စပ်ကဵုပရေၚ်ကမၠောန်ကၠတ်ထဝ်တွဵုရးမန်တုဲ အခါရဒးဓမံက်ရုပ်ရဴမ္ဂး ညးစၞးကၠတ်ထဝ်တံ ဗီုဒးဆဵုအခက်ခုဲဂှ် မိက်ဂွံလဴထ္ၜးသောၚ်က္လးကဵုတုဲ မွဲဂိတုမွဲဝါ ကော်ဆဵုဂဗကဵု ရဲမဳဒဳယာပရိုၚ်၊ ရဲချဳဒရာၚ်ပရေၚ်မၞိဟ် သီုကဵုရဲဒေသတံရောၚ် ဂွံတီကေတ် နူကဵုရုၚ်ကၠတ်ထဝ်တွဵုရးဍုၚ်မန်ရ။
ညးစၞးကၠတ်ထဝ်တံ ရေၚ်တၠုၚ်ဖန်ဇန်ဒၟံၚ်ကမၠောန်လၟုဟ်ဂှ် ညးဍုၚ်ကွာန် ဒေသဆက်စပ်တံ ဂွံတီကေတ်အောန်၊ တုဲပၠန် ပရေၚ်ဒးဒုၚ်ဟီုပါ်ပါဲလေဝ် နွံကၠုၚ်ဒၟံၚ်တုဲ မွဲဂိတု မွဲဝါ ယဝ်ဆဵုဂဗမာန်မ္ဂး ကိစ္စကမၠောန်ကၠတ်ထဝ်ဂှ် ကၠးကၠးခ္ဍးခ္ဍး ညးတံတီကေတ်မာန်ရောၚ် ညးစၞးကၠတ်ထဝ်တံ ဂးရ။
ကောံဓရီုကၠတ်ထဝ်တွဵုရးဍုၚ်မန် (ကၠတ်ထဝ်မန်)
ညးစၞးကၠတ်ထဝ်တံ အခါရ ဓမံက်ကမၠောန် အပ္ဍဲဒေသဇကုဇကုတံဂှ်မ္ဂး ကောန်ဒေသတံ လ္ၚဵုလ္ၚဵုတီကၠိုဟ် အောန်ဒၟံၚ်တုဲ ဂကောံကၠတ်ထဝ်တံဏံ ကၠောန်ဒၟံၚ်ကမၠောန်ဗီုလဵုရောဂှ် ဒးလဴကဵုညးတံထေက်၊ ညးဍုၚ်ကွာန်တံဏောၚ်စုတ်ကဵုလဝ်မာဲတုဲ မုကၠောန်ဒၟံၚ်မုရော၊ ဂစာန်ဒၟံၚ်ကီုရဟာ၊ ကဟဳသ္ၚိတ်ဒၟံၚ်ဟာ ညံၚ်ဟဂွံဒှ်ဗီုဏံဂှ် ဟွံလအ် ဟွံလအ် ဆဵုညးသ္ကံဗီုဗီုဏံတှေ် ဟွံတီဂှ်လေဝ် တီအာဏောၚ်၊ ရဲမဳဒဳယာပရိုၚ်တံလေဝ် ဗီုနွံပၟိက်သၟာန်မာန်ဏောၚ်၊ ကသပ်ဂၞန်လေဝ် ကဵုမာန် ဂွံမာန်ဏောၚ် ဒံက်တာအံၚ်နာၚ်ဥူ ဒုဥက္ကဌကၠတ်ထဝ်တွဵုရးဍုၚ်မန် ဂးရ။
“ဂိတုတုဲကၠုၚ်ဏံ ဂကောံအလဵုအသဳတွဵုရးမန်ကဵု ဂကောံမှာဇန်တံဂှ် ဆဵုညးသ္ကံနွံကၠုၚ်။ ဗီုဂှ်ကီု ကၠတ်ထဝ်ပိုဲကဵု ရဲမဳဒဳယာပရိုၚ်တံ၊ ကေုာံဂကောံပရေၚ်မၞိဟ် ဂကောံမှာဇန်တံ၊ ကေုာံကောန်ဒေသတံလေဝ် ဆဵုထေက်ကီုဏောၚ်၊ ပိုဲတံ ဆဵုညးသ္ကံမာန်တှေ် စပ်ကဵုကမၠောန်ကၠတ်ထဝ်ဂှ် တီကၠးသီုညးဖအိုတ်ဏောၚ်” ဒံက်တာ အံၚ်နာၚ်ဥူ ဟီုရ။
ကၠတ်ထဝ်တွဵုရးဍုၚ်မန် အလန်ဒုတိယဏံ စကၠုၚ်နူဂိတုမာတ်တေံတုဲ အပ္ဍဲဂွံကၠုၚ်ပွိုၚ် ၈ ဂိတုဏံ ကောံဓရီုလၟေၚ်ဍာံ ဂှ်ကၠောန်ဂွံ ၃ ဝါ၊ ကောံဓရီုတၟေၚ်ဂှ် ကၠောန်ဂွံ ၁ ဝါတုဲ ဂလာန်ပ္တိုန် ၁၇ ကေုာံ ဂလာန်ပုစ္ဆာ ၆၂ တံဂှ်လေဝ် သဳကၠဳကၠုၚ်တုဲရ ဂွံတီကေတ်ရ။
ပ္ဍဲကၠတ်ထဝ်တွဵုရးဍုၚ်မန် အလန်ဒုတိယဏံဂှ်ဝွံ နူကဵုအလုံ ၁၀ ပွိုၚ်ဍုၚ် ညးစၞးကၠတ်ထဝ် နွံ ၂၀ တၠ၊ ညးစၞးကောန်ဍုၚ်အရၚ် (ကရေၚ်၊ပအိုအ်၊ ဗၟာ) ၃ တၠ၊ ညးစၞး နူဒပ်ပၞာန် ၈ တၠ သီုဖအိုတ် ညးစၞးကၠတ်ထဝ် တွဵုရးမန် နွံ ၃၁ တၠရ။
