ညးစၞးအလဵုအသဳကဵု ညးစၞး ဂကောံ ရပ်လွဟ် (၈) ဂကောံ မထ္ပက်လဝ်စၟတ်တဲ NCA တအ် ဆဵုဂဗသဳကၠဳညးသ္ကအ် ပ္ဍဲဂိတုမေ ၁၉ ဂှ် ဂကောံရပ်လွဟ် ကောန်ဍုၚ်အရၚ် (၇) ဂကောံ ဟဂွံထ္ပက်စၟတ်တဲ လိက်ကသုက် ဒိုအ်ပန်ပှော်အလုံမွဲဍုၚ် (NCA) ဏီဂှ်လေဝ် ကဵုအခေါၚ် ပါလုပ်ပ္ဍဲသ္ဘၚ်သဳကၠဳ ပေန်လုၚ် ၂၁ ဗွဝ်ကၠံ ကီုဏောၚ်ဂှ် တုပ်စိုတ်တုဲရ သာ်ဝွံ ပဒဵုမာန်ညိၚ်မံၚ် ကမ္မတဳရၚ်တၠုၚ်ကေၚ်ကာဗဟဵု ဗော်ကရေၚ် KNU ဂးရ။
ညးစၞး ဂကောံမထ္ပက်စၟတ်တဲ NCA တုဲတုဲတအ်ကဵု ရဲ CSO တအ် (MNA)
ဂကောံ ဟဂွံထ္ပက်စၟတ်တဲ NCA ဏီမ္ဂးဂှ် ဒပ်ပၞာန်ပရေၚ်ညဳသာသၟဟ်န်ရးဝ UWSA/UWSP၊ ဂကောံပရေၚ်ဗၠးၜးကချေၚ် KIO၊ ဗော်ဍုၚ်မန်တၟိ NMSP ၊ ဗော်ပရေၚ်တောတက် ဂကူကရေၚ်ဍာဲ KNPP၊ ဗော်ပရေၚ်တောတက်ရးသေံ SSPP/SSA ၊ ဒပ်ပၞာန်ဒဳမဝ်ကရေဇြဳကောန်ဂကူ မညဳသာသၟဟ်န်- ဂကောံမာၚ်ဠာ NDAA၊ ကပ်ပၠာန်-ကံၚ်ဇြဳသဵုယှေဝ်ဠေတ် ကောန်ဂကူ နာဂ NSCN-K တအ်ဒှ်တုဲ သီု (၇) ဂကောံဏအ်ဂှ် ဂွံအခေါၚ်တိုန် သ္ဘၚ်သဳကၠဳ ပေန်လုၚ် ၂၁ ဗွဝ်ကၠံကီုဏောၚ် နူပေါဲသဳကၠဳဂှ် တုပ်စိုတ် ဖျေံသ္ဂုတ်သွာတ်တုဲရ။
“ပိုဲသဳကၠဳလဝ်ဂှ် သ္ဘၚ်သဳကၠဳ ပေန်လုၚ် ၂၁ ဗွဝ်ကၠံဏအ် ဗီုလဵုကၠောန်အာရော၊တုဲတှေ် “မူ” မချူလဝ်တြေံတေံဂှ် ကလေၚ်ပဠေဝ် ဗီုလဵုရော၊၊ ဆ္ဂး ဂွံတၚ်တုပ်စိုတ် မွဲသာ်ဂှ် ဂကောံ ဟဂွံထ္ပက်စၟတ်တဲ NCA ဏီဂှ်လေဝ် ကဵုအခေါၚ်တိုန် သ္ဘၚ်သဳကၠဳ ပေန်လုၚ် ၂၁ ဗွဝ်ကၠံဂှ်ကီုဏောၚ် တုပ်စိုတ်သာ်ဏအ်” ပဒဵုမာန်ညိၚ်မံၚ် ဂးရ။
ပ္ဍဲပေါဲသဳကၠဳ မေ ၁၉ ဂှ် လ္ပာ်အလဵုအသဳ ဒံက်တာတေန်မျဵုဝေန် ညးတာလျိုၚ် ပ္ညဳပ္ညပ် NRCP၊ ဥူဇြဝ်ဌေ ဒုဂအုပ်ပရေၚ်စၞောန်ပ္ညုၚ် ဌာနဝန်ဇၞော် ရုၚ်သမ္မတ၊ ဒုသ္ကိုပ်ပၞာန်ဇၞော် ယျာပျေအ်၊ သၟာၚ်နူဂှ် ညးစၞးသွာၚ်တၞဟ်ဟ်လေဝ် ပါလုပ်တုဲ နူဂကောံရပ်လွဟ် ကောန်ဍုၚ်အရၚ်ဂှ် က္ဍိုပ်သ္ကိုပ်ဂမၠိုၚ် နူဂကောံ (၈) ဂကောံ မထ္ပက်စၟတ်တဲ NCA တအ် တိုန်စိုပ်ကီုတုဲ သ္ဘၚ်သဳကၠဳ ပေန်လုၚ် ၂၁ ဗွဝ်ကၠံဂှ် ညံၚ်ဂွံဒှ်ကၠောန်မာန် ၜိုတ်ဂိတု ဂျူလာဲဖါအိုတ်တေံဂှ်လေဝ် တုပ်စိုတ်လဝ် ဗွဲအပြောံကီု ဂွံတီကေတ်ရ။
“လၟုဟ်တှေ် ပိုဲတအ် ပံၚ်တောဲကဵု ဂကောံကောဒေံပိုဲ ဂွိုအ်ထ္ပက်စၟတ်တဲဏီတအ်ဂှ်တုဲ ကလေၚ်ချူပဠေဝ်အာ မူ ဏောၚ်။ ကာလချူဓဇက်မူ သွက်ဂွံကၠောန်သ္ဘၚ်သဳကၠဳ ပေန်လုၚ် ၂၁ ဗွဝ်ကၠံဏအ်ဂှ်မ္ဂး ဂကောံ ဂွိုအ်ထ္ပက်စၟတ်တဲဏီတအ်ဂှ်လေဝ် ညံၚ်ဂွံပါလုပ်ကၠုၚ်ကီုဂှ် ပိုဲတအ်သဳကၠဳလဝ်ရ။ ပပ္တံနူအခိၚ် မချူမူ သ္ဘၚ်သဳကၠဳဂှ်တုဲ သဳကၠဳအာ ပရေၚ်ဍုၚ်ကွာန်ဏောၚ်၊ သဳကၠဳပရေၚ်ဍုၚ်ကွာန်တှေ် လုပ်သဳကၠဳ ပ္ဍဲမူဏအ်ဂွံရ။ ညးတအ်လေဝ် လုပ်သ္ဂုတ်သွာတ်ဂွံကီုဏောၚ်။ ကိစ္စဂှ်လေဝ် ပိုဲသဳကၠဳလဝ်။ သီုၜါလ္ပာ်လေဝ် စှေ်စိုတ်မံၚ်ကီုရ” သာ်ဝွံ ဥူခေါန်မျေအ်ထောန် ဥက္ကဌ ဂကောံပရေၚ်ဗၠးၜးဂကူပအိုအ် PNLO ဂးရ။
ဂကောံ AA၊ MNDAA၊ TNLA တအ် သွက်ဂွံဂွံအခေါၚ်တိုန်ကီုဂှ်လေဝ် နူဂကောံပဠေဝ်ပဠေတ် ပ္ညဳအာပၠန်ဏောၚ် ဒှ်တုဲ ပိုဲဂွံဟီုဂှ် အခေါၚ်ဟွံမွဲ ဥူခေါန်မျေအ်ထောန် ဂးရ။
ဂကောံရပ်လွဟ် ပိဂကောံဂှ် ယဝ်မိက်ဂွံ သဳကၠဳပရေၚ်ၜိုဟ်လလံကီုမ္ဂး ဒးဗလးလွဟ်ဏောၚ်၊ ယဝ်ဟွံဗလးလွဟ်မ္ဂး သွက်ဂွံ သဳကၠဳပရေၚ်ၜိုဟ်လလံ ဟွံမွဲရ ဂှ်လေဝ် နူဒပ်ပၞာန် ဟီုလလောၚ်လဝ် ဗဗွဲသၞောဝ်တုဲရ။
ဒဝ်အံၚ်သာန်သုကျဳလေဝ် ပ္ဍဲမွဲၜါဂိတုဏအ် ကၠောန်သ္ဘၚ်သဳကၠဳ ပေန်လုၚ် ၂၁ ဗွဝ်ကၠံဏောၚ် ဂးကၠုၚ်လဝ်တုဲ ဂကောံရပ်လွဟ် ဟဂွံထ္ပက်စၟတ်တဲ NCA ဏီဂှ်လေဝ် ညံၚ်ဂွံပါလုပ်ကီုဂှ် ဂစာန်အာဏောၚ် သာ်ဝွံ ဂးကၠုၚ်လဝ်ကီုရ။
အလဵုအသဳတြေံ သမ္မတဥူတိၚ်သိၚ် ကဵု ဂကောံရပ်လွဟ် ကောန်ဍုၚ်အရၚ် (၈) ဂကောံ မတွံဂး RCSS/SSA ၊ KNU ၊ DKBA ၊ KNU/KNLA-PC ၊ ABSDF ၊ ALP ၊ CNF ၊ PNL တအ် ထ္ပက်လဝ်စၟတ်တဲ လိက်ကသုက် ဒိုအ်ပန်ပှော် အလုံမွဲဍုၚ် (NCA) ဂှ် နူ ဂိတု အံက်တဝ်ဗာ (၁၅)၊ သၞာံ ၂၀၁၅ တေံရ ဂွံတီကေတ်။
