ဂကောံတၠပညာမန် ကေုာံ တၠပညာပျုတံ ချုခၞံလဝ် လိက်တၟံ (မြစေတီ) ဂှ် ဒးဒုၚ်စၟတ်သမ္တီ နဒဒှ်စရၚ်ဂၠးကဝ် (MoW) ဂှ် ပ္ဍဲကဵုဂၠးကဝ်ဏံ လိက်ပတ်မန် တဴတက်ကဆံၚ်သၠုၚ်တိုန်ရောၚ် နူကဵုဂကောံသုတေသနဝၚ်မန်တံ ဟီုရ။
အသေအဟာန်စုတ်တဆိပ်ကြာ (Logo)ယူနေတ်သကိုဝ် (MOI)
ဥက္ကဌ ဂကောံသုတေသနဝၚ်မန် နာဲမိုၚ်တဝ် (နိုၚ်မောၚ်တိုး) ဂှ် “ တၠပညာအ္စာဝၚ်မန်တံ ချုခၞံလဝ် လိက်တၟံ (မြ စေတီ) ဂှ် ဒးဒုၚ်စၟတ်သမ္တီ ပါလုပ် စရၚ်ဂၠးကဝ်ဂှ်ရ လိက်မန်ဂှ် ပ္ဍဲဂၠးကဝ်ဏံ ပဵုတဴတက်တိုန်ဏောၚ်” သာ်ဝွံ ညးဟီုရ။
နူကဵုဂၠးကဝ် သ္ပထောံစၟတ်သမ္တီ နကဵုလိက်ပတ်ယေန်သၞာၚ်ဂၠးကဝ်မွဲဂှ် လိက်မန်လေဝ် ပါမံၚ်ဂှ် ဒးကေတ်ဂုဏ်စရာဲ ကီု လိက်တၟံဂှ်ဝွံ မန်၊ ဗၟာ၊ ပျု၊ ပါဠိ၊ ချုခၞံလဝ် (၄) ဘာသာကီုလေဝ် ကလေၚ်ရံၚ်အာ ချိုတ်တ်ပၠိုတ်တ်မ္ဂး ဘာသာ ပျုဂှ် မွဲဘာသာ၊ မန်၊ ဗၟာ၊ ပါဠိဂှ် ချုလဝ်ကဵု ဘာသာမန်ဂှ်ရ သရောပ်ဂှ် နွံမံၚ်ၜါဘာသာဓဝ်ရောၚ် ညးဆက်ဟီုရ။
နာယက ဂကောံသုတေသနဝၚ်မန် ကျာ်ဇၞော်အ္စာဘဒ္ဒန္တသဳလဝန္တဂှ် “အာဲကၟာဲမန်ပိုဲ ကၠောန်လဝ်တုဲတုဲတေံဂှ် ညံၚ်ဂွံ စဵုဒၞာအာမာန်ဂှ် ဂကောံသုတေသနဝၚ်မန်တံ ချပ်လဝ်နွံမံၚ်ရ၊ ညံၚ်ဂွံစှေ်ဗီုဂှ်တှေ် ထေက်ကဵု ဒးထိၚ်ဒဝ်ဂှ် ပိုဲဒးထိၚ် ဒဝ်အာဏောၚ်” သာ်ဝွံ ကျာ်ဇၞော်အ္စာ မြော်လဝ်ရ။
အသေအဟာန်စုတ်တဆိပ်ကြာ (Logo)ယူနေတ်သကိုဝ် (MOI)
လိက်တၟံ (မြစေတီ) ဂှ် နူကဵုအေဒဳ (၁၁၁၃) သၞာံတေံ ချုခၞံလဝ် နကဵုဘာသာ ပျု၊ မန်၊ ဗၟာ၊ ပါဠိ မွဲဘာသာမွဲတိုၚ်ဂှ် လၟုဟ်ဒးဒုၚ်စၟတ်သမ္တီ စရၚ်ဂၠးကဝ် (MoW) မွဲတုဲ ပြဟ်ဟ်ဏံ ဂိုၚ်စွံလဝ် ပ္ဍဲကဵုတိုက်ထ္ၜးပျး ဍုၚ်ဗကာံရောၚ်။
ဒၞာဲလိက်တၟံ (မြစေတီ) ပ္ဍဲကဵုဍုၚ်ဗကာံဂှ် ကပေါတ်တြေံတြေဟ်ဗွဲမဂၠိုၚ် လီုလာ်အာတုဲ ဂွံဒှ်စၟတ်သမ္တီ ပါလုပ်စရၚ်ဂၠး ကဝ်ဂှ် ဟွံဂွံရ၊ ပ္ဍဲကဵုပွဳပွုဍုၚ်ဗကာံ ဒၞာဲသၟိၚ်မနူဟဝ် ဒက်ပတိုန်လဝ် ကျာ်မနူဟဝ်ဂှ်ကီု၊ ပ္ဍဲကဵုကွာန်မြၚ်အပါ (မြၚ်းက ပါ) ဂှ်လေဝ် ကျာ်စေတဳတြေံတြေဟ်နွံမံၚ်ဗွဲမဂၠိုၚ်တုဲ ဒှ်ကၠုၚ်စၟတ်သမ္တီ စရၚ်ဂၠးကဝ်မ္ဂး ခိုဟ်ဂၠိုၚ်ရောၚ်ဂှ်လေဝ် နူကဵု ဂကောံသုတေသနဝၚ်မန်တံ သ္ၚဳဂၠိပ်လဝ်ရ။
လိက်တၟံဏံဂှ် နူကဵုသၞာံ ၁၈၈၆- ၁၉၈၇ ဒၞာဲ ဍုၚ်ဗကာံတြေံ ပ္ဍဲကဵုကွာန် (မြၚ်းကပါ) ဗ္ဒဲါကျာ်စေတဳမြ (မြစေတီ) ဂှ် ဂွံဆဵုကေတ်လဝ်တုဲ ကော်ခဴစ လိက်တၟံ (မြစေတီ) ရောၚ် ဂွံတီကေတ်ရ။
လိက်တၟံစေတဳမြ (ရာဇကုမာရ်) ဂှ် ညံၚ်ဂွံဒှ်စၟတ်သမ္တီစရၚ်ဂၠးကဝ်မာန် ပ္တိုန်ထ္ၜးလဝ် နူကဵုသၞာံ (၂၀၁၄) ဂိတုမာတ်ဂှ် တုဲ ပ္ဍဲသၞာံ (၂၀၁၅) ဂိတုအံက်တဝ်ဗာ ပ္ဍဲကဵုကောံဓရီု Memory of the World အစဳဇန် International Advisory Committee ဂှ် အတိုၚ်ဂကောံယူနိတ်သကိုဝ် သ္ပဒ္တန်လဝ်ဂှ် ပ္ဍဲကဵုဂိတုမေ (၂၄) သၞာံ (၂၀၁၆) ဂှ် နူကဵုဌာနဝန် ဇၞော်ပရေၚ်သာသၞာ ပံက်လဝ်အခန်ကၞာ စုတ်လဝ်တဆိပ်ကြာ (Logo) ဂၠးကဝ်ဒၞာဲဂှ်ရောၚ်။
