ပ္ဍဲဂၠးအရှာံကျာ်ဣသိယဵုဂှ် ဗ္ဒိုပ်ဇူဒီုလ္ၚဵုလ္ၚဵု သိုၚ်လဝ်အတိုၚ်စၞောန်ဟွံသေၚ်တုဲ အပ္ဍဲပွိုၚ်မွဲဂိတု ရိုဟ်ပလီုညံၚ်ဂွံတုဲဂှ် ဝန်ဇၞော်ကၟိန်ဍုၚ် ဥူအံၚ်ကိုဝ် နူဌာနဝန်ဇၞော် ပရေၚ်သာသနာကဵုပရေၚ်ယေန်သၞာၚ် ကဵုလဝ်စၞောန် ပ္ဍဲဂိတုဂျောန် (၂၇) ဂှ်ရ။
ကျာ်ဣသိယဵု (Facebook)
ဂလာန်စၞောန်ပၟိၚ် သွက်ဂွံရိုဟ်ပလီု ဗ္ဒိုပ်ဇၞူဂမၠိုၚ် အပ္ဍဲပွိုၚ်မွဲဂိတုမ္ဂးဂှ် လၟိဟ်တ္ၚဲလုပ်အဝေါၚ်ဂှ် စနူဂိတုဂျောန် (၂၇) ရဒှ်တုဲ တလဗ္ဒိုပ်တံ ဟွံပေၚ်စိုတ်မ္ဂး နူအလဵုအသဳတွဵုရး သောၚ်က္လးကဵုဏောၚ် ဌာနဝန်ဇၞော်ပရေၚ်သာသနာကဵု ပရေၚ်ယေန်သၞာၚ် ဟီုရ။
“သွက်ဗ္ဒိုပ်ဇူဒီု (ရိုးရိုးလေး) ဂှ် ကဵုလဝ်အခေါၚ် (၁၃၅) ဗ္ဒံရ၊ဆ္ဂး ကၠောန်ၜက်အာဂှ် နွံမံၚ် (၁၀၆) ဗ္ဒံ။ ကၠံတရဴဗ္ဒံဏံဂှ် ဒးပလီုကဵုဏောၚ်” ဝန်ဇၞော်ကၟိန်ဍုၚ် ဥူအံၚ်ကိုဝ် ဟီုဂးဏာ ပ္ဍဲပေါဲသောၚ်က္လးလိက်ပရိုၚ်ရ။
စပ်ကဵုကိစ္စကျာ်ဣသိယဵုတုဲ ပ္ဍဲဂိတုဂျောန် (၂၇) ဂှ်ကၠောန်ကၠုၚ်လဝ် ကောံဓရီုပ္ညဳပ္ညပ်ကမၠောန် ပ္ဍဲရုၚ်ဝန်ဇၞော် ပရေၚ်သာသနာ ကဵု ပရေၚ်ယေန်သၞာၚ် ပ္ဍဲနေပျဳဒဝ်တုဲအာတုဲဂှ် ကၠောန်သ္ပပေါဲသောၚ်က္လးလိက်ပရိုၚ်တုဲ ဥူအံၚ်ကိုဝ် ဟီုဂးဏာသာ်ဂှ်ရ။
ပ္ဍဲကောံဓရီုပ္ညဳပ္ညပ်ကမၠောန် စပ်ကဵုကျာ်ဣသိယဵုဂှ်ဝွံ ဝန်ဇၞော်ကၟိန်ဍုၚ် သူရဥူအံၚ်ကိုဝ်၊ ဝန်ဇၞော် ဇၞူဒိပ်ဟဝ်တေဝ်ကဵု ပရေၚ်ရဲအာတရဴ ဥူအုၚ်မိုၚ်၊ ဂအုပ်ဝန်ဇၞော်တွဵုရးမန် ဥူမေန်န်ဥူ၊ ဝန်ဇၞော်ပရေၚ်ဝေါဟာမၞိဟ် တွဵုရးမန် ဒံက်တာထိၚ်ဠေန် တအ် တိုန်စိုပ်အိုတ်ရ။
“အခက်ခုဲရဲလ္ၚောဝ်ကျာ်တံ၊ ဓဝ်စံၚ်တူ ညးမၞုံပ္ဍဲလ္တူဒဵုကျာ်ဣသိယဵုတံ နွံဗီုလဵုရောဂှ် တီမံၚ်။ သွက်ကောန်တွဵုရးမန်တအ် စိုတ်ဂွံၜိုဟ်ဂှ်ကၠောန်ကဵုဏောၚ်” ဂအုပ်ဝန်ဇၞော်တွဵုရးမန် ဥူမေန်န်ဥူ ဂးရ။
တၠဗ္ဒိုပ်ဇူဒီု (ရိုးရိုးလေး) ဥူနေထိတ်တိၚ်နာၚ် ဓမံက်ဟီုလဝ် ပ္ဍဲမုက်လိက်ဗလးကျာ ညးတေံဂှ် “သွက်ဂွံထပ်သိုၚ် (၁၀၆) ဗ္ဒံဂှ် အာတ်မိက်လဝ်အခေါၚ်သိုၚ် (လာၚ်သေန်) ပ္ဍဲဌာနဝန်ဇၞော် ပရေၚ်ဇၞူဒိပ်ဟဝ်တေဝ် ကဵု ပရေၚ်ရဲအာတရဴကီုရ ဆ္ဂး ဟိုတ်နူဒှ်အာ ကာလပေါဲရုဲမာဲဂှ်ရ အလဵုအသဳတၟိတိုန်တုဲမ္ဂးက္လေၚ်ပ္တိုန်ပၠန် ကဵုလဝ်စၞောန်ဗီုဂှ် ဂွံတီကေတ်ရ။
မူဝါဒ အလဵုအသဳတၟိဂှ် အာတ်အခေါၚ်သိုၚ် ပ္ဍဲဌာနဝန်ဇၞော်ဇၞူဒိပ်ဟဝ်တေဝ်ကဵု ပရေၚ်ရဲအာတရဴတုဲ အခေါၚ်သိုၚ် စှေ်ကၠုၚ်ဟေၚ် သိုၚ်ခၞံဂွံရ။ လၟုဟ်အကွက်ဆောံလဝ် ပ္ဍဲပရေၚ်သိုၚ် (၁၀၆) ဗ္ဒံဂှ် အာတ်ဓဝ်ကရုဏာ ပ္ဍဲက္ဍိုပ်သ္ကိုပ်မှာဇန် ဒဝ်အံၚ်သာန်သုကျဳ၊ သမ္မတဍုၚ်၊ ဂအုပ်ဝန်ဇၞော် တွဵုရးမန်၊ဌာနဝန်ဇၞော် ပရေၚ်ဇၞူဒိပ်ဟဝ်တေဝ်ကဵုရဲအာတရဴ၊ ဌာနဝန်ဇၞော် ပရေၚ်သာသနာ တံတုဲ အတိုၚ်ညးတံ သ္ဂုတ်သွာတ်ဂှ် ဒ္ဂေတ်ဗက်အာဏောၚ် ဂးရ။
၁၀၆ ဗ္ဒံ ထပ်သိုၚ်လဝ်ဂှ် အတိုၚ်ဂလာန်ပ္ညုၚ်ကောံဓရီု သမ္မတဥူတိၚ်သိၚ်ကဵု ဌာနဇၞူဒိပ်ဟဝ်တေဝ်-အာတရဴတအ် သ္ပလဝ် ပ္ဍဲ (မြန်မာအာစဆီယံဆီးဂိမ့်) သၞာံ ၂၀၁၃-၁၄ ဂှ်ရ ထပ်ပယျေဝ်ပ္တိုန်အဆံၚ်ဍေံဏောၚ် တလဗ္ဒိုပ်ဇူဒီု (ရိုးရိုးလေး) ချူဓမံက်လဝ် ပ္ဍဲမုက်လိက်ဗလးကျာ ညးတေံရ။
ကျာ်ဣသိယဵုနွံကဵုဝၚ်မပြာကတ် မြဟ်ဂဵုအိုတ် ပ္ဍဲတွဵုရးမန်ဝွံ မွဲမွဲသၞာံ ရဲလုပ်ဗဵုလ္ၚောဝ်တံ နွံဒဵုကဵု ၂ ပြကောဋိကိုဋ်ကဵု ၂ ကိုဋ်ပြၚ်တုဲ သြန်လုပ်လေဝ် နွံဒဵုကဵု ၁.၅ ဗဳလျာန်ဒ္ကေဝ်ရ ဂွံတီကေတ်။
