နူဂကောံအလဵုအသဳ ပ္တိုန်လဝ်သွက်ဂွံသ္ပဒ္တန် ကိစ္စဌာနဝန်ဇၞော် (၂) သာ်ဂှ် ကၠတ်ထဝ်တွဵုရး သ္ပလဝ်စၟတ်သမ္တီ

by | Mar 4, 2017 | ပရိုၚ် | 0 comments

ပ္ဍဲဂိတုမာတ် (၂) ဂှ် ကၠတ်ထဝ်တွဵုရးဍုၚ်မန် အလန်ဒုတိယ ကၠောန်ကောံဓရီုကာမံက်တိုန် (၁/၂၀၁၇) တုဲ ကိစ္စပြံၚ်လှာဲယၟုဌာနဝန်ဇၞော် (၂) ဌာန နူဂကောံအလဵုအသဳတွဵုရးဍုၚ်မန် ပ္တိုန်လဝ်ဂလာန် သွက်ဂွံသ္ပဒ္တန် ပ္ဍဲကၠတ်ထဝ်ဂှ် ဟိုတ်နူဟွံဒးကဵုဂၠံၚ်ဥပဒေ ကေုာံ အခိုက်ကမၠောန်ဥပဒေဂှ်ရ ဖျေံသ္ဂုတ်သွာတ် သ္ပဒ္တန်ဟွံဂွံတုဲ တုပ်စိုတ် စွံလဝ်အဆံၚ် ပ္တိုန်စွံစၟတ်သမ္တီကၠာရ။

ပၞောဝ်ကဵုဌာနဂမၠိုၚ် ပံက်လဝ်ပ္ဍဲဂကောံအလဵုအသဳ တွဵုရးမန်ဂှ် ယၟုဌာနဝန်ဇၞော်ပရေၚ်ဗဟဵုလဟဵု ကေုာံဌာနဝန်ဇၞော်ပရေၚ်သိုၚ်ခၞံ ၜါဏံ ပလီုကၠေံတုဲ ဌာနဝန်ဇၞော် ဓါတ်လလဳ၊အစောံဒြဟတ်ကေုာံကွတ်စက်ဂှ် သွက်ဂွံပံက်စွံ နဒဒှ်ဌာနဝန်ဇၞော် ပရေၚ်ဓါတ်လလဳ၊အစောံဒြဟတ်၊ကွတ်စက် ကေုာံပရေၚ်ဗဂဵုလဟဵုကီု၊ ဌာနဝန်ဇၞော်ပရေၚ်ကိုန်အစဳဇန်၊ပရေၚ်ဘဏ္ဍာကေုာံဒြဟတ်ညးဍုၚ်ကွာန်ဂှ် သွက်ဂွံပံက်စွံ နဒဒှ်ဌာနဝန်ဇၞော် ပရေၚ်ကိုန်အစဳဇန် ပရေၚ်ဘဏ္ဍာကေုာံပရေၚ်သိုၚ်ခၞံကီု ပ္တိုန်လဝ်ကဵုကၠတ်ထဝ်ရ။

 ကောံဓရီုကာမံက်တိုန် (၁/၂၀၁၇) ကၠတ်ထဝ်တွဵုရးမန် အလန်ဒုတိယ (MNA)

ကောံဓရီုကာမံက်တိုန် (၁/၂၀၁၇) ကၠတ်ထဝ်တွဵုရးမန် အလန်ဒုတိယ (MNA)

“လ္ပာ်အလဵုအသဳ ခိုဟ်ဏောၚ်စှေ်စိုတ်တုဲ ညးတံပ္တိုန်ထ္ၜး၊ ပြဟ်ဟ်ဏံ စွံလဝ်အဆံၚ်စၟတ်သမ္တီကၠာဏောၚ်၊ လ္ပာ်ညးတံလေဝ် ပ္ညဳကဵုသမ္မတကၟိန်ဍုၚ်ဏောၚ်၊ သမ္မတကၟိန်ဍုၚ်တေံလေဝ် ဒုၚ်တဲဏောၚ် ကလေၚ်နၚ်ပရိုၚ်မ္ဂး ပ္ဍဲကောံဓရီုကၠတ်ထဝ် မွဲဝါတေံပၠန်တှေ် သ္ပဒ္တန်ဂွံဏောၚ်” သာ်ဝွံ ဒံက်တာအံၚ်နာၚ်ဥူ ဒုဥက္ကဌ ကၠတ်ထဝ်တွဵုရးမန် ဟီုရ။

ပ္ဍဲဥပဒေအုပ်ဓုပ်ဍုၚ် ၝောံပိုဒ် ၂၄၈ (ဂ) ဂှ်မ္ဂး သမ္မတကၟိန်ဍုၚ်ဝွံ ဒုၚ်သဇိုၚ်တၚ်သ္ပဒ္တန် နူကၠတ်ထဝ် ရးဒေသဇၞော် ဟွံသေၚ်သာ်ဂှ် နူကၠတ်ထဝ်တွဵုရးတံဂှ်တုဲ (၁) ဗီုဂပ်ဝ်ဂှ် ထ္ၜုတ်စွံဌာနဝန်ဇၞော် ရးဒေသဇၞော် ဟွံသေၚ်သာ်ဂှ် ဌာနဝန်ဇၞော်တွဵုရးတံဂွံသၟးဟွံက အတိုၚ်ထ္ၜုတ်စွံလဝ်ဌာနတံဂှ်လေဝ် ဟွံဒးရး ဟွံစှေ်ဗီုမ္ဂး က္လေၚ်ပဠေဝ်၊ က္လေၚ်ရနုက်ဗပေၚ် ဂွံကီုရောၚ် ဂးလဝ်သာ်ဏံနွံ ဒုဥက္ကဌကၠတ်ထဝ်တွဵုရးမန် ဟီုရ။

“ကိစ္စဖအောန် ဂလိုၚ် က္လေၚ်ပံက်ပဠေဝ် ဌာနဝန်ဇၞော်ဂှ် ကၠုၚ်နူသမ္မတ ဟွံသေၚ်တုဲ ဟိုတ်နူဟွံသေၚ်ကဵု လၟေၚ်ကမၠောန်ဥပဒေဂှ်ရ ဂလာန်ဏံ အဲဒ္စဵုဒ္စး” သာ်ဝွံ ဥူထောန်မေန်အံၚ် နူဒေသမာဲ (၁) ပွိုၚ်ဍုၚ်ပံၚ် ဟီုရ။

သ္ကိုပ်ဝန်ဇၞော်တြေံတွဵုရးမန် ဥူမေန်မေန်ဥူ နုက်တိတ်အာဂှ် ဟိုတ်နူနုက်တိတ် နူဌာနဝန်ဇၞော် ပရေၚ်ဗဂဵုလဟဵု ကေုာံဌာနဝန်ဇၞော်ပရေၚ်သိုၚ်ခၞံ သီုၜါဌာနကီုဂှ်ရ ပြဟ်ဟ်ဏံ ဌာနဝန်ဇၞော်ၜါဌာနဂှ် သၠးမံၚ်ရ။

ကောံဓရီုကာမံက် (၁/၂၀၁၇) ကၠတ်ထဝ်တွဵုရးမန် ကၠောန်သ္ပပွိုၚ် (၂) တ္ၚဲတုဲ စရၚ်ယၟုသ္ကိုပ်ဝန်ဇၞော်တွဵုရးမန် နူသမ္မတပလံၚ်နၚ်ဂှ် သ္ပဒ္တန်ပ္ဍဲကၠတ်ထဝ်တွဵုရး၊ သ္ကိုပ်ဝန်ဇၞော်တၟိ တွဵုရးမန် ယဵုသစာ၊ ထ္ပက်စၟတ်တဲဒုၚ်ကတိပါၚ်၊ ဟီုပၟိၚ်ဂလာန်၊ ပ္တိုန်စွံစၟတ်သမ္တီ ဂလာန်ပၟိၚ် နမပ္တံသာ်ဏံ ရေၚ်တၠုၚ်ကၠုၚ်ကောံဓရီုတုဲ ပ္ဍဲတ္ၚဲဒုတိယပၠန် နူဂကောံအလဵုအသဳ ပ္တိုန်လဝ် ကိစ္စဌာနဝန်ဇၞော် ၂ ဌာနဂှ် သ္ပဒ္တန်ဟွံဂွံဏီတုဲ နူကၠတ်ထဝ် ပ္တိုန်လဝ်စၟတ်သမ္တီကၠာရ။

Written by

Related Posts

အလာံကၟိန်ဍုင် ကဵု အလာံကောန်ဂကူဗၟာ ဗီုလဵုတၞဟ်ခြာရော

အလာံကၟိန်ဍုင် ကဵု အလာံကောန်ဂကူဗၟာ ဗီုလဵုတၞဟ်ခြာရော

ပ္ဍဲစင်အသေအဟာန်တ္ၚဲကောန်ဂကူမန် လ္ဒောဝ်တပ်တပ်ဂှ် ဒးပစူသၠုင်လဝ်အလာံကၟိန်ဍုင်ရောင် ဂျာန်နဝါရဳ ၃ တုဲ ကၠုင်ဂှ် နူကမ္မတဳကၠောန်ဗဒှ်တ္ၚဲကောန်ဂကူမန် ဗဟဵုတအ် ပတိတ်ကၠုင်လိက်စေဝ်ပၞောန် စပ်ကဵုအလာံတုဲ မၞိဟ်လ္ၚဵုဟွံ ပေင်စိုတ်ရ။

ပ္ဍဲသၞာံဏံ ညံၚ်ဂွံတြးအာ (Mon E-book)မွဲမာန်ဂှ် နကဵုဘာကဝ်လိက်ကောန်ဂကူမန် ဂစာန်ကၠောန်မံၚ်နွံ

ပ္ဍဲသၞာံဏံ ညံၚ်ဂွံတြးအာ (Mon E-book)မွဲမာန်ဂှ် နကဵုဘာကဝ်လိက်ကောန်ဂကူမန် ဂစာန်ကၠောန်မံၚ်နွံ

ပ္ဍဲကဵုသၞာံ ၂၀၂၅ ဏံ ညံၚ်မိမညးဍုၚ်ကွာန် ကေုာံ သၟတ်ကွးဘာမန်တအ် သ္ဂောံစကာအာ လိခ်ပတ်မန် လတူလပှ်ကျာမာန်ဂှ် နကဵုညးတာလျိုၚ်ဌာနကမၠောန်ပတိုန်လိခ်ပတ်မန် လတူဓါတ်လပှ်ကျာ ဘာကဝ်လိက်မန်တအ် ဂစာန်ကၠောန်မံၚ် (Mon E-book project) မွဲနွံဂှ် ဂွံတီကေတ်ရ။

စပ်ကဵုကမ္မတဳကၠောန်ဗဒှ်တ္ရဲကောန်ဂကူမန် ဗဟဵု ပတိတ်လိက် စေဝ်ပၞောန်အလာံတုဲ ညးဂမၠိုင် ပါ်ပါဲ

စပ်ကဵုကမ္မတဳကၠောန်ဗဒှ်တ္ရဲကောန်ဂကူမန် ဗဟဵု ပတိတ်လိက် စေဝ်ပၞောန်အလာံတုဲ ညးဂမၠိုင် ပါ်ပါဲ

ကြဴနူကဵု ကမ္မတဳကၠောန်ဗဒှ်တ္ရဲကောန်ဂကူမန် မရနုက်ကဵု (၇၈)ဝါ ဗဟဵုတံ ပတိတ်ကၠုင်လိက် စေဝ် ပၞောန် အလာံပ္ဍဲတ္ရဲကောန်ဂကူမန်ဂှ်တုဲ ညးဂမၠိုင် ဟီုပါ်ပါဲကၠုင်နွံရ။

0 Comments

Submit a Comment

Your email address will not be published. Required fields are marked *

This site uses Akismet to reduce spam. Learn how your comment data is processed.