ကောန်ကမၠောန် (၅) တၠ မဝဳမၚ်ဒၟံၚ်သဵု ဗော်ဍုၚ်မန်တၟိ ပ္ဍဲတ္ကအ်ကောန်လုံ ပွိုၚ်ဍုၚ်ရေဝ်ဂှ် နူဒပ်ပၞာန်ဍာ် အလဵုအသဳ ရပ်ဏာတုဲ ပ္ဍဲဂိတုမေ ၁ရ ဂှ် ကလေၚ်ဗၠးစဴကၠုၚ်ဣရ ရဴဝွံ ဂွံတီကေတ်နူဂြောဝ်ဂတာ တၠခန္ဓ တအ်ရ။

တ္ကအ်ကောန်လုံ (Google Earth)

ကောန်ကွာန်အၚ်ဒၚ် (၂) ကောန်ပလုၚ် (၃) တၠ မကၠောန်ဒၟံၚ် ကလောန်ဝဳသဵု ပ္ဍဲတ္ကအ်ကောန်လုံ နွံပလိုတ် ကွာန်အၚ်ဒၚ် ပွိုၚ်ဍုၚ်ရေဝ်ဂှ် ပ္ဍဲဂိတုမေ (၁၅) နူဒပ်ဍာ်ရပ်ဏာ ထိၚ်စွံလဝ် ပ္ဍဲ (စကခ -၁၉) ဍုၚ်ရေဝ်တုဲ ဍေံတအ် ကလေၚ်ဗလးဖျဴရ။

“မူဟိုတ် ဍေံတအ်ဂွံရပ်ဂှ် ဒဵုလၟုဟ် ပိုဲဟွံတီဏီဖိုဟ်။ လၟုဟ်ဗၠးကၠုၚ်ဂှ် ဍေံတအ်ဗၠးစဴကၠုၚ် နူဇိုၚ်သဝ်တ္ၚဲဏအ် ၜိုတ် (၄) နာဍဳ ဂွံတီကေတ်” နာဲမိုၚ်ယှေန် အပါ နာဲမေန်ဇြဝ် (မၞိဟ်ဒးဒုၚ်ရပ်) ဂှ် ဂးရ။

မၞိဟ်တအ်ဏအ်ဂှ် မၞိဟ်ခိုဟ်ဟ် မၞိဟ်လ္ဂူလ္ဂူရ၊ လိၚ်လဝ် သွက်ကလောန်ပိုဲ ဍာံဍာံရ နကဵုဂလာန်ဒုၚ်ဝန်သာ်ဏအ် ရုၚ်ဆက်ဆောံရေဝ် ဗော်ဍုၚ်မန်တၟိ ဒးဒုၚ်ထ္ပက်စၟတ်တဲ နာဲမိုၚ်ယှေန် ဂးရ။

ညးတာလျိုၚ်မွဲတလ နူခရိုၚ်ထဝါဲ ဗော်ဍုၚ်မန်တၟိဂှ်လေဝ် ဒးဒုၚ်ရပ်ဂှ် ဍာံဍာံရ၊ မူဟိုတ် ဍေံတအ်ရပ်ဂှ် ဟွံတီ၊ ဂွံဟီုထ်ၜး သောဲသောဲဗြောဲဗြောဲ ကုဌာန်ပရိုၚ်တအ်ဂှ် ဟီုထ်ၜးဟွံမာန်ဏီ ဂးကဵုဌာန်ပရိုၚ်ဗၠးၜးမန်ရ။

“မၞိဟ် နူကွာန် ကၠေံအာ (၅) တၠဂှ် ဒှ်ကွေံကွေံရ။ ဆ္ဂး ဟွံဂံၚ်တေၚ်ကဵု ဗၠာဲသၟိၚ်၊ မဒှ်ရောတှေ် ဂွံတီကေတ် နူဒပ်ဍာ်ဏောၚ် ရပ်ဏာတှေ် ဟွံဂံၚ်တေၚ်” နာဲတေအ်ယှိုၚ် သ္ကိုပ်အုပ်ဓုပ်ဂကောံကွာန်အၚ်ဒၚ် ဂးရ။

တ္ကအ်ကောန်လုံဏအ်ဂှ် ဗော်ဍုၚ်မန်တၟိ ဂွံလဝ်ဂရာန် အကွက် (၃၀) သၞာံ နူကဵုအလဵုအသဳတုဲမံၚ်ရ နာဲတေအ်ယှိုၚ်ဂး။

ဗီုဒဒှ်ဏအ်ကီု သတ္တဟတုဲကၠုၚ်ဏအ် ပ္ဍဲပွိုၚ်ဍုၚ်ရေဝ်ဏအ်ရ ရဲဗော် ဗော်ဍုၚ်မန်တၟိ (၃) တလကဵု ကောန်ကွာန်လ္ၚဵု မကဵုအရီုဗၚ်တအ်လေဝ် ဒးဒုၚ်ရပ်လဝ်ကီု နူဌာန်ပရိုၚ်ဗၠးၜးမန်ပိုဲ ဂွံလဝ်ပရိုၚ်တုဲကီုလေဝ် ဟွံဂွံပရိုၚ်သ္ပဒ္တန် နူဗော်ဍုၚ်မန်တၟိရ။