ကြဴနူကဵုဗော်ဍုၚ်မန်တၟိ ကဵုဗစိုပ်လိက်စၞောန် ကုဂကောံပံၚ်ကောံပရေၚ်ဂကူမန် MAU ဗွိုၚ်ပိဗွိုၚ် ကိစ္စစပ် ကဵုကဏ္ဍပရေၚ်ဍုၚ်ကွာန် ဗော်ပရေၚ်ဍုၚ်ကွာန်ဟေၚ် ဒးအာက္ဍိုပ် ပ္ဍဲအခန်ပၠတရဴ နဗ်ၜတ်ပိဂအုံ မွဲဂအုံတုဲဂှ် ပရေၚ်ဂွံကၠောန်ကောံဓရီုဇၞော်လေဝ် ဒှ်အာတၚ်ဆိုအ်ဗ ဇၞော်ကဵုဇြဟတ်ရောၚ် ညးစၞးကမ္မတဳ ဗွိုၚ်အပ္ဍဲဍုၚ် တံ ဟီုဂးအိုတ်ရ။
ရန်တၟံကဵုပရေၚ်ညဳသၟဟ်ဂကူ ဂွံမံက်ကၠုၚ်ကီု၊ ဂကောံပၠတရဴ ဟွံသေၚ် ဂကောံမသ္ပစၞးကဵုဂကူမန်မွဲမွဲ သ္ဂောံ မံက်ကၠုၚ်ကီုတုဲ အပ္ဍဲပွိုၚ်ဂိတုမေဏံ နူကဵု MAU က္ဋိုက်ပ် ဖျေံလဝ်ဗီု သွက်ဂွံကၠောန်ဗဒှ်အာကောံဓရီုဇၞော် ပရေၚ်ဂကူမန်နွံမံၚ်ဂှ် နကဵုဗော်ဍုၚ်မန်တၟိ ဒစးဒုၚ်ဟီုဂးကၠုၚ်ကိစ္စဒၞဲါ ဗော်ပရေၚ်ဍုၚ်ကွာန်တံ သ္ဂောံပါ လုပ် အပ္ဍဲအခန်ပၠတရဴဂကူဂှ်ရ။
ဖက်ဆောညးအုပ်ကာ ၂ ဂကောံပံၚ်ကောံပရေၚ်ဂကူမန် ဗွိုၚ်အပ္ဍဲဍုၚ် နာဲဝဏ္ဏဂှ် “ပိဂအုံ မွဲဂအုံ ညးမိက် ဂွံဟီုဂှ် ဗော်ပရေၚ်ဍုၚ်ကွာန်ရပ်လွဟ်မွဲဂအုံ၊ ဗော်ပရေၚ်ဍုၚ်ကွာန်ဗွိုၚ်အပ္ဍဲဍုၚ်ဏံမွဲဂအုံကဵု ဂကောံမှာဇန် CSO,CBO တံ မွဲဂအုံ အဓိပ္ပဲါဂှ်၊ အဵုကိစ္စဏံ နူကဵုလၟုဟ် ကမ္မတဳဗဟဵု MAU တံ ကဵုသ္ဂုတ်သွာတ်မာန်မှ ဗော်ဍုၚ်မန်တၟိဂှ် ညးတံပါလုပ် ပ္ဍဲကောံဓရီုဇၞော်ဏောၚ်၊ အဵုညအ်ဂှ် ဒှ်အခက်အခုဲဆိုအ်ဗဇၞော်အိုတ်ရ” သာ် ဝွံ ဟီုရ။
ပ္ဍဲကောံဓရီုဇၞော်တေံ ဗော်ပရေၚ်ဍုၚ်ကွာန်မန်၊ ဗွိုၚ်မန်ပန်ဗွိုၚ်၊ ကဵုညးစၞးဂကောံမှာဇန်တံ စုၚ်လေၚ် တိုန် စိုပ်တုဲ ဂကောံပၠတရဴ ဂကောံမသ္ပစၞးဂကူဏံ ဗီုပြၚ်လဵုဒက်ပ္တန်ရောဂှ် သဳကၠဳအာညးသ္ကံမ္ဂး ဒးရးဏောၚ်၊ ကိစ္စဏံ နကဵုဗွိုၚ် MAU လေဝ် ကဵုသ္ဂုတ်သွာတ်ဟွံဂွံရောၚ် နာဲဝဏ္ဏဂှ် ဆက်ဟီုရ။
ပ္ဍဲအခန်ပရေၚ်ဍုၚ်ကွာန်၊ ဗော်ပရေၚ်ဍုၚ်ကွာန်ဟေၚ် ဒးအာက္ဍိုပ် နကၞောတ်အထောတ်တုဲ ဂကောံနာနာ ပါလုပ်ပ္ဍဲအခန်ပၠတရဴ ၁/၃ မာန်ဂှ် ဒုၚ်တဲမာန်၊ ဟွံမာန် ဗွိုၚ်မဆက်စပ်တအ် ဗွိုၚ်ညးကုညး ပညဳလညာတ် တုဲ ပ္ဍဲဂိတုမေ ပထမသတ္တဟဏံ က္လေၚ်ကဵုပရိုၚ်ညိ သာ်ဝွံ နူကဵုဗော်ဍုၚ်မန်တၟိ ကဵုနၚ်စၞောန် ကု MAU ပ္ဋဲ ဂိ တုအေဗရဴ ၂၉ ဂှ်ရ။
ပ္ဍဲကဵုလိက်စၞောန်ဂှ်ဝွံ အခန်ပရေၚ်ဍုၚ်ကွာန်ကီု၊ ဗော်ပရေၚ်ဍုၚ်ကွာန်ကီု ကၠးကၠးမးမး ဗော်ဍုၚ်မန်တၟိ ချူ ဓမံက်လဝ်ကဵု ဟွံမွဲဂှ် ဂွံဆဵုကေတ်ရ။
“လညာတ် MAU လ္တူကိစ္စ ၁/၃ ဏံဂှ် ဟီုကလးလဝ်ပ္ဍဲကောံဓရီုတုဲကၠုၚ်ဂှ်တုဲရ သွက်ဒးသဳက္လဳကေတ် ပ္ဍဲ ကောံဓရီုဇၞော်တေံရ၊ သွက်ဂွံဒးကလးကဵုဗော်ဟွံမွဲရပုဟ်” သာ်ဝွံ ညးအုပ်ကာ MAU ဗွိုၚ်ဍုၚ်သ်အာၚ် နာဲ ပၟိက်ဆာန် ဟီုရ။
ဂကောံပံၚ်ကောံပရေၚ်ဂကူမန်ဂှ် ဒက်ပ္တန်လဝ်နကဵုဗွိုၚ်ပန်ဗွိုၚ်မတွံဂး ဗွိုၚ်အပ္ဍဲဍုၚ်၊ ဗွိုၚ်ပယျဵု ကေုာံ ဍုၚ် သေံ၊ ဗွိုၚ်ဍုၚ်သ်အာၚ် ကဵု ဗွိုၚ်ဗော်ဍုၚ်မန်တၟိရ။
တုဲကၠုၚ်ဂိတုအေဗရဴ ရ သၞာံ ၂၀၁၆ ဂှ် ကမ္မတဳဗဟဵုဂကောံပံၚ်ကောံပရေၚ်ဂကူမန် MAU ကဵု ညးစၞးဗော် ဍုၚ်မန်တၟိတံ ဆဵုဂဗသဳကၠဳညးသ္ကံ ပ္ဍဲရုၚ်ဆက်ဆောံဝၚ်က အလန်လက္ကရဴအိုတ်တုဲ အပ္ဍဲဂိတုမေဏံ ညံၚ်ဂွံဒှ်ကၠောန်ကောံဓရီုဇၞော် ပရေၚ်ဂကူမန်မာန်ဂှ် ဆက်ဓမံက်အာရုပ်ရဴရောၚ် တုပ်လဝ်စိုတ်နွံရ။