဝ် နကဵုဂဗုတ် (ပ)၇/ ၂၀၁၆ ၝောံပိုဒ် ဒုဟ်ဒဏ် (၃၇၆) ရောၚ် ဂွံတီကေတ်ရ။
အပ္ဍဲတွဵုရးဍုၚ်မန်ဝွံ ဆေၚ်စပ်ကဵု ပရေၚ်ပကီုပရာပ်လိၚ် ဗီုပြၚ်သာ်ဏံတုဲ ပ္ဍဲသၞာံ (၂၀၁၄) ဂှ် လၟိဟ်ဂဗုတ် (၉၀) ပြၚ်၊ သၞာံ (၂၀၁၅) ဂှ် လၟိဟ်ဂဗုတ် (၁၀၀) ပြၚ် မံက်ကၠုၚ်နွံတုဲ အပ္ဍဲဂှ်မ္ဂး ပရေၚ်သ္ပကောန်ဗြဴအဓမ္မ ကုသၟတ်ကောန်ၚာ် ဍောတ်တ်တံ ပါလုပ်ဂၠိုၚ်အိုတ်ရောၚ် ဂွံတီကေတ်ရ။
