ကောန်ဍုၚ်သၟာၚ် ၅ တၠ ညးတာလျိုၚ်ကာန်ထရာ် ကမ္ပဏဳ MCL (ရုၚ်စက်တိဗုတ်မတ်မလီု) ဒးဒုၚ်ပ္တိုန်လဝ်ဂဗုတ် ပ္ဍဲရုၚ်သၞောဝ်ဓဝ်ပွိုၚ်ဍုၚ်ကျာ်မြဟ် နကဵုဥပဒေလဝကဂှ် ဒုၚ်ကေတ်ဒဏ်သြန်တုဲ ပ္ဍဲအံက်တဝ်ဗာ (၂၅) အတိုၚ်သ္ဂုတ်သွာတ် အလဵုအသဳကၟိန်ဍုၚ် ဒုၚ်ကဵုကတိပါၚ် ပ္ဍဲရုၚ် ဌာနက္ဍိုက်ပ် ပရေၚ်ကောပ်ကာဲစရၚ်မၞိဟ်လုပ်တိတ် ကေုာံ စရၚ်ဒြဟတ် ကောန်ဍုၚ် တွဵုရးမန်တုဲ သၠးကဵုဒုဟ် ဗက်ဗ္ဒဴနူဍုၚ်ရ သာ်ဝွံ ဂွံတီကေတ် နူရုၚ် လဝက တွဵုရးဍုၚ်မန်ရ။
“မၞိဟ်တံဏံ တုဲတုဲကၠုၚ်တေံ မွဲဝါလေဝ် ကေၚ်ဗၠေတ်လဝ်နူသၞောဝ် ဟွံမွဲဏီတှေ် အလန်ဏံ ညံၚ်ဂွံသၠးဒုဟ်ဗက်ဗ္ဒဴနူဍုၚ်ဂှ် ဍေံတံပ္တိုန်လိက် အာတ်မိက်ဓဝ်ဆာန်ဍူ ပ္ဍဲဝန်ဇၞော်ကၟိန်ဍုၚ်ရ။ ဝန်ဇၞော်ကၟိန်ဍုၚ်လေဝ် အလန်ဏံမွဲဝါ သၠးအခေါၚ်ဏောၚ်ဂးတုဲ ဍေံတံလေဝ် ဗွဲကြဴ ဟွံကဵုဒှ်ရဗီုဏံ အတိုၚ် စေဝ်ပၞောန်/ဥပဒေဍုၚ်ဗၟာဂှ် ဒ္ဂေတ်ဗက်ဏောၚ် ပ္ဍဲအံက်တဝ်ဗာ ၂၅ ဍေံတံဒုၚ်လဝ်ကတိပါၚ်” သာ်ဝွံ ဥူယှိၚ်ဝေန် သ္ကိုပ်က္ဍိုက်ပ်တွဵုရး ဌာနက္ဍိုက်ပ်ကောပ်ကာဲစရၚ်မၞိဟ်လုပ်တိတ် ကေုာံ စရၚ်ဒြဟတ်ကောန်ဍုၚ် တွဵုရးမန် ဂးရ။
ပ္ဍဲဂိတုသေပ်တေမ်ဗာ (၂၀) တေံ ကောန်ဍုၚ်ကြုက် ၁၁ တၠ စိုပ်ကၠုၚ်သွက်ဂွံကၠောန်ကမၠောန်ဂှ် ဟိုတ်နူဟွံပလံၚ်ဗ္စိုပ်ပရိုၚ် ရုၚ်လဝက ပွိုၚ်ဍုၚ်ဂှ်ရ ကောန်ဍုၚ်သၟာၚ် ညးတာလျိုၚ်ကာန်ထရာ်ကမ္ပဏဳ ၅ တၠတံ အတိုၚ်ၝောံပိုဒ် ၅-၁ အက်ဥပဒေ စၟတ်သမ္တီကောန်ဍုၚ် သၞာံ ၁၉၄၀ ဂှ် ဒဏ်သြန် ညးမွဲ မွဲကိုဋ်ဒကေဝ်ကီု၊ အတိုၚ်ၝောံပိုဒ် ၁၃-၁ အက်ဥပဒေ ကောပ်ကာဲပရေၚ်မၞိဟ် သၞာံ ၁၉၄၇ ဒၟါနူဝးပကဝ် စေဝ်ပၞောန်ဝဳသာဂှ် ဒဏ်သြန် ညးမွဲ ပိကိုဋ်ဒကေဝ်ကီု ဒုၚ်ကေတ်ဒဏ်သြန်ရ။
“ကောန်ဍုၚ်သၟာၚ် နွံပ္ဍဲ ရုၚ်စက် MCL ဝးစေဝ်ပၞောန်ဝဳသာတုဲ ဒးဒုၚ်စောဲဒုဟ်ဂှ် ဣဏံ ဒှ်အလန်ကၠာအိုတ်ရ။ ဟိုတ်နူ ဟွံတေၚ် (ဟွံပ္တိုန်)စရၚ်ကၟုဲဂှ်ရ ပိုဲစၟဳစၟတ်ဂွံတှေ် ပိုဲဒးစောဲဂဗုတ်တဝဵုရ” သာ်ဝွံ ဥူကိုဝ်ကိုဝ်လွေန် ခဒၚ်ဂြဳ ဌာနကောပ်ကာဲစရၚ်မၞိဟ်လုပ်တိတ် ကေုာံ စရၚ်ဒြဟတ်ကောန်ဍုၚ် ပွိုၚ်ဍုၚ်ကျာ်မြဟ် ဂးရ။
ကောန်ဍုၚ်သၟာၚ် ဂွံအခေါၚ်ဗၠးဒုဟ်ဗက်ဗ္ဒဴနူဍုၚ် ၅ တၠမ္ဂးဂှ် နူဍုၚ်ကြုက် Mr. Sun Zhenbin (PP No.E 3495005) ညးတာလျိုၚ် ကမ္ပဏဳ Citic ၊ Mr. Yu Jun Young (PP No. 3895005) ညးတာလျိုၚ်ကမ္ပဏဳ YNJG ၊ Mr Zhi Xu (PP No. G32402411) ညးတာလျိုၚ် ကမ္ပဏဳ ACK ၊ Ms. Chen Cuiping (PP No. E 44551731) ညးတာလျိုၚ် ကမ္ပဏဳ Huaxin တံပန်တၠ ကေုာံ ကောန်ဍုၚ်သေံ မာန်နေဂျာ ပရေၚ်အုပ်ဓုပ် (နူရုၚ်စက် MCL ) Mr. Thawan Mopongpeng (PP No. AA 1949819) မွဲတၠပါလုပ်ရ။
လၟုဟ် ပ္ဍဲရုၚ်စက်တိဗုတ်မတ်မလီု MCL ဂှ် ကောန်ဍုၚ်ကြုက် ၂၁၃ တၠ၊ ကောန်ဍုၚ်သေံ ၁၀၇ တၠ၊ ကောန်ဍုၚ် ကာမ္ဗဝ်ဒဳယာ ၂ တၠ သီုဖအိုတ် ကောန်ဍုၚ်သၟာၚ် နွံ ၃၂၂ တၠ ရဴဝွံ ဂွံတီကေတ် နူဌာနဝန်ဇၞော် ကောပ်ကာဲစရၚ်မၞိဟ်လုပ်တိတ် ကေုာံ စရၚ်ဒြဟတ်ကောန်ဍုၚ် တွဵုရးဍုၚ်မန်ရ။