သွက်သ္ဘၚ်ကၠောံသၞာံတၟိ ကောန်ဂကူကရေၚ် ကၠောန်သ္ပပ္ဍဲဂိတုဒဳဇြေမ်ဗာ စၟတ်တ္ၚဲ၂၉ တေံဂှ် နူကဵုအလဵုအသဳ တွဵုရးဍုၚ်မန် ထံက်ပၚ်သြန် ၁၅၀ ကိုဋ်ဒေ ္ကဝ်ရောၚ် ဂွံတီကေတ်နူရုၚ်ဂကောံအလဵုအသဳ တွဵုရးဍုၚ်မန်ရ။
“အလန်ကၠာအိုတ် ကဵုသြန်ထံက်ပၚ် သွက်သ္ဘၚ်ကၠောံသၞာံတၟိကရေၚ်ဗီုဏံဂှ် ဒှ်အရာမသ္ပသမ္တီ ကုကောန်ဍုၚ်အရၚ်ပိုဲရ။ သွက်ပရေၚ်ၜိုဟ်လလံ ဂတတေံဟီုဟီု၊ သွက်ဂွံပ္ညဳပ္ညပ်ဇိၚ်တပ်ပရေၚ်ကောန်ဂကူဟီုဟီု၊ သြန် ၁၅၀ ကိုဋ်ဏံ ဟီုလ္ပာ်ဂၠိုၚ်တှေ် ဂၠိုၚ်ဏောၚ် ဟီုလ္ပာ်အောန်တှေ် အောန်ဏောၚ်၊ ဆ္ဂးဂုန်ဖဵုဍေံဂှ် ဒှ်အရာခိုဟ်ဟ်မွဲ သွက်ဂွံပ္တန်ဓဝ်ပတှေ် အကြာဂကူမွဲကဵုမွဲ၊ သွက်ဂှ်ဒှ်အရာသၟဟ်သၟန်ကောန်ဂကူတံဏောၚ်” သာ်ဝွံ ဥုအံၚ်မျေအ်ဃာၚ် ဝန်ဇၞော်ကေၚ်ကာကောန်ဍုၚ်အရၚ်ကရေၚ် တွဵုရးဍုၚ်မန် ဟီုကဵုဌာန်ပရိုၚ်မန်ရ။
သ္ဘၚ်ကၠောံသၞာံတၟိ ကောန်ဂကူကရေၚ် (KIC)
ပ္ဍဲတွဵုရးဍုၚ်မန်ဂှ် နွံ ၁၀ ပွိုၚ်ဍုၚ်တုဲ မွဲမွဲပွိုၚ်ဍုၚ်မ္ဂး က္လိဂွံသြန် ၁၅ ကိုဋ်ရောၚ်၊ သွက်ဂွံပ္တိတ်ကေတ် သြန်ထံက်ပၚ် သ္ဘၚ်ကၠောံသၞာံတၟိကရေၚ်ဂှ် ပ္ဍဲစၟတ်တ္ၚဲ ဒဳဇြေမ်ဗာ (၈) ဏံ ကမ္မတဳကၠောန်ဗဒှ်သ္ဘၚ်တံ ဒးအာပ္တိတ်ကေတ် အပ္ဍဲအခိၚ်ရုၚ် ပွိုၚ်ဍုၚ်ညးကဵုညးရောၚ် ဂွံတီလဝ်ရ။
“အလဵုအသဳတွဵုရးဍုၚ်မန်ဂှ် ရန်ကဵု သွက်ဂွံဓမံက်ပ္တိုန် သွက်ဂွံထိၚ်ဒက်မၚ်မွဲ အခိုက်ကၞာကောန်ဍုၚ်အရၚ်တံတုဲ ညးတံထံက်ပၚ်၊ ပ္ဍဲခေတ်အလဵုအသဳတၟိဏံ ဆတွဵုရးမန်သၟးဟွံသေၚ် ပ္ဍဲရးဒေသဇၞော် မဆက်စပ်တံဂှ်လေဝ် ထံက်ပၚ်ဗီုဏံကီုရ” သာ်ဝွံ ဥုသဝ်ချေတ်တာန် သၞာဲဒါ ဌာနဝန်ဇၞော်ပရေၚ်ကောန်ဍုၚ်အရၚ်ကရေၚ် ဟီုရ။
ပ္ဍဲအသေအဟာန် တ္ၚဲသ္ဘၚ်ကၠောံသၞာံတၟိကရေၚ်ဂှ် ရေၚ်တၠုၚ်ထ္ၜးပျးအာ အစဳဇန် ဇက်တိုန်ရှေ်အလာံ ကောန်ဂကူကရေၚ်၊ ပေါဲပြိုၚ်လှေ်ဒုၚ် ကရေၚ်၊ ပေါဲလက်ပၠုဲ ကေုာံ ဂဳတကရေၚ်၊ ပေါဲဇါတ်ကရေၚ် သီုကဵုအာဲကၟာဲအခိုက်ကၞာကရေၚ်တံရောၚ် ဂွံတီလဝ်ရ။
တ္ၚဲကၠောံသၞာံတၟိ ကောန်ဂကူကရေၚ်ဂှ် ဒှ်တ္ၚဲဂိတုပုဟ် (၁) မံက်တုဲ သ္ပသမ္တီကၠောန်ကၠုၚ်နူသၞာံ ၁၉၃၇ ခေတ်အလဵုအသဳအၚ်္ဂလိက် (ကၠာဍုၚ်ဗၟာဟွံဗၠးၜး) တေံရတုဲ သ္ပသမ္တီလဝ် နဒဒှ်တ္ၚဲကၟာတ်ရုၚ်အလုံကၟိန်ဍုၚ် မွဲတ္ၚဲကီုရ။
