ရန်ကဵုသွက်ဂွံကၠောန် COS Forum (မလုပ်အဝေါၚ်ပေါဲသဳကၠဳပရေၚ်ဍုၚ်ကွာန်အဆံၚ်ကောန်ဂကူ) နအလိုက်ပရူပရာဂှ်တုဲ ဂကောံမှာဇန် CSO တွဵုရးမန် ကၠောန်ကၠုၚ်ပေါဲချပ်ဓရီုပွိုၚ်ၜါတ္ၚဲ ပ္ဍဲၝောံခန်ပိုၚ်ခေတ် ဍုၚ်မတ်မလီုဂှ် တုဲဒှ်အာပ္ဍဲဂျာန်နဝါရဳ (၁၇) ရ။
“ပ္ဍဲဝှဝ်ရာမ် ပိုဲဒးကၠောန် အလန်ပထမဂှ် စွံအဓိကကဵု ကဏ္ဍလဵု၊ ပရူပရာလဵုတုဲ သဳကၠဳရောဟီုဂှ် ဂွိုအ်ဟီုဏီပုဟ်၊ အခါရစိုပ်အခိၚ်ကၠောန်ဝှဝ်ရာမ်ဂကောံမှာဇန်တေံမ္ဂး ညးလဵုဂွံတိုန်ရောဂှ် ဒးရုဲညးစၞးတွဵုရးဇကုဏောၚ်၊ဒၟါနူဂှ်ရ အရာထေက်ကဵုဒးပဠေဝ်နွံဂှ် သွက်ဂွံပဠေဝ် သွက်ဂွံပ္ညဳကေတ်တၚ်တုပ်စိုတ်ညးသ္ကံနွံတုဲ ဒးကၠောန်ပေါဲချပ်ဓရီုဏံ” သာ်ဝွံ မာံအံၚ်ထူ နူကမ္မတဳဝှဝ်ရာမ်မှာဇန် ဟီုလဴကဵုဌာန်ပရိုၚ်မန်ရ။
ပ္ဍဲအရာရုဲညးစၞးဂှ် လၟိဟ်မၞိဟ်ဗြဴပါလုပ် ဟိုတ်နူဟွံပေၚ် ၃၀ တၟံကၠံဂှ်ရ ညံၚ်သ္ဂောံဂွံ ၃၀ က္ဍိုပ်ကၠံဂှ် ဆက်အာတ်ပၠန်ဏောၚ် မိအံၚ်ရေၚ်မန် နူဂကောံညးဗြဴမန် (MWO) ဟီုရ။
“ယဝ်သ္ၚဳဂၠိပ်ရံၚ် လၟိဟ်ညးစၞး ရုဲစှ်လဝ်ပ္ဍဲပေါဲချပ်ဓရီုဏံဂှ်မ္ဂး ညးဗြဴဂွံပါလုပ်ဂှ် ၃၀ တၟံကၠံဟွံပေၚ်ပုဟ်၊ ပ္ဍဲကိစ္စပရေၚ်ၜိုဟ်လလံဍုၚ်ဏံဂှ် ကဏ္ဍညးဗြဴလေဝ် ပၟိက်ဇၞော်မံၚ်ကီုတှေ် ပ္ဍဲအရာရုဲဏာ ညးစၞးသွက်ဂွံအာတိုန်ဂှ် မိက်ဂွံကဵုပရဲ ကုညးဗြဴတံကီု” မိအံၚ်ရေၚ်မန် ဂးရ။
ဆဂှ်သၟးဟွံသေၚ် ပ္ဍဲအရာရုဲစှ် စၞးညးဗြဴဂှ်လေဝ် မ္ၚးနူဂကောံညးဗြဴဏံတုဲ ညးဗြဴနူဂကောံတၞဟ်ဟ်တေံလေဝ် မိက်ကဵုရုဲစုတ်ကီုရောၚ်ဂှ်လေဝ် မိအံၚ်ရေၚ်မန် ဆက်ဟီုရ။
ပ္ဍဲပေါဲချပ်ဓရီုဏံဝွံ ရန်ကဵုသွက်သ္ဘၚ်သဳကၠဳပရေၚ်ၜိုဟ်လလံကၟိန်ဍုၚ်တေံတုဲ လၟေၚ်ကမၠောန် ကၠောန်ဗဒှ်လဝ် ဝှဝ်ရာမ်ဂကောံမှာဇန်ဂမၠိုၚ်၊ပရူပရာလၟေၚ်ကမၠောန် ကေုာံ TOR ကမ္မတဳကၠောန်ဗဒှ်ဝှဝ်ရာမ်ဂကောံမှာဇန်ဂမၠိုၚ် အဆံၚ်ကၟိန်ဍုၚ်၊ ဗီုဆန်ၜန်ဖန်ဖက် ကေုာံဗီုကၠောန်ဗဒှ်ဝှဝ်ရာမ် ဂကောံမှာဇန်ဂမၠိုၚ်၊ ဗီုဂကောံမှာဇန်တံ ရုဲစှ်လဝ်ညးစၞးဂမၠိုၚ် သွက်ဂွံအာတိုန်သဳကၠဳ ပ္ဍဲဝှဝ်ရာမ် အဆံၚ်ကၟိန်ဍုၚ်တေံ ကေုာံပရူပရာမရုဲစှ်လဝ်တံဂှ် ချူခၞံလိက်ကၞပ် ဖျေံပရေၚ်ကမၠောန်တုဲ ရေၚ်တၠုၚ်အာဏောၚ်ဂှ် ဂွံဆဵုကေတ်ရ။
ပ္ဍဲပေါဲချပ်ဓရီုလၟုဟ်ဏံဂှ်ဝွံ ညးစၞး (၉၀) တၠပြၚ် နူဂကောံမှာဇန် မဆေၚ်ဆက်ကဵုပရေၚ်ၜိုဟ်လလံ အပ္ဍဲတွဵုရးမန်ဏံ တိုန်စိုပ်လဝ်ရ ဂွံတီကေတ်။