ပ္ဍဲကဵုဒေသတ္ကံခၟိုၚ်၊ ကွာန်ယိုက် (တခွပ်ကွၚ်း) စၟတ်ဖဠာတ်ခံက် ၆၈၇ တိဝါဗ္ၚ မကြပ်မံၚ်ကဵုကြုၚ် ကွာန်အပြိုၚ်ဂှ် အခိၚ်ကသီုဗြဴဂူမ္ဂး ကၟိုန်မၞုံဇိုၚ်ကြုၚ်ပိုတ်အာဂှ်ရ ဍာ်ကြုၚ်ထပက်လုပ်ကၠုၚ် ပ္ဍဲခံက်ဝါဗ္ၚတံဂှ်တုဲ တိဝါဗ္ၚ ၂၀၀ ဨကပြၚ်ၚ် တဵုသြောံ ဟွံဂွံ လီုလာ်မံၚ်ရာၚ် ဂွံတီကေတ် နူကဵုတၠဝါဗ္ၚတံ ဟီုလဴရ။
အပ္ဍဲဂှ်မ္ဂး တိဝါဗ္ၚ နာဲဝေန် ၂၅ ဨက၊ နာဲရှိန် ၂၅ ဨက၊ မိခေန်ရှိန် ၂၀ ဨက၊ နာဲခေန်မေန်ဝေန် ၁၈ ဨက၊ နာဲတေၚ်ထောန် ၁၅ ဨက၊ နာဲထောန်ကျဳ ၁၃ ဨက၊ မိသာန်ဌေ ၁၁ ဨက၊ အံၚ်ပေန်လာ ၁၁ ဨက၊ နာဲဟန်ရှိန် ၁၁ ဨက၊ နာဲသိုဝ်ခိုၚ် ၁၁ ဨက၊ နာဲလှထူအံၚ် ၁၀ ဨက၊ နာဲမိုၚ်ဨ ၁၀ ဨက၊ အံၚ်ကိုဥု ၁၀ ဨက၊ နာဲကျဝ်သာန် ၉ ဨက၊ နာဲသာန်ဖူ ၆ ဨက၊ နာဲကျဝ်ဝေန် ၆ ဨက၊ နာဲတာန်သိုဝ် ၅ ဨက၊ နာဲယေန်ဌေ ၅ ဨက ကေုာံ မိကျဳကျဳဝဵု ၁၇ ဨကတံဝွံ လီုလာ်မံၚ်ရောၚ် ဂးရ။
ဂွံဆဵုကေတ် တိဝါဗ္ၚ လီုလာ်မံၚ် (MNA)
နာဲထောန်ကျဳဂှ် “တိဝါဗ္ၚပိုဲ မုဟိုတ်ဂွံလီုအာဂှ်တှေ် ဗြဴဂူဂၠိုၚ်တုဲ ကၟိုန်ဂှ် ဍေံဒုၚ်ဟွံမာန်၊ လ္ပါ်ဍာ်ကြုၚ်ဂှ် မွဲလ္ပါ်၊ ဍာ်ဗြဴမွဲလ္ပါ် တိလီုအာ အတိုၚ် ၁၃ ဨက ဖအိုတ်ရ၊ တိအမူမွဲဓဝ် ဟွံသေၚ်ပုဟ်၊ တိဗ္ဒဲါဗ္ဒါဲတံလေဝ် လီုအာတၟာဂလိုၚ်၊ တိဝါဗ္ၚလီု လာ်အာ ၜိုတ် ၂၀၀ ဨကပြၚ်မံၚ်ဏောၚ်” သာ်ဝွံ ညးဟီုရ။
ကၟိုန်ပိုတ်အာဂှ်ရ ဍာ်ပ္ဍဲကြုၚ် လုပ်ကၠုၚ်တိဝါဗ္ၚတံတုဲ နူကဵု သၞာံ ၂၀၁၁ တေံ စဵုကဵုစိုပ်သၞာံဏံ ကၠောန်ဟွံဂွံရ၊ သၞာံတုဲ ကၠုၚ်တေံဂှ်လေဝ် စပလေဝ်မံၚ်ဏီရ၊ သၞာံဏံ ပလေဝ်ဟွံမာန်ရ သာ်ဝွံ ညးဆက်ဟီုရ။
ညးတၠဝါဗ္ၚ တိလီုလာ်မံၚ်တံဂှ် နူကဵုကွာန်ကလအ်၊ အပြိုၚ်၊ ကအ်ဍောတ်၊ နှေဟ်မုက်တံတုဲ ဗြဴဂူဂၠိုၚ်မ္ဂး ဍာ်ပ္ဍဲကြုၚ် ထပက်လုပ် ပ္ဍဲခံက်ဝါဗ္ၚ မွဲသၞာံကဵုမွဲသၞာံ ဂၠိုၚ်ကၠုၚ်မံၚ်ဂှ်ရ တိဝါဗ္ၚကြပ်ကဵုကြုၚ်တံဝွံ တၞံလမု တိုန်မံၚ်ပ္ဍဲခံက်ဝါဗ္ၚရောၚ် ဂွံတီကေတ်ရ။
တၠဝါဗ္ၚ မိကျဳကျဳဝဵုဂှ် “ဝါဂှ်ဂြာတ်ကေတ် မဟရာတ်ဖိုဟ်လေဝ်၊ ဍာ်ကြုၚ်လုပ်ကၠုၚ်မံၚ်တှေ် ကၠောန်ဟွံဂွံ၊ ပြဟ်ဟ်ဏံ တှေ် ဒးဒေါံလဝ် အတိုၚ်တိဝါဗ္ၚ ၁၇ ဨက ရ၊ ကၠောန်မံၚ်ကမၠောန် ဝါဗ္ၚမွဲရတှေ် ကမၠောန်ဏံလၟုဟ်ကၠောန်ဟွံဂွံ ဒးဂၠာဲ စၚုဲ က ရ” သာ်ဝွံ ညးဟီုရ။
ဒၞဲါတိဝါဗ္ၚ လီုလာ်မံၚ်လၟုဟ်တံဝွံ လောန်ကၠုၚ် ၜိုတ် ရ-၈ သၞာံတေံ တိ မွဲဨကမ္ဂး အကြာ ၅၀-၇၀ န သြောံတိတ်မံၚ် ကီုလေဝ် ပ္ဍဲကဵုအခိၚ်လၟုဟ်မ္ဂး ကၠောန်ကမၠောန်ဝါဗ္ၚဟွံဂွံတုဲ ဒးဒေါံဇူလဝ်ရောၚ် တၠဝါဗ္ၚတံ လဴထ္ၜးလဝ်ရ။
“လ္ပါ်ပိုဲဂှ်လေဝ် ရံၚ်အကာဲအရာတုဲ ပ္တိုန်ထ္ၜးအာဏောၚ်၊ နကဵုဆန္ဒ ညးတၠဝါဗ္ၚတံလေဝ် အကာဲအရာတိဝါဗ္ၚ ဗီုလဵုနွံ၊ ဗီု လဵုဒးပထေက် ကၠုၚ်ပ္တိုန်ထ္ၜး အာတ်ရီုဗၚ်ကဵုပိုဲဏောၚ်တှေ် ပ္တိုန်ထ္ၜးအာကဵု ဌာနဆေၚ်စပ်တံဏောၚ်” သာ်ဝွံ သကိုပ် အုပ်ဓုပ်ကွာန်ကလအ် ဥုခေန်မိုၚ်ဝေန် ဟီုရ။
တိဝါဗ္ၚ မၞံုပ္ဍဲကွာန်ယိုက်ဝွံ ပ္ဍဲကဵုသၞာံဏံမ္ဂး တိဝါဗ္ၚ တဵုသြောံဂွံ ရ၉၇၀ ဧက နွံရောၚ် ဂွံတီကေတ် နူကဵု(စာရေး) တခဳကွာန်ယိုက်ရ။
0 Comments